San Juan 7

1Che gujcti recosre, cansaj Jesús nez reyuj xten Galilee, di rlajzni jia'nni nez reguedx Judea sa'csi rlajz rebeṉ ro'c ju'tni. 2Luxh ameer gaḻ lanij xten cose'ch xten guidoguijd, te relanij xten rexpejṉ Israel. 3Ni'c räjp rebejtz Jesús lojni: ―Na'c jia'nlu ree. Huij Judea te näjza rexpejṉpaclu fii redzunro nani rujnlu. 4Sa'csi rut rujndi xtzuunni xhiga'tz palga rlajzni gacbee bejṉ xhi dzuun rujnni, te gumbee bejṉni. Palga rujnpaclu redzuunre, baluiini lo guiraa rebeṉ guedxliuj. 5Guniireni si'c lojni sa'csi nicla rebejtzni di chalilajz xtiidxni. 6Dxejcti räjp Jesús lojreni: ―Gajd xhoṟä guidzujṉ, niluxh par la'tu xhitis oṟ najc hueen. 7Di gacdi guidxe'ch rebeṉ guedxliuj lojtu, luxh rdxe'chreni loä sa'csi narä rniliä xcuentreni: dzunguijdx najc xtzuunreni. 8La'tu coḻchäj lanij; narä dina cha'a lanijga sa'csi gajd xhoṟä gaḻ. 9Che gulujx guniini si'c lojreni bia'ntini nez Galilee. 10Dxejcti che asää rebejtzni lanij, dxejc näjza laani sääni lanij, luxh dini nusäbdiidx, si'c xhiga'tz sääni. 11Dxejcti caguiil rexpejṉ Israelni lo lanijga, räjpreni: ―¿Concha niguiiga? 12Lo rebejṉ xhidaalga yu' xhidajl bejṉ ni cagusiejyreni xcuentni. Yu'reni räjp: “Hueen najcni”, per sgaiireni räjp: “Dini gac hueen. Cagusgueeni rebeṉguejdx.” 13Nicla tejreni xhet casäbdiidxdireni xhini'c caniireni. Direni guinii dip sa'csi rdxejbreni rexpejṉ Israel nani rnibee. 14Agurojl lanij, che biu' Jesús neṉ guidoro. Dxejcti gusloj caguluiini. 15Dxejcti rdxeloj rexpejṉ Israel nani rnibee, räjpreni: ―¿Xho najn dee guiraloj, niluxh dini nisieed xleii toMoisés? 16Badzu' Jesús diidxre, räjpni: ―Yäḻruluii nani caluiyä et xtenädini, xten nani baxhaḻ naräni. 17Palga yu' chu rlajz gun nani rlajz Dios, sacbeeni la xten Dios najc reyäḻruluii xtenä, o la lagajcsi narä rbää́ diidx ni caguluiä. 18Nani rusule'ni diidx nani lagajc laani rbääni, ni'c rniini diidxga te guiliä'p rebejṉ xpala'nni, luxh nani rguiil chä'p xpala'n nani baxhaḻni, ni'c ni rnii didxlii, xheti yäḻrusguee neṉ lastooni. 19¿La di toMoises nuniidx leii lojtu, ä? Niluxh nicla tejtu di gusoob xtidx leiiga. ¿Xhicuent rlajztu ju'ttu narä, pes? 20Badzu' rebeṉ xhidajlga diidxre, räjpreni: ―¡Xprit beṉdxab yu' lastoolu! ¿Chuni'c rlajz ju'tlu? 21Badzu' Jesús diidxre lojreni, räjpni: ―Tejtis dzuun benä con xcäḻrnibeä, dxejc guiraatu cadxelojtu sa'csi benäni dxej ni rusilajztu. 22Ni'cni baniidx toMoisés lojtu yäḻru'tu bee, luxh etlaadini guläxtiejnini, agac guläxtiej retoxtadgoldootuni. La'tu rusäḻtu bee rebiuux mase najcni dxej nani rusilajztu. 23Mbaj pes, palga rajc rusäḻtu bee bejṉ te dxej nani rusilajztu didi nit xleii Moisés, ¿xhicuent rdxe'chtu loä sa'csi basiacäpac te bejṉ te dxej nani rusilajztu, ä? 24Na'c rujntu yäḻguxhtis si'ctis ni rlajztu. Coḻyejn yäḻguxhtis con yäḻguxhtis xten Dios. 25Dxejcti gusloj gaii bejṉ Jerusalén cayujn yäḻgunabdiidx, räjpreni: ―¿La etlaadi dee ni caguiilreni te ju'trenini, ä? 26Ani asuga', caniini nez loj guiraa rebeṉguejdx, niluxh rut rudxojndini. ¿Xhaa ahuililajz reguxhtis, regubier laani najcpacni Crist, ä? 27Niluxh nuure nadoncheenu caro siääd niguiire, niluxh che jiääd Crist, rut gacbeedi caro siäädni. 28Caguluii Jesús neṉ guidoo che biejn diajgni rediidxre, dxejc dipduxh guniini, räjpni: ―La'tu numbeetu narä, najntu caro siälä; luxh dina niälä lagajcsi narä; nani baxhaḻ narä guliipac nabajṉni, luxh la'tu ditu gumbeeni. 29Luxh narä numbeäni, sa'csi lojni biriä, laani baxhaḻzani narä. 30Dxejc rlajzreni niniaazrenini, niluxh rut gunaazdini, sa'csi gajd xhoṟni gaḻ. 31Xhidajl bejṉ lo rebeṉ xhidajlga huililajz xtiidxni, dxejcti räjpreni: ―Cheni jiääd Crist, ¿xhixh sujnruni milagwr loj nani rujn dee, ä? 32Che biejn diajg refarisee xhi canii rebejṉ xcuent Jesús, laareni näjza rebixhojz nani rnibee lo rebixhojz baxhaḻreni guixhajg te guiniaazreni Jesús te jiäuuni. 33Sas räjp Jesús lojreni: ―Bale'si dxej su'ä lojtu, dxejcti guibi'ä loj nani baxhaḻ narä. 34Siguiiltu narä, niluxh ditu guidxäl narä, sa'csi cadro cha'ä digacdi jiäädtu. 35Ni'c gunii rexpejṉ Israel lo sa'reni; räjpreni: ―¿Cacharo chääni ni'c di gacdi guidxälnuni? ¿Xhaa sijni loj rexpejṉ Israel nani nare'ch nez lajdx regriegos te guluiini regriegos? 36¿Xhi säloj diidxre nani guniini loonu: “Siguiiltu narä, niluxh ditu guidxäl narä, sa'csi cadro cha'ä di gacdi jiäädtu”? 37Lult dxe lanij, ni najc dxero, gusulii Jesús dipduxh guniini, räjpni: ―Palga yu' chu cayojḻ, sujiäädni loä te yäni. 38Nani chalilajz xtidxä si'cni caj lo rexquijtz Dios neṉ lastoolini siliejn nisnabajṉ. 39Rediidxre guniini xcuent Sprit Dxan nani churu jiädläjz neṉ lastoo reni rililajz xtiidxni, sa'csi gajd Sprit Dxan jiääd, sa'csi gajd Jesús guibaṉsac lo rebeṉgut. 40Lo rebeṉ xhidajlga yu' reni biejn diajgreni rediidxga, dxejc räjpreni: ―Guliipacni, dade're najc laapac ni siääd, si'c ni rnii xtidx Dios. 41Yu'zareni räjp: ―Dade're najc Crist ni cabääznu. Yu'za sgaii ni räjp: ―Gurniälojtu jiääd Crist nez Galilee. 42Ni loj rexquijtz Dios caj riäjḻpac gac Crist te rexagdoo toṟeii David, jiäädzani guedx Belén, lagajc guejdx cadro siääd toṟeii David. 43Dxejcti gucgala' rebejṉ xcuent Jesús. 44Yu'reni rlajz chääni pres luxh rut biajxdi gunaazni. 45Gubi' reguixhajg xten guidoo loj rebixhojzro näjza refarisee. Dxejcti gunabdiidxreni loj reguixhajg, räjpreni: ―¿Xhicuent ditu niädnäni? 46Badzu' reguixhajg diidxre, räjpreni: ―¡Gajdpac te bejṉ guinii si'cni rnii bejṉga! 47Dxejc räjp refarisee: ―¿La näj la'tu abasgueeni, ä? 48¿Xhixh loj regubier o loj refarisee yu' chu tej ni ahuililajz xtiidxni, ä? 49Rebeṉ xhidajlre ni di gan xleii toMoisés, reni'c agunijtpac. 50Nicodem̲, nani huij lojni te guxhijṉ, najc te refarisee. Laani räjpni lojreni: 51―Lo xleiinu caj: digacdi guntu yäḻguxhtis te bejṉ palga gajdtu gucuadiagxgaa xtiidxni, te don xhi bejnni. 52Badzu'reni diidxre räjpreni lojni: ―¿La näjza luj siäädlu Galilee, ä? Biḻsa'c xhi caj lo xquijtz Dios, suhuiilu nicla tej niguii nani rnii xtidx Dios di jiääd nez Galilee. 53Dxejc cade tejreni sii rolijzreni.

will be added

X\