1 Naj Pab, najn tijb xi apóstol Jesucrist por xguialrniabee Dios. Cucan gui'ch guie par lëjt guial diidxli zinalidi xtiidx Jesucrist, lëjt guial ma najdi xbejn Dios luguiedx Éfeso. 2 Dux Dad ree Dios në Dad Jesucrist güünle' lëjt yabe'cdxe tëë reeman luxdoodi. 3 Quixtëë Dios, xdad Dad Jesucrist, dád benza'c najman, guial yan ma nayajc ree tijbzi con Jesucrist, ma beenle'man dunuj ree diizd xanyabaa con graloj guialnaza'c din gac yunaal ree xtiidxaman. 4 Laaman bacaabee dunuj ree por Dad Jesucrist diizd chi gad guidxliuj gacchaaw din yabajn ree naya sin dol lojman. 5 Abi' guial rënman dunuj ree, diizd guia'xchej beenman guial yayajc ree xi'nman por Jesucrist zi'c beenman xgab gac. 6 Zeel ad racwëëzt raza't ree Dios zagdxe guial dád benza'c najman, ma beenle'man dunuj ree por Xi'nman Jesucrist, bén rënman, 7 bén ma gudijx por dunuj ree chi guxhie' xrejnman, abi' ma gojc perdon dux tol ree guial dád rën Dios dunuj ree. 8 Zeel dád zro' guialrajc në guialrignia' ma bazaladxaman duloj ree, 9 abi' ma balüüman duloj ree xhienaag na̱j xixgabaman diizd gocli, zi'cgajczi ma beenman xgab gac. 10 Guiáad xgab guin gacan cumplid chi guidxin dxej, Dios gusa'n gra loj Jesucrist zi'c ni yu' xanyabaa në loj guidxliuj. 11 Nëtëë guial nayajc ree tijbzi con Jesucrist, Dios ma bacaabee dunuj ree din yayajc ree par laaman zi'c na̱j xixgabaman diizd guia'xchej, din laaman rüjn gra zi'c rënman gac. 12 Abi' laaman ma been zian, din dunuj ree nayajc ree bén yaloj bililadx Jesucrist, yayajc ree bén guza't laaman zagdxe por xguialrniabeeman. 13 Nëgajc lëjt chi biguiejndi diidxli xhienaag par gaquidi perdon dxel bililadxidi Cristo gojquidi tijbzi con laaman. Abi' zi'c rëb Dios guial guneeman xSprijtaman, dxel yan guial ma nabannëdi laaman, laaman na̱j zi'c tijb sen ni rulüü guial ma najdi par Dios. 14 Guial ma nabannë xSprijt Dios dunuj ree, yaca' ree ni rëb Dios guneeman chi ma bara xbejnman za' xanyabaa, din chitëë yacwëëz yaza't reeman zagdxe por xguialrniabeeman. 15 Abi' guial ragbeen rliladxidi Dad Jesús rën tëëdi los demazri ree bén na̱j xbejn Dios, 16 zeel ad rucwëëzt rudën quixtëë loj Dios por lëjt, beegaj rbedx rniaaban laaman. 17 Laaman na̱j Dios rniabee diizd xanyabaa, xDad Dad Jesucrist. Rniaaban lojman yazaladxaman quiarguiejn lojdi din chignia'di ni gulüüman lojdi gusnuu tëë güünbeedi laaman mazri. 18 Rniaaban lojman din guixhialaman xquiarguiejndi din chignia'di xhie rën guiëb ni rbëzidi diizd chi bacaabeeman lëjt, chignia' tëëdi guial ni za'cdxoon naroob tëë na̱j ni nagu'chaaw Dios par ree bén na̱j xbejnman. 19 Rniaab tëën lojman guial gagbeedi guial dád naroob na̱j xguialrniabeeman ni cayagnë dunuj ree raliduladx reeman. Laagajc guialrniabee naroob guin balüü Dios 20 chi basbanman Jesucrist abi' gule'caman laaman xladbeeman xanyabaa 21 lod badëëman guialrniabee lojman ni mazri lasajc guial loj gra ree guialrniabee, në loj gra guialguxtis në loj gra gobiarn. Abi' mazri lasajc guialrniabee guin guial loj gra ree guialrniabee yu', në ni qui chu'ri ree loj guidxliuj guie. 22 Dxel basa'n Dios gran loj Jesucrist, bacaabeeman laaman din nabeeman gra ree bén rliladx laaman. 23 Guiáad ree bén rliladx laaman, guidiblagaa nabannëman laa reeman abi' bantëëz guin za'man din laaman guidiblagaa rniabee.
