SAN MATEO 27

1Casi birá gueela', uní' stiidxa ca xaíque sti ca sacerdote ne ca xaíque sti guidxi que guuti ca Jesús. 2Ne bindiibi ca laabe yené ca laabe ra nuu gobernador Poncio Pilatu. 3Biiya si Judas ni yeutoo laabe que ma chi gati be la? beeda malaya laa, para yeudxii treinta moneda que ca xaíque sti ca sacerdote ne ca xaíque sti guidxi. 4Ne na rabi laaca': —Naa bichee purti bituaa tobi ni nayá ladxidó'. Para na cabe rabi cabe laa: —Xi runi importar laadu ya'. Lii gu'yu xi gu'nu'. 5Ne óraque bizu'nda be ni ndaani yu'du ro' que, ne biree be yenduu be doo yanni be. 6Gundisa ca xaíque sti ca sacerdote ca moneda que, peru na ca': —Qué zanda cu' nu moneda ri lade ofrenda sti yu'du', purti bixuí' né ni rini sti ti hombre. 7Ne óraque uní' stiidxa cabe xi guni né cabe bidxichi que. Para uzí' cabe ti layú lu ni ruzá' guisu ne na cabe iquiiñe ni para igaachi judíu ni gueeda de sti ladu. 8Nga runi gulee lá cabe layú que Layú de Rini ne nga lá ni dede yanna. 9Ne zacá guca ni modo uní' Dios de ruaa profeta Jeremías dxi na: 10Ca xiiñi Israel gudixhe idoo be treinta moneda de plata, ne dxi bigueta moneda que lu ná cabe, ucuaa cabe ni, uzí' né cabe ni ti layú lu ni ruzá' guisu. Zacá nga gudxi Dios naa. 11Ne ora zuhuaa Jesús nezalú gobernador, na gobernador que rabi laabe: —ñee lii nga rey sti ca judíu la? Para na be: —Casi na lu ca, nga laani. 12Peru óraque neca gudixhe irá ca xaíque sti ca sacerdote ne ca xaíque sti guidxi xqueja be, ma qué niní' ru be gasti'. 13Para na Pilatu, rabi laabe: —Cadi cayuna diaga lu irá ni cugaani cabe luguiá lu ri la? 14Peru qué nicabi be laa nin ti diidxa'. Ne nabé bidxagayaa gobernador que. 15Chiqué, cada iza ra cayaca saa, rundaa gobernador que ti presu para ca binni que, tutiisi gapa ca gana. 16Ne iza que nuu ti presu ni za'bi stiidxa irá ladu, lá Barrabás. 17Ngue runi, ora bidxiña cabe, na Pilatu rabi laacabe: —Tu racala'dxi tu undaa para laatu ya', Barrabás la? o Jesús ni rabi cabe Cristu. 18Nanna ca Pilatu bedané cabe Jesús ra nuu purti si qué na cabe chi nanda binni laa. 19Ma zuba Pilatu ra juzgadu sti', bisenda tidxi xheela laa, na xheela rabi laa: —Cadi gu'nu hombre cha'hui ca gasti', purti pur laabe nabé bine sufrir lu bacaanda nuchi'. 20Peru ucuá ca xaíque sti ca sacerdote ne ca xaíque sti guidxi tema lú ca binni que para inaba ca ilaa Barrabás ne gati Jesús. 21Oraque na gobernador que rabi laacabe sti tiru: —Tu pe de laacabe racala'dxi tu undaa para laatu pue. Para na cabe: —Barrabás. 22Oraque na Pilatu rabi laacabe: —Yanna xi gune nia Jesús ni rabi cabe Cristu ri ya'. Para bicabi irá cabe: —¡Icá be lu cruz! 23Para na gobernador que: —Xiñee, xi huayuni be. Peru laacabe jma rusi bicaa cabe ridxi, na cabe: —¡Icá be lu cruz! 24Biiya si Pilatu pur gana si caní' ne mayaca uzulú ti bulla la? gucuaa nisa ne gudiibi ná nezalú ca binni que, para na rabi laacabe: —Cadi luguia'ya dia' nuu donda purti chi ixii rini sti hombre cha'hui ri'. Laatu laguuya xi iree xa ni laatu. 25Para na ca binni que: —Zaa guiaana donda ca luguiá du ne luguiá ca xiiñi du. 26Oraque bindaa be Barrabás para laaca', ne bini mandar be quiñe cabe Jesús para bidii be laa icá lu cruz. 27Oraque gucuaa ca soldadu sti gobernador que Jesús, yenduu ca laabe ndaani palaciu para bidxiña idubi batallón ra nuu be. 28Gulee ca xhaba be ne bicua'qui ca laabe ti lari xhiñá'. 29Ne bizá' ca ti la'pa de guichi uluu ca ique be ne bigaasa ca tindaa gueere ná be ladu derechu. Oraque bizuxibi ca xañee be ne bini burla ca laabe, na ca': —¡Viva rey sti ca judíu! 30Ne bichá xhinni ca lú be ne guxha ca gueere que ná be, bichenda ca ni ique be. 31Biluxe si bini burla ca laabe zaqué la? gulee ca lari que ne bigacu ca laabe xhaba be, ne ziné ca laabe para icá be lu cruz. 32Ra ze cabe que bidxaaga cabe ti hombre de Cirene lá Simón ne bicaa cabe laa gua cruz sti Jesús 33dede yendá cabe ti lugar lá Gólgota. Ni riní' diidxa Gólgota ca la? Lugar sti Calavera. 34Raqué bidii cabe laabe vinagre nucha nisa xculá'. Peru ora bi'ya be xi naca ni la? qué niná be ñe' be ni. 35Bicaa si cabe laabe lu cruz guluu cabe xhaba be lu rifa, ne cada tobi ucuaa ni gulee. Guca ni zaqué ti iree ni modo pe uní' Dios de ruaa ti profeta de laabe, ra na: “Gudiizi cabe xhaba', ne uluu cabe laa lu rifa.” 36Para gurí cabe cayapa cabe laabe. 37Ne bicaa cabe ca diidxa ri xaíque be: “Ndi nga Jesús Rey sti ca judíu.” Purti na cabe pur laani cá be lu cruz. 38Oraque bicaa né cabe laabe chupa gubaana', tobi ladu derechu ne stobi ladu biga'. 39Ne cayuni burla ca binni zidi'di raqué laabe, cuniibi ique ca lú be, 40na ca': —Lii nou' zuxhá lu yu'du ro' ne zucuí lu ni lu chonna gubidxa. Yanna bilá laca lii. Pa dxandí Xiiñi Dios lii la? biete de lu cruz ca. 41Ne zaqueca na ca xaíque sti ca sacerdote ne ca maistru de ley ne ca fariseu ne ca xaíque sti guidxi, cuchá ca ni lú be: 42—Stobi bilá be peru laca laabe qué zanda ulá be. Na be rey sti Israel laabe, ne pa dxandí ni la? guiete be de lu cruz ca yanna, ne zuni cre nu laabe. 43Ucuá lú be Dios, yanna cueza be ulá Dios laabe, pa nadxii laabe, purti na be Xiiñi Dios laabe. 44Ne zaqueca cayuni burla ca gubaana ni cá né be que laabe. 45Bia' galaa dxi bicahui xaibá' dede bia' las tres. 46Mayaca ganda las tres bicaa Jesús ridxi: —¡Elí, Elí, lama sabactani! Didxazá la? niní' be: Dios stinne', Dios stinne', xiñee ma bisaanu naa. 47Ne ora bina diaga cani zuhuaa raqué ni uní' be que la? na ca': —Cucaa ridxi be Elías. 48Oraqueca biree tobi de laaca yecaa ti esponja bigadxe de vinagre ne bidxiiba ni ique ti gueere', ne bigué' ni laabe. 49Peru na xcaadxi que rabi laa? —Zaa nuu be, idu'ya nu pa zeda ulá Elías laabe. 50Bigueta bicaa be sti ridxi ne raqué guti be. 51Ne mala guca cortina sti yu'du ro' chupa ndaa de punta punta, ne guca xu, gulaa stale guie. 52Ne bixale caadxi ba', biasa stale de ca xpinni Dios ni ma guti. 53Ne dxi ma biasa Jesús de lade gue'tu que la? biree cabe de ndaani ca ba' que, uyé cabe ndaani guidxi Jerusalén ne biiya stale binni laacabe. 54Nabé bidxagayaa capitán ni cayapa Jesús que, laa ne ca soldadu sti', purti bini sentir ca guca xu ne biiya ca irá cosa ni guca que, para na: —Dxandí Xiiñi Dios ndi'. 55Zitu huiini de raqué zuhuaa caadxi gunaa ni beda nanda Jesús de Galilea, beeda ca para gacané ca laabe. Zuhuaa ca cayuuya ca ni cayaca que. 56Lade cabe nuu María Magdalena ne María jñaa Jacobo ne José, ne jñaa ca xiiñi Zebedeu. 57Huaxhinni que beeda ti hombre ricu de Arimatea lá José, tobi de cani uzá né Jesús chiqué. 58Ne uyé be ra nuu Pilatu, yenaba be cuerpu sti Jesús laa, para bisenda tidxi ca xpinni gudii cuerpu que laabe. 59Ne ucuaa si be cuerpu que, bichenda be laa ti lari gueela nayá, 60ne gudixhe be laa ndaani ti ba' cubi ni maca gundaa be para laabe lu ti guie, ne biseegu be sti guie ngola ra puerta ba' que, para biree be ze be. 61Ne zuba María Magdalena ne sti María gaxha ra puerta ba' que. 62Udi'di si viernes que, bidxiña ca xaíque sti ca sacerdote ne ca fariseu ra nuu Pilatu, 63na ca rabi ca laabe: —Señor, cayetenala'dxi du ni uní' hombre rusiguii que dxi nabani, na raguionna gubidxa ziasa de lade gue'tu'. 64Nga runi canaba du lii guseendu tu chi gapa ra ba' que dede ganda chonna gubidxa quenquita gueeda ca discípulu stibe cuana ca xcuerpu be ne gabi ca binni biasa be de lade gue'tu'. Ne zacá jma rusi zusiguii cabe, que dxi bizulú ni. 65Para na Pilatu rabi laacabe: —Racá laicaa caadxi soldadu, lachiné, ne lauseegu chaahui ruaa ba' que, bia' ganda ti'. 66Oraque biree cabe uyé cabe ne biseegu dxiichi cabe ruaa ba' que ne bisaana cabe ca soldadu que gapa ni.

will be added

X\