SAN MATEO 22

1Bigueta gudixhe ru Jesús xcaadxi ejemplu para laacabe, na: 2—Enda runi mandar sti Dios zeda gaca casi ti rey ni guluu saa ra biluxe xquenda xheela xiiñi'. 3Bisenda tidxi be cani maca bini invitar be ñeeda, peru qué niná ca'. 4Bigueta rabi be xcaadxi xpinni be: “Laché lachitidxi cani bine invitar gueeda ra enda xheela ri' purti ma nuu irá ni, ma biite yuze ro' ne yuze huiini ni bisiruaa, ne ma nuu endaró.” 5Peru nin óraque qué nulabi ca stiidxa be, lágala biree tobi ze rañaa ne stobi ziutoo, 6ne xcaadxi de laaca gunaaze ca cani biseenda be que, udiñe ca dede biiti ca'. 7Ne ora gunna be xi bi'ni ca la? nabé bidxiichi be ne biseenda be ca soldadu stibe, yeguuti cani biiti xpinni be que ne bicaa gui be xquidxi ca'. 8Oraque na be rabi be ca xpinni be: “Dxandí ma nuu enda xheela ri para gaca', peru qué iquiiñe cani bine invitar para laani. 9Yanna, laché lu calle ne tutiica idxaaga tu lacuidxi laa para enda xheela ri'.” 10Para biree ca xpinni be que lu calle ne bitopa ca irá ni bidxaaga ca', cásica ni nacha'hui zaqueca ni nadxaba', ne zaqué de bidxá ra chi gaca enda xheela que de binni. 11Oraque biuu be cayuuya be irá ca' ne biiya be nuu ti hombre cadi nacu lari para enda xheela'. 12Para na be rabi be laa: “Amigu, ximodo biuu lu rarí pa cadi nacu lu lari para enda xheela'.” Peru qué nidxela hombre que xi niní'. 13Oraque rabi be cani canaguiizi': “Laundiibi ná be ne ñee be, ne laundaa laabe lu guelacahui ne raqué nga gu'na be dede go yaa be guidi ruaa be.” 14Ne óraque na Jesús: —Stale tu raca invitar peru huaxié' tu zanda guiuu. 15Oraque biree ca fariseu yení' stiidxa ca ximodo zanda usaba ca Jesús lu stiidxa'. 16Ne biseenda ca ca discípulu stica ne caadxi de ca judíu ni nuu pur Herodes ra nuu be, ne na ca rabi ca laabe: —Maistru, nanna du jneza runi lu' ne dxandí neza sti Dios rusiidi lu', ne qué rugá lu iruti tutiica naca. 17Gudxi laadu xi na lu de ndi': ñee jneza quixe nu ca impuestu sti César la? o co'. 18Peru ma nanna be cuyubi si ca usaba ca laabe, para rabi be laaca': —Xiñee cuyubi tu usaba tu naa, binni rusiguii ca'. 19Latané ti moneda ni riguixe tu impuestu ca, guuya'. Para bidii ca laabe ti denariu. 20Oraque rabi be laaca': —Tu cá lú ni. 21Para na ca': —César. Oraque na be: —Laudii César sti César, ne laudii Dios sti Dios. 22Ne ora bina diaga ca xi na be la? nabé bidxagayaa ca ne biree ca ze ca'. 23Dxi queca beeda caadxi saduceu, cani na qué riasa binni de lade gue'tu', ne unaba diidxa ca laabe, 24na ca': —Maistru, uní' Moisés pa chu' ti hombre ichaganá', ne gueda gati qué ñapa xiiñi la? naquiiñe ichaganá bi'chi be xheela be ne gapa xiiñi casi ñaca xiiñi be. 25Guyuu gadxe hombre lade du, irá ca bi'chi ca'. Bichaganá lugola que, ne guti qué ñapa xiiñi'. Para biaana né bi'chi be xheela be. 26Ne zaqueca bizaaca rabiropa que ne rabionna, dede ra birá cabe. 27Ne ra birá cabe que raqué guti gunaa que. 28Yanna, xi na lu'. Dxi ibani gue'tu ya'. Uná de lade gadxe que xheela gunaa que, purti irá cabe bichaganá cabe laa. 29Oraque na Jesús rabi laacabe: —Cuchee tu purti qué ganna tu xi na Xqui'chi Dios nin pabiá' nandxó' be. 30Purti dxi ibani gue'tu la? qué zachaganá cabe ne qué zucheela cabe sínuque zaca cabe casi ca ángel sti Dios ni nuu ibá'. 31Laatu canaba diidxa tu de enda ribani de lade gue'tu'. Qué xa huayuunda tu ra cá xi gudxi Dios laatu ra na: 32”Naa nga Dios sti Abraham, ne sti Isaac ne sti Jacob.” Ne dxi uní' Dios nga la? ma guti cabe para binni, peru para Dios nabani ru cabe. 33Ne ora bina diaga irá binni ni nuu raqué ni la? bidxagayaa ca modo cusiidi be que. 34Ora gunna ca fariseu ma biseegu Jesús ruaa ca saduceu la? uyuu ca tobi si ne uní' stiidxa ca'. 35Nuu ti maistru de ley lade ca' ne uyé ngue ra nuu be para gu'ya pa ganda usaba laabe. Ne na rabi laabe: 36—Maistru, uná nga mandamientu ni jma risaca lade idubi ley. 37Para na be rabi be laa: —”Gunaxhii Dios stiu' de idubi ladxidó' lo' ne idubi xhialma lu' ne idubi xquenda biaani lu'.” 38Nga nga primé mandamientu ne ni jma risaca. 39Ne rairopa ri zeda gaca casi primé ca: “Gunaxhii stobi cásica nadxii lu lii.” 40Iropa ca mandamientu ca nga xcu idubi naca ley ne ni bicaa ca profeta. 41Ne laga rí ru ca fariseu raqué 42rabi be laaca': —Yanna xi na tu de Cristu, tu dé za be. Para na ca': —Lade ca xiiñi David. 43Para na be rabi be laaca': —Pa zacá nga laani la? xiñee dxi bisiní' Espíritu Santu David, na Señor sti laabe ya'. Purti ndi nga ni uní' David óraque: 44Na Dios rabi Señor stinne': “Gurí cuee dede ora ma gudixhe dxie cani nanala'dxi lii xañee lu'.” 45Pa rabi David laabe Señor sti la? ximodo zanda gaca be xiiñi David ya'. 46Peru nin tobi de laaca qué nidxela xi niní', ne dede dxi que bidxibi ca ninaba diidxa ca laabe xiixa.

will be added

X\