SAN MATEO 10

1Oraque guridxi be doce discípulu stibe quene gudixhe be irá ndi ladxi ná ca': cuee ca binidxaba ni riguite ique binni, ne gusianda ca intiica enda huará ne yuuba'. 2Ndi nga lá doce apóstol que: primé ca Simón, ni rabi cabe Pedru, ne Andrés bi'chi', raqué ma nanda Jacobo xiiñi Zebedeu, ne Juan bi'chi'. 3Raqué ma nanda Felipe, ne Bartolomé, ne Tomás ne Mateu ni biquixe impuestu chiqué, ne Jacobo xiiñi Alfeu, ne Lebeu ni rabi cabe Tadeu, 4ne Simón ni guyuu lade ca cananista chiqué, ne Judas Iscariote ni bitoo Jesús que. 5Biseenda be idubi doce que, perú ora ma chi iree ca', na be rabi be laaca': — Cadi che tu ra nuu cani cadi judiu, ne cadi guiuu tu xquidxi ca samaritanu. 6Laché ra nuu cani za de Israel, cani rului' dendxu ni cananiti. 7Ne lagabi laaca ma zeda dxiña dxi guni mandar Dios. 8Lausianda cani napa lepra ne xcaadxi enda huará, ne lausibani cani ma gutí, ne lacuee ca binidxaba ni riguite binni. Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu. 9Cadi chiné tu oro, nin plata, nin cobre, 10ne cadi chiné tu ra idxá ni iquiiñe tu ladu ze tu, nin chiné tu chupa muda lari, nin chupa par guela guidi, nin bastón, purti naquiiñe udii cabe ni go ni canayuni dxiiña'. 11Ne guidxi tuca chu' tu, pa guidxi huiini o pa guidxi ro', lainaba diidxa ralidxi tuuxa ni nacha'hui', ne laguiaana ralidxi be de ora ma ixele tu de guidxi que. 12Ne ora guiuu tu ralidxi cabe, laugapa diuxi. 13Ne ora ma nuu tu raqué, lacuu ndaaya yoo que, ne pa acá cabe nacha'hui ne laatu la? ziaana ndaaya stitu ndaani yoo que, peru pa co' la? zabigueta ni luguiá tu. 14Pa nuu paxaraa qué na cabe guiaana tu, ne qué na cabe gucaa diaga cabe laatu la? laguiree de ra yoo que, o de guidxi que, ne ora ma chi iree tu de raqué la? laquibi ñee tu, ti cadi chiné tu nin yu sticabe. 15Ne gabe ca' laatu, dxi cuidxi Dios cuenta binni guidxilayú la? jma pe zusaba ná be ca binni guidxi que, que ca binni Sodoma ne Gomorra. 16Cuseenda laatu casi ñaca nuseenda dendxu lade gueu'. Nga runi lagataná casi nexhená beenda'. Peru laca lagaca nadó' casi nadó' paloma. 17Laguuya gá laatu ne ca binni que purti ziné ca laatu ra nuu ca justicia stica ni nuu ndaani yu'du ne zaguiñe ca laatu raqué. 18Zuchiña cabe laatu ra nuu ca gobernador ne ra nuu rey purti xpinne laatu, ne zacá laca zanda güi tu stiidxa nezalú cani cadi za de Israel. 19Ne ora uchiña cabe laatu raqué la? cadi chu' tu xizaa xi ini' tu nezalú cabe o xi gabi tu laacabe. Purti ora ma zuhuaa tu nezalú cabe la? zadxela tu xi ini' tu, 20purti cadi laadi tu chi ini' tu sínuque Espiritu sti Bixhoze tu ni nuu ibá' nga che de ruaa tu. 21Zadxiña dxi ñeca bi'chi cabe zului' cabe para gati', ne zaqueca zului' bixhoze cabe laacabe, ne laca ziuu tu guiasa luguiá bixhoze ne gului' bixhoze para gati'. 22Zaca nanala'dxi cabe laatu purti xpinne laatu. Perú cani qué ixhacala'dxi dede dxi iluxe irá ni la? zalá. 23Pa iladxi cabe laatu ndaani ti guidxi la? laché sti guidxi purti gabe ca' laatu neca guni tu zacá, ca'ru iluxe tidi tu irá guidxi sti Israel dxi ibigueta Hombre Biseenda Dios. 24Qué risaca ni caziidi jma que maistru sti', ne zaqueca qué risaca mozo jma que xpixuaana'. 25Nga runi cadi quiche ruaa ni caziidi pa guni cabe laa ni runi ca cabe maistru sti'. Pa gabi cabe xpixuaana ti yoo binidxaba la? irá cani nuu né laa ndaani yoo que laca zabi cabe ni laa. 26Nga runi cadi idxibi tu laacabe, purti ziuu dxiihuinni irá ni ye'gu lú yanna, ne zaqueca ziuu dxiganna binni irá ni ga'chi'. 27Ni gabe laatu naga'chi',laatu lainí' ni nezalú binni, ne ni usiide laatu xadiaga si tu la? laqui'ba ique yoo ne laini' ni reciu. 28Ne cadi idxibi tu cani ruuti cuerpu si, purti quézanda guuti cabe alma, sinuque laidxibi ni zanda unitilú alma ne cuerpu ndaani gabiá. 29Laaca tu nanna tu ridoo chupa mani huiini pur chupa domi', peru neca qué risaca carne, qué ziaba si tobi de laacame layú pa qué na Dios. 30Zaqueca ma bigaba be irá xixé guicha ique tu. 31Nga runi cadi idxibi tu, purti jma risaca tu que ca mani huiini'. 32Tutuca ini' xpinne laa nezalú binni la? laca zanié xpinne laa nezalú Bixhoze ni nuu iba'. 33Perú ni qué ná ini' pa xpinne laa nezalú binni la? laca qué zanié pa xpinne laa nezalú Bixhoze ni nuu ibá'. 34Cadi zácaxa tu zeda gune binni guidxilayú tobi si, purti cadi nga zeda gune sinuque casi ñaca zedaniá ti espada. 35Purti zeda ndaa saa hombre ne bixhoze, ne badu dxaapa ne jñaa, ne gunaa ne suegra. 36Ne ca binni lidxi pe hombre zaca nanala'dxi laa. 37Tu jma nadxii bixhoze o jñaa que naa la? qué zaquiiñe para xpinne', ne zaqueca tu jma nadxii xiiñi que naa la? qué zaquiiñe para xpinne'. 38Ne tu qué na gacaná ra gueda nanda naa la? qué zaquiiñe para xpinne'. 39Ni guyubi ilá xpida ndaani guidxilayú la? zuniti ni iba', perú ni guniti xpida pur naa guidxilayú la? zadxela ni ibá'. 40Tu uchagalú laatu la? casi ñaca nicaa naa, ne tu icaa naa la? casi ñaca nicaa ni biseenda naa. 41Pa nuu tuuxa uchagalú ni canayuí' stiidxa Dios purti Dios biseenda laa la? bia'ca quixe Dios ni canayuí' stiidxa que la? bia' queca quixe laabe. Ne pa nuu tobi ni ruchagalú tutuca ni nacha'hui la? bia'ca quixe Dios ni nacha'hui que la? bia' queca quixe laabe. 42Tutuca uchagalú tobi de ca xpinne ni jma nahuiini ri' ne gudii laabe neca ti vasu nisa purti xpinne laabe la? qué ziaana sin qué quixe Dios laa.

will be added

X\