SAN MARCOS 9

1Ne laca na Jesús rabi laacabe: —Gabe ca' laatu, nuu caadxi de cani nuu rarí qué zati dede qué guzulú guni mandar Dios ne enda nandxó' sti'. 2Gudi'di xhoopa gubidxa de ngue yené Jesús Pedru ne Jacobo ne Juan, ne idapa si cabe uyé cabe lu ti dani soo, ne raqué mala biiya cabe ma adxé modo bihuinni Jesús. 3Bizaani xhaba be ne uca ni naquichi bé, dede iruti binni guidxilayú nusiquichi lari bia' qué. 4Ne biiya ca cayuí' né Elías ne Moisés laabe diidxa'. 5Oraque na Pedru rabi laabe: —Maistru, aque galán nuu nu rarí nja'. ñee zaa ucuí du chonna ranchu huiini la? tobi para lii, tobi para Moisés ne stobi para Elías. 6Tantu cadxibi cabe dede nin qué ganna Pedru xi caní'. 7Ne óraque biseegu ti za laacabe ne ucuá ti ridxi lade za que: —Ndi nga xiiñe' ni nadxiee'. Laucaa diaga laabe. 8Oraqueca biiya dxí cabe peru ma qué ñuuya ru cabe iruti' sínuque Jesús si stubi. 9Ora ziyete cabe lu dani que, gudxi Jesús laacabe cadi g:ui né di cabe iruti de ni bi'ya cabe, sínuque cueza cabe guiasa si Hombre Biseenda Dios de lade gue'tu'. 10Ne nga runi gupa cabe ni lade si cabe, peru gunaba diidxa saa cabe ximodo nga na be guiasa be de lade gue'tu'. 11Oraque rabi cabe Jesús: —Xiñee na ca maistru de ley zeeda Elías ante gueeda ni nexhe guseenda Dios que ya'. 12Para na Jesús rabi laacabe: —Dxandí nexhe gueeda Elías primeru para quixhe chaahui irá cosa. Laga xi na lu Xqui'chi Dios de dxa Hombre ni nexhe guseenda Dios que ya'. ñee cadi na ni zadi'di ne ra naná ne zudxii deche binni laabe la? 13Peru naa rabe laatu ma beeda Elías ne bi'ni cabe laabe ni ucala'dxi cabe, casi cá lu Xqui'chi Dios guni cabe laabe. 14Oraque bigueta cabe ra nuu ca xcaadxi discípulu que ne biiya cabe rí binni laaca'. Ne laca nuu caadxi maistru de ley raqué cacaa yu né ca ca discípulu. 15Oraque pe ulee lú Jesús zeeda, ne nabé bidxagayaa ca binni que ora bi'ya ca laabe, ne yeuxooñe ca' yeugapa diuxi ca laabe. 16Para rabi be laaca': —Xi cayaca tu. 17Oraque na tobi de ca binni nuu raqué: —Maistru, zedaniá xiiñe ra nuu lu' purti riguite binidxaba laabe ne ma bisaana laabe mudu. 18Ratiica nuu be rugaze binidxaba ca laabe layú ne riree bupu ruaa be ne rixidxi laya be. Ne zacá jma rusi cará stipa stibe. Ma gunaba ca discípulu stiu' nibee ca binidxaba ca de laabe peru qué ñanda. 19Para na Jesús rabi laacabe: —¡Aque qué runi cre tu xa, binni ca'! Dede padxí naquiiñe guiaana nia laatu ne gune huantar laatu ya'. Latané hombre huiini ca rarí'. 20Para bedané cabe hombre huiini que. Casi bi'ya binidxaba que Jesús, bi'ni pur bidii ataque laabe ne biaba be layú, canatubi be ne caree bupu ruaa be. 21Oraque na Jesús rabi bixhoze be: —Padxí ti raca be sicarí ya'. Para na bixhoze be: —Dede dxi nahuiini be. 22Stale tiru riguu binidxaba ca laabe lu gui ne ndaani nisa para guuti laabe. Nga runi pa zanda gu'nu xiixa la? biá laadu ne ucané laadu. 23Para na Jesús rabi laabe: —Naa la? zanda. Lii si nga pa zanda guni cre lu', purti gasti ni nagana para cani runi cre. 24Oraque bicaa be ridxi: —Rune cre, Señor. Ucané naa gune cre jma. 25Ne ora bi'ya Jesús nabé ma cabí zisi binni la? udinde né binidxaba que, na: —Biree, binidxaba mudu ne diaga cuaata'. Naa cayabe lii iree lu'. Bisaana hombre huiini ri' ne ma cadi ibigueta rou' luguiá be. 26Oraque bicaa binidxaba que ridxi ne bi'ni pur bidii sti ataque laabe ne biree ze', bisaana laabe casi gue'tu'. Ne stale de ca binni nuu raqué na ma guti be. 27Peru guluu ná Jesús ná be, undisa laabe ne bizuhuaa be. 28Oraque biuu Jesús ndaani ti yoo, laa si ne ca discípulu sti', ne raqué na ca rabi ca laabe: —Xiñee laadu qué ñanda nibee du binidxaba ca pue. 29Para rabi be laaca': —Purti para ganda cuee cabe binidxaba casi nga la? naquiiñe guiaana cabe sin go cabe ne iní' né cabe Dios. 30Biree si cabe de raqué udi'di cabe Galilea ne qué na Jesús ganna iruti pa nuu raqué. 31Purti cusiidi be ca discípulu stibe, ne cayabi be laaca': —Naa nga Hombre Biseenda Dios. Zutoo cabe naa lu binni guidxilayú, ne zuuti ca naa, peru lu chonna gubidxa de biiti ca naa la? zabane'. 32Peru qué ñene ca laabe ne bidxibi ca ninaba diidxa ca'. 33Yendá cabe ndaani guidxi Capernaum ne biuu si cabe ndaani yoo, unaba diidxa Jesús laacabe xi diidxa zeda yui' cabe neza. 34Peru nin tobi cabe qué niní' cabe, purti ora zeeda cabe neza la? cacaa yu cabe tuu nga jma risaca lade cabe. 35Oraque gurí Jesús ne guridxi ca discípulu sti', ne na rabi laaca': —Pa nuu tu racala'dxi isaca jma la? cadi guyubi usisaca cabe laa, sínuque usisaca laacabe, ne gaca casi jmozo cabe. 36Oraque ucuaa Jesús ti ba'du', bizuhuaa galahui de laacabe ne ucuaa ba'du que guluu ndaani ná' ne na rabi laacabe: 37—Tutiica gacané ti ba'du casi ba'du ri' pur naa la? casi ñaca cayuni ni naa, ne tu guni ni naa la? cayuni ni, ni biseenda naa. 38Oraque na Juan rabi laabe: —Maistru, bidu'ya du ti hombre cuzeete lá lu ra cabee binidxaba de binni, peru bicueeza du laabe purti cadi canazá né be laanu. 39Para na Jesús rabi laacabe: —Xiñee canaucueeza tu laabe, purti ni cayuni milagru ra uzeete la'ya la? qué zanda ucaa lú naa. 40Ne tu cadi cucaa lú laanu la? nuu pur laanu. 41Tutiica udii laatu neca ti vasu nisa si purti xpinni Cristu laatu la? gabe ca' laatu, qué ziaana ngue sin guiaxa. 42Tutiica guni pur uchee tobi de cani nahuiini ni runi cre naa la? jma galán ñaca para laa nugaanda cabe ti guie dani ro' yanni ne nundaa cabe laa ndaani nisadó'. 43Pa nuu xiixa ni cuchiiña ná lu lii icoou', ne pur laani chi uchee lu la? bixele ca de laani, purti cadi tan naná zaca para lii uniti lu ni peru gapu enda nabani ni qué zaluxe, bia' nga naná zaca para lii gapu ni racala'dxu que ne cheu' gabiá ra cayaca bele ni qué zanda gyui'. 44Raqué qué zará enda nayuudxu' ne qué zyui' gui. 45Ne zaqueca pa nuu ra cuchiiña ñeeu lii cheu', peru zucheeu pa cheu' raqué la? cadi cheu' diou' purti cadi tan naná zaca para lii guiaanu sin cheu' raqué peru gapu enda nabani ni qué zaluxe, bia' nga naná zaca para lii cheu' ra racala'dxu cheu' que, ne cheu' gabiá ra cayaca bele ni qué zanda gyuí'. 46Raqué qué zará enda nayuudxu' ne qué zyui' gui. 47Zaqueca pa nuu xiixa ni ruuya lu' ne ruquiinde ni lii gu'nu ni cadi jneza la? bixele de laani purti cadi tan naná zaca para lii ixele lu de laani peru chu' lu ra runi mandar Dios, bia' nga naná zaca para lii pa uchee lu pur laani ne cheu' gabiá ra cayaca bele ni qué zanda gyui'. 48Raqué qué zará enda nayuudxu' ne qué ziuu dxi gyui' gui. 49Purti ziaba enda naná luguiá binni casi riaba zidi endaró. 50Zidi la? riquiiñe ora naxí, peru pa niniti enda naxí stini la? ximodo nixí ni sti tiru. Zacaca laatu, lagaca casi zidi ni naxí, ti ganda iquiiñe tu ndaani guidxilayú. Ne laibani sin enda ridinde.

will be added

X\