SAN MARCOS 8

1Nabé stale binni bidxiña ra nuu Jesús ca dxi que, ne qué gapa ca ni go ca'. Para guridxi be ca discípulu stibe, ne na be rabi be laaca': 2—Caya'ya ca binni ri' purti ma chonna gubidxa nuu né cabe naa rarí' ne qué gapa cabe ni go cabe. 3Pa useenda laacabe chibí' cabe sin go cabe la? qué zapa cabe stipa para sa cabe purti nuu caadxi de laacabe beeda de zitu. 4Oraque na ca discípulu que rabi laabe: —Peru paraa idxela ni go cabe rarí ya'. Iruti nabeza rarí'. 5Para rabi be laaca': —Panda ga pan napa tu ya'. Oraque na ca': —Gadxe. 6Para gudxi be ca binni que cui ca layú, ne ucuaa be ca pan que, bidii be diuxquixe Dios ne gundaa be cani, bidii be cani ca discípulu stibe que qui'zi ca cani lú ca binni que. 7Laca napa cabe chupa chonna benda. Para bidii Jesús diuxquixe Dios ne gudxi laacabe qui'zi cabe cani. 8Irá binni que gudó dede ra bidxá, ne bidopa ru xcadxe dxumi de nandahui ni biaana. 9Bia' tapa mil gudó dxi que. Ne óraque gudxi Jesús laacabe ma zanda che cabe. 10Ne laa biuu né ca discípulu sti ndaani canuá para ze ca neza Dalmanuta. 11Ne raqué bidxiña ca fariseu ra nuu be ne bizulú cacaa yu né ca laabe. Gunaba ca laabe guluí' be laaca ti seña xaibá' ti gu'ya ca pa dxandí nandxó' be. Uní' ca zaqué purti cuyubi ca usaba ca laabe. 12Oraque ucuala'dxi be tobi ne na be: —Xiñee canaba ca binni ri gu'ya ca seña. Gabe ca' laatu, nin ru sti seña qué zudiee laatu, rabi be laaca' ne biree be ze be, 13bisaana be laaca'. Biuu be ndaani canuá que sti tiru para ze be cherica nisa que. 14Biaanda niné ca discípulu endaró, ti pan si ziné ca ndaani canuá que. 15Oraque na Jesús rabi laaca': —Laguuya gá qué chi cá sti ca fariseu ne sti Herodes laatu. Ricá ni runi cabe casi riaazi levadura cuba pan. 16Oraque na ca discípulu: —Cayabi be ndi laanu tisi qué ñedané nu pan. 17Peru nanna Jesús xi caní' cabe, para rabi laacabe: —Xiñee na tu qué gapa tu pan. De yanna ca'ru guiene tu ne ca'ru ganna tu la? ñee tan nada'gu xquenda biaani tu la? 18ñee qué ruuya tu ne lú tu ne qué runa diaga tu ne diaga tu la? ñee qué rietenala'dxi tu dxi udiize gaayu pan lu gaayu mil que la? Panda dxumi de nandahui bitopa tu. Para na ca': —Doce. 20Oraque rabi be laaca': “Laga dxi udiiize gadxe pan lu tapa mil que ya'. Panda dxumi bitopa tu. Para na ca': —Gadxe. 21Oraque rabi be laaca': —De yanna ca'ru guiene tu la? 22De raqué yendá cabe Betsaida. Ne bedané ca binni de raqué ti hombre nacheepa lú, ra nuu Jesús ne gunaba ca quixhe ná Jesús luguiá be. 23Para unaaze Jesús ná be biree né laabe de ndaani guidxi huiini que. Ne guxubi nisa xhinni lú be ne gudixhe ná luguiá be ne gunaba diidxa laabe pa ruuya be xiixa. 24Oraque biiya dxí be ne na be: —Ruuya binni peru ruuya laaca casi yaga zizá. 25Bigueta gudixhe ná Jesús lú be ne óraque ma biiya chaahui be ne bianda be. Ma ruuya be irá cosa naya'ni'. 26Para biseenda Jesús laabe chibí' be ne na rabi laabe: —Cadi guiuu lu ndaani guidxi ne cadi gabi lu ni iruti de raqué. 27Sti dxi biree Jesús ne ca discípulu sti' ze ca ca guidxi ni nuu neza Cesarea de Filipo. Ne neza ze cabe na Jesús rabi laacabe: —Tu na binni naa. 28Oraque na cabe: —Caadxi na lii nga Juan Bautista ne xcaadxi na Elías ne xcaadxi na tobi de ca profeta. 29Para rabi be laaca': —Laatu ya' tu na tu naa. Para na Pedru: —Lii nga Cristu. 30Peru gudxi be laaca cadi gabi ca ni iruti'. 31Oraque bizulú be bisiidi be laaca de ni chi aca ru be, na be rabi be laaca': —Naa nga Hombre Biseenda Dios. Zuniná cabe naa, ne zaree nanda ca xaíque sti guidxi ne ca xaíque sti ca sacerdote ne ca maistru de ley naa, ne zuuti ca naa. Peru zabane ra guionna gubidxa. 32Bisiá be diidxa xi irá chi aca be. Peru yené Pedru laabe ti ladu ne gudxi laabe cadi iní' be zaqué. 33Oraque bidxigueta lú be ne biiya dxí be ca discípulu stibe ne udinde né be Pedru, na be rabi be laa: —Bixele de naa, binidxaba', purti cadi de Dios zeeda ni cá ique lu ca sínuque de binni guidxilayú. 34Oraque guridxi be ca discípulu stibe ne ca binni que ne rabi be laaca': —Tu gacala'dxi gaca xpinne la? usiaanda laca laa, cadi lica guiá xpida, ne sa nanda naa. 35Purti tu gacala'dxi ulá xpida, zuniti ni. Peru tu uniti xpida pur naa ne pur stiidxa Dios la? zalá. 36Paraa iquiiñe ni binni pa guni ganar idubi naca guidxilayú peru guniti xhialma. 37O pagala zanda quixe binni saca ulá xhialma. 38Naa nga Hombre Biseenda Dios. Tu ituí lú iní' pa xpinne laa o ituí lú pur stiidxa' nezalú cani qué runi cre ne cani qué runi jneza la? naa laaca zatuí lua inié xpinne laa, dxi guendaniá enda nandxó' sti Bixhoze', ne ca ángel cha'hui'.

will be added

X\