SAN MARCOS 6

1Biree Jesús de raqué bigueta xquidxi, laa ne ca discípulu sti'. 2Ne dxi gunda dxi enda riziila'dxi que la? bizulú be bisiidi be ndaani yu'du'. Nabé bidxagayaa cani cucaa diaga laabe que ne na ca': — Paraa biziidi hombre ri irá ndi pue, ne paraa ulee irá enda biaani ni napa, ne irá milagru cayuni ri'. 3Lácaxa cadi dxa carpinteru xiiñi María que ndi', bi'chi Jacobo ne José ne Judas ne Simón. Ca biza'na be laca rarí nabeza ca'. Ne pur nga runi qué ñuni ere cabe Jesús. 4Peru óraque na Jesús rabi laacabe: — Stobi stobi lugar risaca profeta, peru ra qué risaca be nga ndaani xquidxi pe be ne ralidxi be ne lade binni lidxi be. 5Ne qué ñanda ñuni be nin ti milagru raqué jma que gudixhe ná si be luguiá caadxi binni huará ne bianda ca'. 6Ne bidxagayaa be purti qué ñuni cre ca binni que. De raqué uzá be irá ca guidxi huiini ni nuu gaxha neza que, canausiidi be. 7Ne guridxi be doce discípulu stibe que. Bizulú biseenda be laaca chupa chupa, ne gudixhe be ladxi ná ca cuee ca binidxaba de binni. 8Ne gudxi be laaca cadi chiné ca gasti ni iquiiñe ca neza sínuque bastón si, ne cadi naquiiñe chiné ca pan, nin ixhiapa, nin vueltu. 9Ne ucaa ñee ca guela guidi ne chiné ca ti muda lari si. 10Ne rabi be laaca': —Ora guíete tu ti ra yoo la? laguiaana raqué dede ora iree tu de guidxi que. 11Ne pa chu' paxaraa qué na cabe icaa cabe laatu nin ucaa diaga cabe laatu la? lairee de raqué ne laquibi ñee tu casi ti seña bichee cabe ra qué nina cabe nucaa diaga cabe laatu. Ne gabe ca' laatu, jma naná ziaba ná cabe para ca binni Sodoma ne Gomorra, dxi cuidxi Dios cuenta binni. 12Para biree ca discípulu que ze ca', yeusiidi ca binni naquiiñe usaana xpecadu. 13Ne laca ulee cabe stale binidxaba de binni, ne uxubi cabe aceite ladi binni ne bisianda cabe laaca'. 14Gunna rey Herodes irá ni, purti ma za'bi stiidxa Jesús idubi naca guidxi que, ne na: —Ma bibani Juan Bautista ne laabe nga Jesús ni cayanda cayuni irá enda nandxó' ca. 15Peru xcaadxi na: —Elias nga. Ne xcaadxi na: —Ti profeta casi cani uyuu chiqué nga. 16Peru ora bina diaga Herodes ni na cabe que la? na: —Juan nga, dxa ni bine mandar ugá cabe yanni que. Laabe nga ma bibani be. 17Uni' be zacá purti nanna be xi ma bi'ni be Juan. Gunaaze be laa ne bindiibi be laa ne biseguyoo be laa, runi Herodías xheela Felipe bi'chi be, purti ucuaa be Herodías casi xheela be. 18Bidxiichi be purti gudxi Juan laabe cadi jneza chu' né be xheela bi'chi be. 19Ne pur nga nabé uca nanala'dxi Herodías Juan ne ucala'dxi ñuuti laa peru qué ñanda. 20Qué nudii Herodes lugar ñuniná be Juan purti nanna nayá ladxidó' Juan ne nacha'hui', ne ridxibi Herodes Juan. Neca qué ñene be stale de ni uni' Juan, peru bicaa diaga be laa ne stale gana. 21Peru bidxiña dxi gunda bi'ni Herodías ni ucala'dxi que. Dxi lani xpidó' Herodes uca saa ne bi'ni Herodes ti endaró para ca xaíque ne ca capitán sti' ne para ca binni ni jma risaca de Galilea. 22Ne guyuu xiñi dxaapa Herodías ra cayó xhi cabe que, biyaa. Nabé uyuula'dxi Herodes ne cani cayó xhi ne laa que modo biyaa badu dxaapa que. Para na rabi laabe: — Unaba naa intiica acala'dxu ne zudiee ni lii. 23Ne bini jurar rey que udii laabe intiica inaba be, neca galaa de ra runi mandar. 24Oraque biree be uyé be ra nuu jñaa be ne rabi be laa: — Xi inaba laabe. Para na jñaa be: — Unaba laabe ique Juan Bautista. 25Oraqueca biuu be ra nuu rey que ne rabi be laa: —Racaladxe udiiu naa ique Juan Bautista ndaani ti bladu nagasi du'. 26Ucaná ladxidó' Herodes óraque peru qué ñanda ñabi be badu dxaapa que co' purti bina diaga cani zuba né be que bini jurar be zudii be badu dxaapa que intiisi acala'dxi'. 27Oraqueca biseenda be ti soldadu zicaa ique Juan. 28Para uyé soldadu que biuu ndaani lidxi guiiba', guxha ique Juan ne gudixhe ni ndaani bladu'. Bidii ni badu dxaapa que, de badu dxaapa que ma bidii ni jñaa. 29Ora gunna ca discípulu sti Juan ni uca que la? yecaa ca xcuerpu be para bicaachi ca'. 30Bigueta si ca apóstol sti Jesús ra nuu, ne byui' né si ca laabe xi irá bi'ni ca ne bisiidi ca la? 31rabi be laaca': — Yanna, chuu nu zitu huiini ra gasti binni para iziila'dxi nu caadxi. Purti ze zeeda binni ra nuu cabe, nin para go cabe gueta. 32Oraque biree Jesús ne ca discípulu que, biuu ca ndaani ti canuá ziyubi ca ti lugar ra qué guinni binni. 33Peru stale binni biiya ora ze cabe ne binibiá' ca Jesús. Para biree binni de irá guidxi neza que ziuxooñe ca ti uriá nisa que, ne yendá ca primeru para laacabe. 34Casi biete Jesús lu canuá que biiya ma rí stale binni raqué ne biá laacabe purti nuu cabe casi dendxu sin pastor. Para bizulú bisiidi laacabe stale cosa. 35Ora bi'ya ca discípulu stibe ma huadxí la? bidxiña ca ra nuu be ne rabi ca laabe: — Ma huadxí ndi' ne iruti binni nabeza cherí'. 36Gudxi ca binni ca ma bidxiña ora che ca', ti ganda che cabe ca guidxi huiini ne ca ranchu nuu gaxha ca, para sí cabe pan, purti qué gapa cabe ni go cabe. 37Peru na Jesús rabi laaca': —Laudii ni go cabe laatu. Para na ca': — Zanda xa chi sí du chupa gayuaa denariu pan para go cabe. 38Oraque na Jesús rabi laaca': —Panda ga pan napa tu ya'. Lachiguuya panda. Para yeguuya cabe ne óraque beeda cabe ne na cabe: — Gaayu pan ne chupa benda. 39Para gudxi Jesús ca binni que cui ca lu ca guixi nagá' ni nuu raqué, caadxi caadxi. 40Ne zaqué gurí cabe. Nuu ra zuba ti gayuaa ne nuu ra zuba cincuenta, dede birá cabe gurí cabe. 41Oraque ucuaa Jesús gaayu pan ne chupa benda que. Gundisa lú ibá' ne bidii diuxquixe Dios, para gundaa ca pan que bidii ca discípulu sti' qui'zi ca lú ca binni que. Ne zaqueca bi'ni be iropa benda que. 42Ne gudó irá binni que dede ra bidxá ca'. 43Ne bidxá doce dxumi de nandahui ni biaana lu pan ne lu benda que. 44Bia'si gaayu mil hombre gudó raqué. 45Biluxe si ngue la? uluu Jesús ca discípulu sti ndaani canuá que, sa niru gá ca lú be tidi ca nisa que che ca Betsaida, laga gabi be ca binni que ma che be. 46Biluxe si uní' né be ca binni que la? biree be ziní' né be Dios lu dani. 47Ne ora bixhinni ma nuu canuá sti ca discípulu que zitu de uriá nisa que, ma stubi si Jesús nuu ra nabidxi. 48Ne biiya nagana cayaca para laacabe chiné cabe canuá que purti cudxigueta bi laacabe. Nuxcanda que bidxiña Jesús laacabe, zeda za lu nisa ne ucala'dxi nidi'di lú cabe. 49Perú ora bi'ya cabe zizá be lu nisa la? zácaxa cabe cayuuya cabe tentación ne bicaa cabe ridxi. 50Purti irá cabe biiya cabe laabe ne bidxibi cabe. Peru óraque uní' né be laaca': 51— Naa ndi', cadi idxibi tu. "Para udxi'ba be ndaani canuá ra nuu cabe que ne oraqueca biaana dxi bi que. Nabé bidxagayaa cabe, 52purti ca'ru guiene cabe tu laabe, nin ne ma biiya cabe milagru ra bitale be ca pan que, purti nada'gu ru xquenda biaani cabe. 53Gudi'di cabe nisa que, yendá cabe Genesaret ne bindiibi cabe canuá que uriá nisa. 54Casi pe biete cabe lu canuá que binibiá' ca binni que Jesús. 55Para yetidxi ca irá binni neza que ma beeda be, ne bizulú bedané ca binni que stale binni huará lu luuna' ra nuu be. 56Ne ratiica guiiu be ndaani guidxi ro' o guidxi huiini' o ndaani ranchería, riguixhe cabe ca binni huará que lu calle ne rinaba cabe laabe udii be lugar neca ñee xhaba si be cana cani huará que. Ne bianda irá ni guda'na xhaba be que.

will be added

X\