SAN MARCOS 2

1Gudi'di si xhupa xhonna gubidxa, bigueta biuu Jesús ndaani guidxi Capernaum sti tiru. Ne ora gunna cabe ma nuu be yoo la? 2oraqueca bidopa stale binni ra nuu be que, dede bidxii ra puerta yoo que, ne bizulú byui' né be laaca stiidxa Dios. 3Oraque beeda tapa hombre, nua ca ti hombre nexhe lu ti luuna, ma guti galaa. 4Perú qué ñanda ñuu né cabe laabe ra nuu Jesús pur irá binni que. Para gudxi'ba cabe ique yoo ne ulee cabe caadxi teja ique yoo que, neza ra nuu Jesús, ne raqué undete cabe luuna ra nexhe hombre que. 5Ora bi'ya Jesús pabia' napa cabe fe laa la? na rabi binni huará que: —Ma bine perdonar xpecadu lu, xiiñe'. 6Zuba caadxi maistru de ley raqué, ne caní' ique ca': 7— Xiñee caní' hombre ri sicarí pue. Cayuni be laabe Dios, purti iruti ru zanda guni perdonar pecadu jma que tobi lucha Dios. 8Peru maca nanna Jesús xi cani' ique cabe para na rabi laacabe: —Xiñee cani' ique tu zacá. 9Xii nga jma qué igana gabe laabe, ma bine perdonar xpecadu be la? o gabe laabe guiasa be, indisa be jluuna be ne sa be. 10Peru para ganna tu naa nga Hombre Biseenda Dios ne zanda gune perdonar pecadu ndaani guidxilayú la? laguuya ni chi gune ri'. Ne óraque rabi be ni huará que: 11— Biasa, undisa jluuna lu', ma zanda chibí' lu'. 12Oraque biasa hombre huará que, undisa jluuna', ne biree de raqué nezalú irá binni que. Nabé bidxagayaa ca binni que ne bisisaca ca Dios ne na ca': — Qué huayuu dxi idu'ya du xiixa sicarí'. 13Bigueta uyé Jesús uriá nisa ro' que sti tiru ne uyé irá binni ra nuu be para bisiidi be laaca'. 14De raqué biree be ze be, ne biiya be zuba Leví xiiñi Alfeu ruaa mexa ra ritixe binni impuestu, para rabi be laa: — Dananda naa. Oraqueca biasa zinanda laabe. 15Ne bini invitar Leví laabe chi to né be laa ralidxi ne laca uyé stale de cani ruquixe impuestu ne xcaadxi ni qué rulabi ley. Gurí né ca laabe ne ca discípulu stibe ruaa mexa', purti nabé stale de laaca nanda ca laabe. 16Peru ora bi'ya ca fariseu ne cani naca maistru de ley, cayó né be ca binni que tobi si la? na ca rabi ca ca discipulu stibe: — Xiñee zuba né jmaistru tu ca malu ni ruquixe impuestu ne cani qué rulabi ley. 17Ne bina diaga Jesús ni uní' cabe que para na rabi laacabe: — Cadi caquiiñe cani nazaaca doctor sínuque cani huará. Cadi zeda yube cani nacha'hui, sínuque cani cuchee. 18Ti dxi biaana ca discípulu sti Juan Bautista ne sti ca fariseu sin go, casi runi ca stale tiru. Ne dxi que uyé caadxi binni ra nuu Jesús, ne na ca rabi ca laabe: — Xiñee ca discípulu sti Juan ne sti ca fariseu riaana ca sin go ca' peru ca discípulu stiu' co'. 19Oraque na be rabi be laaca': —Lácaxa ziaana cani nuu ra ti enda xheela sin go laga nuu novio lade ca'. Laga nuu né novio que laacabe la? qué zanda guiaana cabe sin go cabe. 20Peru ora ma biaaxha cabe novio que la? óraque huaxa ziaana cabe sin go cabe. 21Iruti rucaa remiendu tindaa lari cubi lu ti lari yooxho'. Purti pa ñuni cabe zacá la? casi ña'ri ni nidopa lari cubi que ne jma rusi xirooba nireza ni óraque. 22Ne zaqueca iruti rigaa vinu cubi ndaani ti guidi yooxho'. Purti pa ñuni cabe ni la? Nicheza vinu cubi que guidi yooxho que. Ne óraque ninitilú vinu que ne laca ninitilú guidi que. Nga runi naquiiñe ca' cabe vinu cubi ndaani ti guidi cubi. 23Ti dxi enda riziila'dxi zididi né Jesús ca discípulu sti ndaani ti ñaa. Ne óraque bizulú ca discípulu que undadi ca zee ra zidi'di ca'. 24Para na caadxi fariseu rabi laabe: —Xiñee cayuni ca discípulu stiu' ni cadi jneza guni binni dxi enda riziila'dxi'. 25Perú rabi be laaca': —Ñee qué huayuunda tu xi bi'ni David dxi gasti ni go né ca xpinni, ne ma candaana ca la? 26Biuu be ndaani yu'du sti Dios dxi naca Abiatar sacerdote gola, ne ucuaa be ca pan ni ma uyuu ndaaya'. Gudó be ne bidii be cani canazá né be que, gudó ca' ñeca na ley ca sacerdote si zanda go cani, perú laacabe gudó cabe ni. 27Ne laca na Jesús rabi laaca': — Uca dxi enda riziila'dxi para binni, cadi binni uca para laani. 28Naa nga Hombre Biseenda Dios ne zanda gabe binni xii nga jneza guni dxi enda riziila'dxi'.

will be added

X\