SAN LUCAS 5

1Ti tiru nuu Jesús uriá ti nisa ro' rabi cabe Genesaret, bidxiña stale binni ra nuu be dede calaa saa ca'. Irá ca racaladxi ca guna diaga ca stiidxa Dios. 2Biiya be zuhuaa chupa canuá uriá nisa que, iruti nuu ndaani purti biree ca guuze que caguiibi ca starraya ca'. 3Para biuu be ndaani tobi de laani bia'si pe ndaani canuá sti Simón. Ne gudxi be laa utuuba huiini ni de ruaa nisa, ne gurí be ndaani canuá que. Dede raqué bisiidi be ca binni que. 4Biluxe bisiidi si be ca binni que, rabi be Simón: —Yene canuá stiu' ra zia', ne lausaba starraya tu para inaaze tu benda. 5Oraque na Simón: —Maistru, idubi gueela bini du dxiiña ne gasti qué nina'ze du, peru yáquexa lii caya'bu laadu guni du ni la? chi usaba du starraya du. 6Ora bisaba cabe starraya cabe bidxá tipa ni de benda dede careza ni. 7Para guridxi cabe xcaadxi xcompañeru cabe ni nuu ndaani sti canuá, gueda acané ca laacabe. Oraque beeda ca ngue ne bichá tipa cabe iropa canuá que de bilá ñaazi cani. 8Ora bi'ya Simón Pedru ni, bizuxibi xañee Jesús ne na: — Bixele de naa, Señor, purti naca tobi hombre nabé ruchee. 9Uní' be zacá purti cadxagayaa be de cayaca diti be pur irá benda que, ne cadi laasi be, sínuque ne ca xcaadxi ni nuu né laabe raqué. 10Lade cabe zeeda Jacobo ne Juan, ca xiiñi Zebedeu, tobi si runi né ca Simón dxiiña'. Peru na Jesús rabi Simón: — Cadi idxibi lu'. Dede yanadxí cásica rinaaze lu benda, zacaca zeda neu stale binni ra nuaa'. 11Ulee si cabe ca canuá que lu yuxi, bisaana cabe irá ni raqué, zinanda cabe Jesús. 12Ra canazá Jesús ndaani tobi de ca guidxi que, bidxiña ti hombre huará napa lepra laabe, bizuxibi xañee be dede gudixhe ique layú ne na rabi laabe: — Señor, pa na lu la? zanda usianda lu naa. 13Oraque udixhe ná be luguiá' ne rabi be laa: —Zusianda lii, ne mápeca bianda lu'. Nisi pe binitilú lepra que óraque. 14Ne rabi be laa: — Qué chi tidxi lu ni iruti'. Xi si ni rabe lii la? uyé ra yu'du ti gu'ya sacerdote lii ne bidii ofrenda ni na Moisés udii cani guianda para ganna binni ma bianda lu'. 15Peru ze dxi jma rusi zireeche stiidxa Jesús, ne reeda stale binni, reeda ucaa diaga ca laabe, ne para usianda be laaca'. 16Peru gatigá rixele be de laaca' rie be ndaani gui'xhi' riní' né be Dios. 17Ti dxi ra cusiidi Jesús zuba caadxi fariseu ne caadxi maistru de ley ni beeda de idubi Galilea ne de Judea ne de Jerusalén. Ne cahuinni enda nandxó' sti Dios luguiá be ra cusianda be binni. 18Raqué nuu be bedané cabe ti hombre nexhe lu luuna', ma guti galaa, ne ucala'dxi cabe niguu cabe laa ndaani yoo ra nuu be que, 19peru qué nidxela cabe paraa ñuu cabe purti dxá binni raqué. Para udxi'ba cabe ique yoo, ulee cabe caadxi teja, ne undete cabe laabe, idubi ne luuna que. Gudixhe cabe laabe galahui ca binni que, ra lú Jesús. 20Ora bi'ya Jesús pabia' napa cabe fe laa, na rabi ni huará que: —Ma bine perdonar ca xpecadu lu, xiiñe'. 21Dede óraque bizulú ca fariseu ne maistru de ley candaa ique né ca': —Tu hombre ri cayuni laa Dios pue. Dios si nga zanda guni perdonar binni, ne iruti ru'. 22Peru nanna dxichi Jesús xi caní' ique cabe, para na rabi laacabe: — Xiñee caní' ique tu zacá. 23Xii nga jma qué igana, gabe hombre ri ma uca perdonar la? o gabe laabe: "Biasa, uzá." 24Naa nga Hombre Biseenda Dios ne para ganna tu zanda gune perdonar xpecadu binni ndaani guidxilayú ri la? laguuya ni chi gune ri'. Ne óraque rabi be ni huará que: —Biasa, bitopa jluuna lu', ma zanda chibí' lu'. 25Oraqueca biasa hombre que nezalú irá cabe bitopa jluuna', zibí'. Ne idubi neza ziudii diuxquixe Dios. 26De irá cabe bidxagayaa cabe ne bisisaca cabe Dios. Dede cayaca diti cabe, na cabe: —Enda ridxagayaa nga ni bidu'ya nu yanadxí ri'. 27Uca si irá nga biree Jesús, ze'. Ra zidi'di be biiya be zuba Leví ra ruquixe impuestu. Para rabi be laa: —Dananda naa. 28Oraqueca biasa, bisaana irá ngue, zinanda laabe. 29Ne bidii Leví ti endaró laabe. Uyé stale ni ruquixe impuestu ne stale binni gurí né laacabe ruaa mexa que. 30Oraque bizulú ca fariseu ne ca jmaistru ca' caní' ca Jesús ne ca discípulu sti', na ca rabi ca ca discípulu que: — Xiñee ro né tu ca malu ni ruquixe impuestu ne cani qué rulabi ley. 31'Para na Jesús rabi laaca': — Cadi caquiiñe cani nazaaca doctor, sínuque cani huará. 32Cadi zeda yube cani nacha hui sínuque cani cuchee, para inaba ca perdón Dios ne uchaa ca xpia' ca'. 33Oraque na ca rabi ca laabe: —Xiñee ca discípulu sti Juan ne sti ca fariseu stale tiru riaana ca sin go ca' ne nabé riní' né ca Dios, peru ca stiu' la? qué lica ruchuugu ca lu endaró. 34Para rabi be laaca': — Lácaxa ñaana cani nuu ra enda xheela sin ño laga nuu novio lade ca'. 35Peru zadxiña dxi guiaaxha cabe novio. Oraque huaxa ziaana cabe sin go cabe. 36Ne laca gudixhe be ti ejemplu para laaca, na: — Lácaxa ñuu tu nicheza tindaa vestidu cubi, nucaa lu ti vestidu yooxho'. Purti pa ñuni cabe ni, nunitilú cabe vestidu cubi ne laca qué nidxaaga ni ucheza cabe que vestidu yooxho'. 37Ne zaqueca iruti rigaa vinu cubi ndaani guidi yooxho', purti pa ñuni cabe ni la? nicheza ni guidi que. Cásica ninitilú vinu que, zaqueca ninitilú guidi que. 38Nga runi naquiiñe idaa vinu cubi ndaani guidi cubi ti iropa ni guiaana ni bia'si. 39Ne zaqueca cani ma biaa gue vinu yooxho', qué zaná gue vinu cubi, purti zaná jma galán vinu yooxho'.

will be added

X\