SAN JUAN 9

1Ra zidi'di Jesús biiya tobi hombre nacheepa lú de gule. 2Ne na ca discípulu sti' rabi laa: —Maistru, tu bichee para gule be zacá pue, laabe la? o bixhoze be o jñaa be. 3Para rabi be laaca': —Cadi purti bichee cabe, sínuque gule be zacá para ihuinni xhiiña Dios luguiá be. 4Naquiiñe gune xhiiña ni biseenda naa laga ca'ru ixhinni. Purti ma caxhinni, ne óraque ma iruti zanda guni dxiiña'. 5Laga nuaa ndaani guidxilayú la? naca casi biaani para binni guidxilayú. 6Biluxe uní' si be nga la? bichá xhinni be layú ne bi'ni be beñe ne nisa xhinni que, ne uxubi be ni lú ni nacheepa lú que. 7Ne rabi be laa: —Yetibi lú lu' ndaani tanque lá Siloé. Ni riní' lá que la? “Ni Biseenda cabe”. Para biree hombre que, yetibi lú, ne ora bigueta ma riná. 8Oraque na ca xpecinu be ne cani bi'ya laabe dxi nacheepa lú be que: —ñee cadi ndi nga ni ribí rinaba guna que la? 9Caadxi binni na: —Laabe. Ne xcaadxi na: —Ruluí' laabe. Oraque na be: —Naa ndi'. 10Para rabi cabe laabe: —Ximodo bixele lú lu'. 11Oraque na be: —Dxa hombre lá Jesús que bi'ni beñe ne uxubi ni lua' ne gudxi naa chi tibe lua ndaani tanque Siloé. Uyaa ne udibe lua' ne ma rinaya'. 12—Paraa nuu be ya', na ca binni que. —Qué ganna dia', rabi be laaca'. 13Para yené ca laabe ra nuu ca fariseu. 14Dxi bi'ni Jesús beñe ne bixhele lú be que la? uca ni ti dxi enda riziila'dxi. 15Bigueta unaba diidxa ca fariseu laabe ximodo bixele lú be. Para na be: —Uxubi be beñe lua ne gudibe lua ne ma rinaya'. 16Oraque na caadxi de ca fariseu que: —Cadi dxandí Dios biseenda hombre ca purti qué rapa be dxi enda riziila'dxi'. Ne xcaadxi na: —Ximodo zanda guni tobi ni cuchee né Dios milagru ni runi be ca ya'. Ne zaqué ma qué ñuu cabe tobi si. 17Bigueta unaba diidxa cabe ni bianda lú que: —Lii ya', xi ra'bu de ni bixhele lú lu ca. Para na hombre que: —Rabe profeta laabe. 18Peru qué ñuni cre ca judíu pa dxandí gule be nacheepa lú be ne yanna ma riná be. Para bisenda caa cabe bixhoze be ne jñaa be. 19Ne rabi cabe laaca': —ñee ndi nga xiiñi tu ni na tu nacheepa lú gule la? Ximodo riná be yanna. 20Para na ca': —Nanna du ndi nga xiiñi du, ne nanna du nacheepa lú be gule be, 21peru ximodo bianda be ne tu bixhele lú be la? nga qué ganna du. Ma huaniisi be, ma zanda iní' be. Lainaba diidxa laabe. 22Uní' bixhoze be ne jñaa be zaqué ti cadxibi ca ca judíu, purti maca uní' stiidxa ca judíu ni iní' Jesús nga Cristu la? maca zibee ca laa de lade ca'. 23Ngue runi na bixhoze be ne jñaa be: “Ma huaniisi be, lainaba diidxa laabe.” 24Bigueta guridxi cabe hombre ni bianda lú que ne rabi cabe laa: —Pa ridxibi lu Dios la? gudxi laadu ni dxandí'. Purti laadu nanna du binni ruchee hombre ca. 25Para na rabi laacabe: —Pa binni ruchee laabe la? nga qué ganna dia'. Ni nanna sia' la? chiqué nacheepa lua', yanna ma rinaya'. 26Bigueta rabi cabe laa: —Xi bi'ni be para bixhele be lú lu'. 27Para na rabi laacabe: —Ma gudxe ni laatu, peru qué niná tu nucaa diaga tu. Xiñee racala'dxi ru tu guna diaga tu ni. O laca racala'dxi tu aca tu discípulu stibe la? 28Oraque gudinde né cabe laa ne rabi cabe laa: —Lii nga discípulu stibe. Laadu la? discípulu sti Moisés laadu. 29Nanna du uní' né Dios Moisés, peru nga la? nin qué ganna du padé za. 30Para na hombre que rabi laacabe: —Nga nga enda ridxagayaa ca. Laatu nin qué ganna tu padé za be peru bixhele be lua'. 31Nanna nu qué rucaa diaga Dios binni ruchee peru cani ridxibi laabe ne runi ni na be la? rucaa diaga be laaca'. 32Dede dxi bizulú guidxilayú, qué huayuu tu uxhele lú tobi ni gale nacheepa lú. 33Ne pa ñaca cadi de Dios zeeda hombre que la? qué ñanda ñuni gasti'. 34Oraque rabi cabe laa: —Lii lade binni qué runi ni na ley gule lu' ne yanna racala'dxu usiidi lu laadu la? Para ucuaa cabe laa ulee cabe laa lade cabe. 35Gunna Jesús guladxi ca judíu laabe de lade ca', para yeyubi laabe, ne ora bidxela laabe, na rabi laabe: —ñee runi cre lu Xiiñi Dios la? 36Oraque na be: —Tu laabe ya', Señor, para gune cre laabe. 37Para na Jesús: —Ma biiya lu laabe, ne laabe nga caní' né be lii. 38—Rune cre, Señor, na be. Ne bizuxibi be xañee Jesús. 39Ne óraque na Jesús: —Benda ndaani guidxilayú ri para usihuinne dxi'ba donda ique binni ne para ixele xquenda biaani cani qué riene, ne icahui xquenda biaani cani na riene, casi ñaca nicheepa lú ca'. 40Ora bina diaga caadxi fariseu ni nuu raqué ni uní' Jesús que la? na ca': —ñee nou' laca nacheepa lú du la? 41Oraque na Jesús rabi laaca': —Pa ñaca nacheepa lú tu la? qué nigui'ba donda ique tu, peru ziaana stonda tu luguiá tu, purti na tu ruuya tu.

will be added

X\