SAN JUAN 11

1Chiqué huará tobi hombre lá Lázaro, biza'na María ne Marta. Nabeza ca ndaani guidxi Betania. 2María, biza'na Lázaro ni huará que la? nga nga dxa gunaa ni bichá nisa rindá' naxhi ñee Señor ne bicuiidxi né ni guicha ique que. 3Bisenda tidxi iropa benda cabe Jesús huará Lázaro, xhamigu. 4Ora gunna Jesús ni la? na: —Enda huará ni napa be ca la? cadi para guuti, sínuque para ihuinni enda nandxó' sti Dios ne sti Xiiñi'. 5Nadxii Jesús guionna cabe, Marta ne María ne Lázaro. 6Ne ora gunna be huará Lázaro, biaana be xhupa gubidxa ra nuu be que. 7De raqué rabi be ca discípulu stibe: —Chuu Judea sti tiru. 8Para na ca rabi ca laabe: —Maistru, ñee cadi cayuuya lu nase si ngue ucala'dxi ca judíu nuchá ca guie lii ne yanna nou' ibigueta lu raqué sti tiru la? 9Oraque rabi be laaca': —ñee cadi doce hora napa ti dxi la? Ni rizá ridxí la? qué rirenda gasti ñee purti naya'ni ra zizá. 10Peru ni rizá huaxhinni la? rirenda xiixa ñee, purti gasti biaani ra nuu. 11Gudxi si be ngue laaca' para na be: —Nisiaasi Lázaro xhamigu nu peru ma chaa', chi ucuaane laa. 12Oraque na ca discípulu stibe: —Pa nisiaasi be la? Señor, zianda be. 13Peru qué ñene ca xi na be. Zácaxa ca cuzeete be nisiaasi si Lázaro, tihua cuzeete be ma guti. 14Oraque bisiá be stiidxa be, rabi be laaca': —Ma guti Lázaro. 15Para laatu la? jma galán qué guinne raqué ti guni cre tu. Yanna chuu canu ra nuu be. 16Oraque na Tomás, ni rabi cabe Cuachi que, rabi ca xcaadxi discípulu que: —Chuu, chu né laabe ti gati né nu laabe. 17Ora yendá be Betania ma raca tapa gubidxa de ga'chi Lázaro. 18Cadi zitu de Jerusalén riaana Betania, bia' chonna kilómetru si. 19Stale judíu yeizaca Marta ne María ra guti biza'na ca'. 20Casi gunna Marta ma zidxiña be, biree yechagalú laabe, peru María biaana yoo. 21Ne na Marta rabi laabe: —Pa ñuu lu rarí la? Señor, qué ñati di bizana'. 22Peru laca nanna irá ni inaba lu lu Dios la? zudii lii. 23Para rabi be laa: —Zabani biza'na lu'. 24Oraque na Marta: —Nanna zabani be dxi iluxe guidxilayú, ra ibani irá binni. 25Para na be: —Naa nga rusibane gue'tu', ne naa nga rudiee enda nabani. Tu guni cre naa la? neca ma guti zabani, 26ne cani nabani ru ne runi cre naa la? qué ziuu dxi gati'. Ru'nu cre nga la? 27—Rune cre, Señor, na Marta. “Ma bine cre lii nga Cristu, Xiiñi Dios ni beeda ndaani guidxilayú ri'. 28Ngue si uní' ne biree yení' xa diaga María benda, na: —Nuu Maistru rarica', racala'dxi iní' né lii. 29Oraqueca biasa uxooñe María, uyé ra nuu Jesús. 30Ca'ru guiuu Jesús ndaani guidxi, nuu ru ra yechagalú Marta laa que. 31Ora bi'ya ca judíu ni yeganna laacabe ralidxi cabe que biree uxooñe María ze la? yenanda ca laabe, na ca ziguuna be ra ba'. 32Peru casi yendá be ra nuu Jesús biiya be laa, bizuxibi be xa ñee, ne na be: —Señor, pa ñuu lu rarí la? qué ñati di bizana'. 33Ora bi'ya Jesús cayuuna be, laabe ne ca judíu zinanda laabe que, uyuu yuuba ladxidó' dede uca diti, 34ne na: —Paraa gudixhe tu Lázaro. —Chuu, gu'yu', Señor, na cabe. 35Biina Jesús óraque. 36Para na ca judíu: —Laguuya pabiá' gunaxhii be Lázaro. 37Peru xcaadxi de laaca na: —Bixhele be lú ni nacheepa lú. ñee qué ñanda ñuni be xiixa para qué ñati Lázaro la? 38Bigueta uyuu yuuba ladxidó' be, ne uyé be ra ba' que. Casi ti cueva ni, ye'gu ti guie ruaa ni. 39—Lacuee guie ca ruaa ni, na be. Para na Marta, biza'na ni guti que: —Ma rindá' yuudxu be, Señor, purti ma napa be tapa gubidxa. 40Oraque na Jesús rabi laa: —ñee cadi ma gudxe lii pa guni cre lu zuuyu pabiá' nandxó' Dios la? 41Ne óraque ulee cabe guie ye'gu ruaa ba' que. Undisa lú Jesús ibá', ne na: —Rudiee diuxquixe lii, Bixhoze', purti bicaa dia'gu naa. 42Nanna ca' qué riaana dxiu de ucaa dia'gu naa, peru unié sicarí pur ca binni ni rí rarí' ti guni cre ca lii biseenda lu naa. 43Biluxe uní' né si be Bixhoze be, bicaa be ridxi: —¡Lázaro, gudá' rarí'! 44Oraque biree gue'tu que, renda lari ná ne ñee, ne ye'gu ti lari lú. Para na Jesús: —Lauxhedxe laabe, ne laudii lugar che be. 45Stale de ca judíu ni yené María que, bini cre ca Jesús ra bi'ya ca ni guca que. 46Peru xcaadxi de laacabe yetidxi ca fariseu xi bi'ni be. 47Oraque gupa ca xaíque sti ca sacerdote ne ca fariseu ti junta, purti laaca nga justicia sti ca judíu, ne na ca': —Xi guni nu pue. Biaa irá ni cayuni hombre ca. 48Pa usaana nu laabe zacasi la? irá binni zuni cre laabe. Ne zeeda ca romanu zeda unitilú ca yu'du ro stinu ne xquidxi nu. 49Lade cabe zeeda Caifás, naca sacerdote gola iza que. Ne óraque na rabi laacabe: —Laatu qué ganna tu gasti'. 50Qué riene tu pa jma galán para laanu gati tobi jlugar irá nu, ti cadi initilú irá binni xquidxi nu la? 51Peru cadi de laasi be uní' be ni. Purti naca be sacerdote gola iza que, nga runi bisiní' Dios laabe ni nexhe gaca'. Ne ni nexhe gaca nga gati Jesús pur ca binni xquidxi. 52Ne cadi pur ca binni xquidxi si sínuque para guni irá xixé xiiñi Dios ni reeche ndase tobi si. 53Ne dede dxi que uní' stiidxa cabe guuti cabe laabe. 54Ngue runi ma qué ñanda nizá be lade ca judíu. Biree be de raqué uyé be ti guidxi huiini lá Efraín, dxaaga ni ti gui'xhi', ne raqué biaana né be ca discípulu stibe. 55Ma zeda yuba pascua. Stale binni de ca guidxi huiini que uyé Jerusalén, yeguni ca casi cá lu ley stica guni ca para guia ladxidó' ca', laga ca'ru uzulú saa que. 56Biyubi cabe Jesús raqué, ne ora nuu cabe ndaani yu'du ro', na cabe: —Xi na tu. Nagana pa gueeda be saa ri nja'. 57Maca bizaabi ca xaíque sti ca sacerdote ne ca fariseu diidxa', tutiica gu'ya laabe la? chi tidxi laaca para inaaze ca laabe.

will be added

X\