HECHOS 7

1Oraque na sacerdote gola que rabi laabe: — Nee dxandí irá ni na cabe ca la? 2Para na be: —Biche ne bixhoze ca', laucaa diaga naa. Dios ni nandxó' uni' né bixhoze gola nu Abraham dxi nuu ru Mesopotamia ante chi ndeza Harán. 3Na Dios rabi laabe: "Biree de xquidxi lu', bisaana ca lisaa lu'. Uyé, naa ma ulué lii una guidxi guiaanu'." 4Para biree be xquidxi ca caldeu, yendeza be Harán. Raqué guti bixhoze be, para bedané Dios laabe guidxi ra nabeza tu yanna ri'. 5Chiqué qué nudii Dios laabe nin tindaa layú rarí', nin bia' ra nuzuhuaa ñee be. Peru bidii stiidxa laabe zudii ni laabe ne ca xiiñi be, neca ca'ru gapa be xiiñi be chiqué. 6Ne laca gudxi Dios laabe zaza renda ca xiiñi be xquidxi binni tapa gayuaa iza ne zapa ca binni que laaca de esclavu ne zuniná laaca'. 7Peru na Dios rabi laabe: "Zusaba naya cani gapa laacabe de esclavu ne óraque zaree cabe para gueda usisaca cabe naa rarí'." 8Bidii stiidxa Dios laabe zaca be xpinni, laabe ne ca xiiñi be, ne na rabi laabe: "Guluu seña stinne irá hombre gale lade familia stiu' para ihuinni ma xpinne laatu." nga runi dxi gule Isaac uluu be seña sti Dios laa lu xhono gubidxa. Zaqueca bini né Isaac Jacob xiiñi', ne zaqueca bini né Jacob idubi doce xiiñi', cani beda gaca bixhoze gola irá nu. 9Gupa ca xcaadxi xiiñi Jacob que envidia José bi'chi ca', ne bitoo ca laabe lu binni ze Egipto, peru nuu né Dios laabe. 10Bilá laabe de irá ni beeda luguiá be. Ucané laabe para biaba be Faraón, rey de Egipto, ne para biiya Faraón pabia' riene be. Ne bi'ni laabe gobernador de Egipto ne bisaana irá ni napa ralidxi lu ná be. 11Ca dxi que guca ti gubiña idubi guidxi Egipto ne Canaán. Nabé nagana guca ni para ca binni que, ne qué nidxela ca bixhoze gola nu ni ño ca'. 12Peru ora gunna Jacob nuu xuba Egipto la? biseenda laacabe yesí cabe xuba'. 13Ne ra iropa tiru uyé cabe gudxi José' laacabe tu laa, ne gunna Faraón tu familia José. 14Para bisenda caá José bixhoze ne idubi familia sti', bia' setenta y cinco ca'. 15Zacá nga yebí' Jacob Egipto ne raqué guti'. Ne raqueca guti ca bixhoze gola nu. 16Udi'di ru stale iza para ulee cabe laaca yeucaachi cabe laaca Siquem ndaani ba' ni uzí' Abraham lu ca xiiñi Hamor. 17Peru dxi ma cadxiña dxi gaca ni bidii stiidxa Dios Abraham gaca que la? bidale ca binni Israel ndaani guidxi Egipto, 18dede ra beda tí sti rey ni qué runibiá' J osé. 19üdxite rey que ca binni laanu ne bininá laacabe ne bicaa laacabe usa'bi cabe ca xiiñi huiini cabe para gati ca'. 20Ca dxi que beda gale Moisés ne uyuula'dxi Dios laa. Gupa bixhoze be ne jñaa be laabe ralidxi ca chonna beeu. 21Peru dxi ma qué ñanda nucaachi ca laabe la? ulee ca laabe, ne ucuaa xiiñi Faraón laabe, bisiniisi laabe casi xiiñi'. 22Ne biziidi be irá ni nanna ca binni Egipto. Nabé bihuinni pabia' nuu xpiaani be pur ni uní' be ne pur ni bi'ni be. 23Dxi ma napa be cuarenta añu bilui'la'dxi be chi ganna be ca binni xquidxi be, ca israelita. 24Ne ra ziganna be laaca biiya be caguiñe ti egipciu tobi de laaca'. Biuu be ucané be binni xquidxi be gudiñe be egipciu que dede ra biiti be laa. 25Zácaxa be ñeñe ca binni xquidxi be ma chi iquiiñe Dios laabe para ulá laaca', peru qué ñeñe di ca'. 26Sti dxi que yendá be ra cadinde chupa de ca binni xquidxi be. Ucala'dxi be nuchiá be laaca', rabi be laaca': "Hombre ca', xiñee ndi cayuniná saa tu laatu. Laca bi'chi tu." 27Oraque bilaa ná ni caguiñe stobi que laabe ne na: "Tu gudixhe lii gacu xaíque stidu para ga'bu laadu cadi jneza cayuni du. 28O racala'dxu guuti lu naa casi biiti lu dxa egipciu que neegue la?" 29Ora bina diaga be xi na hombre que, biree be de Egipto, yendeza be xquidxi binni. Uleza be Madián ne raqué gupa be chupa xiiñi be. 30Udi'di cuarenta añu de ngue, ti dxi nuu be ndaani ti gui'xhi cue' dani Sinaí, mala biiya be cayaca bele lu ti yaga. Tihua ti ángel biete raqué. 31Bidxagayaa be ora bi'ya be ni, ne bidxiña be para gu'ya be xii ni. Oraque uní' né Dios laabe, 32na rabi laabe: "Naa nga Dios sti ca bixhoze gola lu', Dios sti Abraham ne sti Isaac ne sti Jacob." Bidxibi be dede guca diti be ne qué nina be nindisa lú be. 33Ne na Dios rabi laabe: "Ulee xquela guidi lu' purti zuhuaa lu nezaluá'. 34Ma biiya pabia' cayacaná ca xpinne ni nuu Egipto ne bina diaga cayuuna cabe. Nga runi ma biete para ula'ya laacabe. Yanna gudá' useenda lii cheu' Egipto." 35Chiqué bidxii deche cabe Moisés rabi cabe laa: "Tu gudixhe lii gacu xaíque stidu para ga'bu laadu cadi jneza cayuni du." Peru laape be gudixhe Dios de xaíque stica' para bilá be laaca', ne gucané ángel que bi'ni be ni, dxa ángel ni uní' né laabe lu yaga que. 36Bi'ni be milagru ne seña ndaani guidxi Egipto ne lu Nisadó' Xiñá' para ulee be laaca de ndaani guidxi que. Ne laca laabe bi'ni be milagru ra uzá né be laaca cuarenta añu ndaani gui'xhi'. 37Ne laca laabe nga gudxi be ca binni Israel chiqué zañdisa Dios ti profeta de lade ca casi undisa laabe, ne gudxi be laaca ucaa diaga ca profeta que. 38Ne dxi bidxiña irá ca binni que ndaani gui'xhi', ne laabe nuu be raqué. Ne laabe nga uní' né dxa ángel que lu dani Sinaí para uní' né be ca bixhoze gola nu. Ne laabe ucuaa be ca diidxa sti enda nabani ne bisaana be cani para laanu. 39Peru nin ne irá nga, qué niná ca bixhoze gola nu nucaa diaga laabe, laga bidxií deche ca laabe, ne nisi cá ique ca ibigueta ca Egipto. 40Ne ti tiru bisaana Moisés laacabe caadxi, para rabi cabe Aarón: "Biza' caadxi bidó' sa niru lú nu, purti ulee si Moisés laanu Egipto. Yanna qué ganna nu xi guca be." 41Oraque bi'ni cabe ti yuze huiini ne biiti cabe mani bisiga'de cabe laa. Bieche né cabe ni biza' cabe que. 42Peru bixele Dios de laacabe. Bisaana laacabe guni adorar cabe ca luceru ni nuu iba', casi bicaa ca profeta lu gui'chi ra na Dios: Binni Israel ca', lácaxa biiti tu mani para nusiga'de tu naa idubi cuarenta añu uzá tu ndaani gui'xhi que. 43Laga yené tu ca bidó' ni biza' tu para uzuxibi tu xa ñee.Yené tu lidxi Moloc ne luceru sti Refán de dios stitu. Nga runi zabee laatu de xquidxi tu, chi ulaa laatu cherica Babilonia. 44Uzá né ca bixhoze gola nu carpa ra gupa ca ca guie ra cá ca mandamientu. Biza' cabe carpa que casi gudxi Dios Moisés cha ni. Biluí' Dios laabe ximodo. 45Laca yené cabe ni dxi uzá niru Josué lú cabe para biuu cabe guidxi bidii Dios laacabe que. Peru para biuu cabe raqué uladxi Dios ca bini nabeza raqué. Ne zacá bi'ni cabe dede dxi beda tí rey David. 46Gunaxhii Dios laabe ne ucala'dxi be nucuí be xhiu'du Dios sti Jacob, 47peru qué ñanda. Salomón ru' beda ucuí ni. 48Peru qué ribeza Dios ni nandxó' ndaani yu'du ni ucuí binni, casi uní' ti profeta ni na Dios: 49Rune mandar ibá' ne guidxilayú,casi ñaca zuba ibá' ne naguixhe ñee guidxilayú. Xi clase ndi yoo na tu ucuí tu para naa pue. O paraa nga na tu quixhe chaahui tu para iziiladxe'. 50Ñee cadi naa bine irá xixé ni la? 51Peru laatu la? na Esteban rabi laacabe, — naguidxi ladxidó' to, casi binni ni qué runibiá' Dios, ne qué riná tu ucaa diaga tu stiidxa Dios. Rindee tu ca bixhoze gola tu purti nisi rucaa lú tu Espíritu Santu casi bi'ni ca'. 52Uná de ca profeta ni qué nizabi nanda ca bixhoze gola tu ya'. Biiti cabe cani gudxi laacabe zuseenda Dios tobi ni nacha'hui'. Nga guca dxi ca'ru gueeda be. Yanna ma beeda be ne laatu bitoo to laabe ne biiti tu laabe. 53Bidii ca ángel ley sti Dios laatu peru qué runi tu ni na ni. 54Ora bina diaga cabe ni na Esteban que, gudó di laacabe dede gudó yaa cabe guidi ruaa cabe, tantu bidxiichi né cabe Esteban. 55Peru dxá ladxidó' Esteban de Espíritu Santu biiya dxi ibá'. biiya enda nandxó' sti Dios ne biiya zuhuaa Jesús cue' Dios. 56Para na: —Cayuuya zuxele ibá' ne zuhuaa Hombre Biseenda Dios cue' Dios. 57Oraque irá cabe biseegu cabe diaga cabe ne bicaa cabe ridxi ne uyé cabe luguiá Esteban irá cabe. 58Ulee cabe laa de ndaani guidxi que, ne bisigapa cabe xhaba cabe ti hombre lá Saulo, para bicha cabe guie Esteban. 59Laga cuchá cabe guie laabe, na be: — Señor Jesús ucuaa espíritu stinne'. 60Ne bizuxibi be, bicaa be ridxi: — Señor cadi udxiiba lu donda ri luguiá cabe. Nga si uní' be, guti be.

will be added

X\