HECHOS 4

1Cayuí' né ru Pedru ne Juan ca binni que diidxa ora biuu ca sacerdote ne xaíque sti cani rapa ra yu'du ro', ne ca saduceu. 2Cadxiichi ca xiñee cusiidi cabe binni zabani gue'tu purti bibani Jesús. 3Ne unaaze ca laacabe biseguyoo ca laacabe. Ne biaana cabe raqué gueela que, purti ma huadxí ngue. 4Perú stale de cani bicaa diaga laacabe bini cre, bia' gaayu mil hombre sin igaba gunaa. 5Sti dxi que guca ti junta Jerusalén. Bidxiña ca xaíque sti guidxi que ne ca xaíque sti ca sacerdote ne ca maistru de ley, 6ne Anás sacerdote gola ne Caifás ne Juan ne Alejandru ne irá ca familia sti sacerdote gola. 7Para bisenda caá cabe Pedru ne Juan, bizuhuaa cabe laaca galahui' ne rabi cabe laaca': — Tu gudxi laatu guni tu ni cayuni tu ri' o tu biseenda laatu guni tu ni. 8Dxá ladxidó' Pedru de Espíritu Santu para na rabi laacabe: —Laucaa diaga, xaíque sti guidxi ne xaíque sti ca sacerdote. 9Yáquexa yanadxí canaba diidxa tu laadu ximodo ucané du hombre nachita ñee ri', o ximodo bianda be la? 10zabi du ni laatu para ganna tu, laatu ne idubi naca guidxi Israel. Jesucristu ni bicaa tu lu cruz que, undisa Dios laa de lade gue'tu', ne laabe nga bisianda be hombre zuhuaa lú tu ri'. 11Ni bi'ni tu Jesús ca zeda gaca casi ñaca nusa'bi tu ti guie ra cucuí tu yoo, ne nidxiña dxi ma guie que pe ninaaze yoo que. Purti yanna ma bidxiiba Dios laabe. 12Ne laasi be zanda ulá be laanu, purti iruti ru stobi ndaani guidxilayú ni huaguixhe Dios ulá binni, sínuque laasi be. 13Ora bi'ya cabe cadi cadxibi Pedru ne Juan para iní', ne nanna nda cabe huaxié' napa ca scuela ne iruti naca ca la? nabé bidxagayaa cabe. Ne bietenala'dxi cabe uzá né ca Jesús. 14Peru qué ñanda niní' cabe gasti' purti zuhuaa dxa hombre ni bianda que raqué. 15Oraque gudxi cabe laaca iree ca de raqué, para uní' stiidxa cabe laasi cabe, 16na cabe: —Xi guni né nu ca hombre ri pue, purti dxandí milagru ni bi'ni cabe ca, ne irá binni Jerusalén nanna ni. Qué zanda gabi nu cadi dxandí ni. 17Peru para ma cadi ireeche ru ni lade binni la? uchibi nu laacabe ti ma cadi lica uzeete ru cabe lá Jesús. 18Para uridxi cabe laaca sti tiru ne biinda cabe lú ca ma cadi usiidi ca stiidxa Jesús nin uzeete ca lá. 19Para na Pedru ne Juan rabi laacabe: —Laguuya si laatu pa jneza nezalú Dios uzu'ba du stiidxa tu ne cadi uzu'ba du stiidxa Dios. 20Purti qué zanda usaana du de güi du ni bidu'ya du ne ni bina diaga du. 21Bichibi si cabe laaca', bindaa cabe laaca purti qué ñanda ñuniná cabe laaca pur irá binni que. Irá cabe cusisaca cabe Dios pur ni guca que, 22purti ma napa hombre ni bianda que jma de cuarenta añu. 23Biree si Pedru ne Juan biyubi ca ra nuu ca xcaadxi de laaca que ne byuí' né cabe laaca xi na ca xaíque sti ca sacerdote ne ca xaíque sti guidxi. 24Ora bina diaga ca xi na cabe la? irá cabe tobi si uní' né cabe Dios na cabe: —Dios, lii runi mandar lu irá'. Lii bizá' lu ibá' ne guidxilayú ne nisadó' ne irá ni nuu ndaani cani. 25Ne laca lii uní' lu ra bisiní' Espíritu Santu David ni bi'ni xhiiña lu', ra na:Xiñee cayasa cani cadi judíu,caguixhe ca guni ca ni qué zanda guni ca'. 26Uyuu ca rey de guidxilayú tobi si,laaca ne ca xaíque sti ca guidxi,para bicaa lú ca Dios ne Cristu ni ulí be. 27Ne dxandí zacá pe nga uca ni ndaani guidxi ri'. Herodes ne Poncio Pilatu ne cani cadi judíu ne ca judíu, irá ca uca ca tobi si uyé ca luguiá Jesús Xiiñi lu ni nayá ladxidó', ni ulí lu que. 28Ne zacá bi'ni cabe irá ni maca gudixhe lu gaca'. 29Yanna, Señor, biiya modo racala'dxi cabe uchibi cabe laadu para guiaana dxi du, ne ucané laadu, cani cayuni xhiiña lu', para güi du stiidxa lu sin idxibi du. 30Ne laga cayuni du ni, lii gudixhe ná luguiá cani huará para guianda ca', ne ucané laadu guni du milagru ne seña pur enda nandxó' sti Jesús Xiiñi lu ni nayá ladxidó'. 31Ora biluxe uní' né cabe Dios, biniibi dxacha ra nuu cabe que ne bidxá ladxidó' cabe de Espíritu Santu ne jma rusi ma qué nidxibi cabe byuí' cabe stiidxa Dios. 32Stale binni ma runi cre Dios, ne irá ca nuu ca tobi si. Tobi si ni cani' ique cabe, tobi si ni racala'dxi cabe. Ne iruti cadi caní' sti si ni napa, sínuque sti irá cabe ni. 33Cadi cayaana dxi ca apóstol de güi né ca binni dxandí biiya ca ma bibani Señor Jesús, ne nabé cahuinni enda nandxó' sti Dios luguiá ca', ne caguu Dios ndaaya irá ca'. 34Nga runi nin tobi de laacabe qué ñaadxa gasti purti irá cani napa layú ne yoo bitoo cani ne bedané ca saca ni, 35gudixhe ca xa ñee ca apóstol para biaazi ni lu cada tobi bia' caquiiñe'. 36Lade cabe uyuu tobi lá José. Ulee lá ca apóstol laabe Bernabé. Stiidxa cabe rini' ni Tobi ni Rusieche'. Binni Chipre laabe, ne za be de Leví. 37Gupa be tindaa layú. Bitoo be ni ne bedané be saca ni, gudixhe be xa ñee ca apóstol.

will be added

X\