HECHOS 2

1Runi ca judíu ti saa, rabi cabe ni Pentecostés. Ne dxi biaba lani que nuu ca xpinni Cristu que tobi si lugar. 2Mala uxidxi biete xiixa de xaibá' casi ora rundubi ti bi yooxho'. Bidxá ni ndaani yoo ra nuu cabe que. 3Ne biiya cabe casi ludxi bele. Bireeche ni luguiá cada tobi de laacabe. 4Ne bidxá ladxidó' cabe de Espíritu Santu. Bizulú uní' cabe adxé adxé idioma casi bisiní' Espíritu Santu laacabe. 5Dxi uca ni la? nabeza caadxi binni Jerusalén, caadxi judíu ni beeda de adxé adxé guidxi, ne nabé rie ca yu'du'. 6Ora bina diaga ca ruidu que urí zisi ca ra rí ca xpinni Cristu que. Qué ganna ca xi cayaca purti cada tobi de laaca cayuna diaga diidxa gule né. 7Bidxagayaa ca ne uñaba diidxa saa ca na ca': — Ñee cadi binni Galilea irá binni ri la? 8Peru cayuna diaga nu diidxa guie né pe nu. Xii ndi cayaca pue. 9Ne cadi tobi si xquidxi cani nuu rarí'. Nuu binni Partía, binni Media ne binni Elam ne binni Mesopotamia ne binni Judea ne binni Capadocia ne binni Ponto ne binni Asia 10ne binni Frigia ne binni Panfilia ne binni Egipto ne binni África ni nabeza cherica de Cirene, ne laca nuu binni Roma. Caadxi de laaca judíu pe laaca casi laanu, ne xcaadxi la? cadi judíu peru ma rie yu'du stinu. 11Laca nuu binni Creta ne binni Arabia. Peru irá nu cayene nu ni cani' cabe ri' de irá enda nandxó' ni bi'ni Dios, purti cayuna diaga nu ni diidxa gule né pe nu. 12Cadxagayaa ca binni que, ne qué ganna ca xi cayaca. Cañaba diidxa saa cabe, na cabe: —Xii ndi cayaca pue. 13Peru nuu tu bi'ni burla, ma na naxudxi ca xpinni Cristu que. 14Oraque biasa Pedru bizuhuaa, laa ne sti once apóstol que, ne uní' ne gana, na: — Hombre de Judea ca', ne cani nabeza Jerusalén, laucaa diaga ni chi tidxe laatu ri'. 15Cadi naxudxi di ca binni ri' casi na tu ca, purti deru las nueve ndi', 16sínuque cayaca ni bicaa profeta Joel chiqué ra na: 17Na Dios: "Zadxiña dxi ucheeche Espíritu stinne luguiá stale binni.Zusinié ca xiñi gaana tu ne ca xiñi dxaapa tu, ne zuuya cani nahuiini xiixa casi ñaca lu bacaanda',ne zanié nia ca binni gola lu bacaanda'. 18Ca dxi que zucheeche Espíritu stinne luguiá cani runi xhiiña', hombre ne gunaa, ne zaní' ca ni gabe laaca'. 19Zune stale enda nandxó' ibá',ne zahuinni seña guidxilayú de rini ne bele, ne ziasa gu'xhu'. 20Zacahui lu gubidxa ne zaca beeu naxiñá rini dxi mayaca idxiña dxi udixhe Dios. Zaca stale cosa de enda ridxagayaa dxi que, ne zusihuinni Dios enda nandxó' sti'. 21Ne irá ni inaba gacané Dios laa la? zalá." 22Yanna laucaa diaga ni chi tidxe laatu ri', binni Israel ca'. Chi güe nia laatu stiidxa Jesús de Nazaret. Rihuinni Dios biseenda laabe purti laaca tu nanna tu ucané Dios laabe bi'ni be stale milagru ne cosa de enda ridxagayaa ne bisihuinni be seña nezalú tu. 23Maca nanna Dios xi chi aca be, ne laatu bi'ni tu ni gudixhe Dios gaca que. Unaaze tu laabe, bidii tu laabe ucaa ca binni malu laabe lu cruz. Ne zacá laatu biiti tu laabe. 24Peru bisibani Dios laabe, ulee laabe lu ná enda guti, purti qué ñanda ñaana né enda guti laabe. 25Ndi nga ni uní' David chiqué, ne casi ñaca Jesús caní' ni: Nanna dxi'che qué rusaana Dios naa. Nuu be para gacané be naa ti cadi chuaa xizaa. 26Nga runi bidxá ladxiduá' de enda nayeche' ne biree diidxa sicarú de ruaa'. Neca gate peru nanna dxi'che zandisa be naa. 27Purti qué zusaana be naa lade gue'tu', ne qué zudii be lugar guiu'dxu cuerpu sti Xiiñi be ni runi ni na be. 28Biluí' be naa neza enda nabani, ne nabé rieche purti nuu né be naa. 29Biche ca', irá nu nanna nu guti bixhoze gola nu David, ne bigaachi', ne nuu ru xpa' be rarí de yanna. 30Peru guca be profeta, ne biluí' Dios laabe ni chi gaca ru' ne bidii stiidxa laabe de lade xfamilia be zaree tobi ni cui de rey casi urí be. 31Ne casi ñaca biiya be ra bibani Cristu ne uní' be qué ziaana di lade gue'tu' ne qué ziu'dxu cuerpu sti'. 32Racá cuzeete be Jesús ni undisa Dios de lade gue'tu', ne laadu bidu'ya du guca ni. 33Undisa Dios laabe ne bicuí laabe cue' ne bidii laabe Espíritu Santu casi gudxi laabe zuni. Ne yanna ma biseenda be Espíritu Santu que rarí'. Nga nga ni cayuuya tu ne cayuna diaga tu ca. 34Purti qué nigui'ba David ibá', peru laa pe uní':Na Dios rabi Señor stinne':"Gurí cuee' 35dede ora ma gudixhe dxie cani nanala'dxi lii xa ñee lu'." 36Yanna laganna dxichi, binni Israel ca', Jesús ni bicaa tu lu cruz que nga ma bi'ni Dios xaíque sti irá', ne ma biluí' laanu laabe nga Cristu ni ulí que. 37Ora bina diaga cabe xi na Pedru, ucaná ladxidó' cabe ne rabi cabe Pedru ne xcaadxi apóstol que: —Yanna xi guni du ya', bichi ca'. 38Para na Pedru rabi laacabe: —Lainaba perdón Dios ne lachuu nisa para ihuinni ma xpinni Cristu laatu. Zacá zaca perdonar ni huachee tu ne zudii Dios laatu Espíritu Santu. 39Purti laatu nexhe icaa tu Espíritu Santu, laatu ne ca xiiñi tu ne irá ni nuu zitu, cani cuidxi Señor Dios stinu che ra nuu. 40Byuí' né ru Pedru laacabe stale diidxa ne bilidxe lacabe, ne na rabi laacabe: — Lauyubi ulá Dios laatu de lade ca binni nuu yanna ri', ti cadi initilú tu ra chi initilú cabe. 41Ne cani ucuaa stiidxa be la? uyuu nisa, ne bia' chonna mil binni bini ere Cristu dxi que. 42Ne irá cabe yenanda cabe ni bisiidi ca apóstol, ne uyuu cabe tobi si, tobi si uní' né cabe Dios, ne tobi si gudó cabe pan casi bisaana Señor guni cabe. 43Irá binni guidxi que bidxagayaa ra biiya irá milagru ne seña ni bi'ni ca apóstol pur enda nandxó' sti Dios. 44Tobi si uyuu irá cani bini cre Cristu ne tobi si gupa ca stica'. 45Bitoo cabe layú stícabe ne irá ni napa cabe ne biaazi ni lú irá cabe. Cada tobi gucuaa bia' caquiiñe'. 46Irá dxi rie cabe ra yu'du ro' ne de raqué riree cabe rito cabe gueta, caadxi caadxi ralidxi cada tobi. Tobi si nuu cabe ne nabé rieche cabe. Iruti nudxiiba laca laa, 47sínuque irá cabe bisisaca cabe Dios. Ne irá binni guidxi que uyuula'dxi modo cayuni cabe. Ze dxi jma rusi zidale cabe purti culá Señor stale binni ne irá ca cayuu ca lade cabe.

will be added

X\