2 TIMOTEO 4

1Zeeda Jesucristu casi rey para cuidxi cuenta irá binni. Nezalú be ne nezalú Dios cayabe lii 2g:ui lu stiidxa be. Byuí' ni ora tiisi, pa ruluí' zacaa cabe ni o neca ruluí' qué zacaa cabe ni. Bicuudxi laacabe, biluí' laacabe paraa cuchee cabe, ne bilidxe laacabe. Zacá bisiidi laacabe sin ixhacala'dxu'. 3Purti zadxiña dxi ma qué zaná cabe ucaa diaga cabe cani rusiidi ni dxandí', sínuque zuyubi cabe adxé adxé tu usiidi laacabe ni chu'la'dxi cabe. 4Zudxii deche cabe ni zeeda de Dios ne jma zacá ique cabe ni riguixhe binni. 5Peru lii, biiya qué chi utiixhi cabe i'cu', ne cadi ixhacala'dxi lu enda naná ni gueeda luguiá lu'. Bicaa ique g:ui lu stiidxa Cristu ne bi'ni irá ni bisaana Dios ladxi nou'. 6Ma nanna mayaca guuti cabe naa. Ma cadxiña xhiora'. 7Bine xhiiña Dios dede bia' ra gunda ti', qué nixele de ni rune cre. Casi ñaca bixooñe ne irá stipa stinne', ne yanna ma yendaya lu raya. 8Cabeza ti premiu naa saca bine xhiiña jneza. Zudii Señor ni naa dxi ganda dxi icaa ni. Laa huaxa juez ni runi jneza. Cadi para naa sia' napa be, sínuque ne para irá ni cá lú guiuba ganda dxi gueeda be purti nadxii laabe. 9Biyubi gueda guuyu naa nagueenda. 10Purti ma bisaana Demas naa. Jma cá ique ni nuu ndaani guidxilayú ri', ne ma ze Tesalónica. Crescente ze Galacia, ne Titu ze Dalmacia. 11Ma Lucas si nuu ne naa rarí'. Biyubi Marcu guedanéu ora gueedu', purti zanda acané naa lu xhiiña Dios. 12Ma ze Tíquico Efeso. Naa biseenda laa raqué. 13Dané xhamarra ni bisaana Troas, ralidxi Carpu, ora gueedu', ne ca libru stinne'. Ne qué chi usiaandu ca gui'chi stinne'. 14Nabé huayuniná Alejandru, herrero que, naa. Zuquixe Señor irá ni laabe. 15Biiya gá lii ne laabe, purti nabé huacaa lú be ni rusi'di nu. 16Primé tiru bichiña cabe naa ra nuu justicia iruti qué ñacané naa. Irá ca bisaana ca naa. Rinaba lu Dios cadi uquixe ni laacabe. 17Peru Señor huaxa qué nixele de naa ne ucané naa biree de raqué. Casi ñaca bilá naa de ruaa lion, ne zacá gunda yeg:ué stiidxa Cristu lade irá cani cadi judíu. 18Ne nanna zulá Señor naa de irá ni nadxaba', ne zapa chaahui naa dede idxiña dxi chiné naa ibá' ra runi mandar. Qué chu' dxi guiaana dxí nu de usisaca nu laabe. Amén. 19Bidii diuxi Prisca ne Aquila ne irá binni lidxi Onesíforo. 20Biaana Erasto ndaani guidxi Corinto. Ne Trófimo huará, bisaana laa Mileto. 21Biyubi gueedu ante ganda ca beeu nanda. Ucuaa stiuxi Eubulo, Pudente, Linu, Claudia, ne ca xcaadxi hermanu. 22Chu' né Señor Jesucristu lii ne cu' Dios ndaaya irá tu. Amén.

will be added

X\