San Mateo 8

1Iurë bietë Jesús lu dani, cantidá mënë zianaldë rall lë'ë më. 2Iurní guabi'guë tubi nguiu narac llu'u galguidzë naru'dzë ládi'. Bëzullíbill lu më. Répill: ―Dadë, si talë rac shtú'ul, nápël pudërë gunëáquël na; guëzunël ladia. 3Iurní Jesús bëdchi'bë më guia'a më guë́quëll nu guni'i më: ―Rac shtua'a, sunë́ ládil. Iurë lë'ë më guni'i zndë'ë, grë galguidzë ru'dzë bëac. 4Jesús repi: ―Bëquë́ diaguë, adë chu lu ruadí'dzëdi'il; nadë más guaguë'në presentar lu bëshuzi nu bëdë'ë tubi ofrendë lo quë narnibë'a Moisés të parë grë́të' mënë, guëdë'ë rall cuendë de quë lë́'ël bëáquël nu guc límpil de galguidzë shtë́nël. 5Iurë guatë́ Jesús guë'dchi Capernaun, tubi capitán rumanë guabí'guëll lu më nu bë́'nëll ruëguë. 6Répill lu Jesús: ―Dadë, shmuza rac llú'ull galguidzë llunguë. Nagá'all lidcha. Nalë́ quëhúnëll sufrir lu galguidzë. 7Jesús guni'i: ―Na tsahia parë gunëaca lë́'i'. 8Capitán bëquebi: ―Dadë, rúnëdi'i tucara tsal lidcha; adë chu nádia'a. Nadë más gunibë'a nu bëdë'ë tubsë di'dzë, iurní guëac shmuza. 9Mizmë na runa lo quë narni'i ra narnibë'a na, nu napa suldadë bajo ordë shtëna. Iurë rnia'a lu tubi suldadë, tsall; pues riall. Iurë rnia'a guídëll, pues lueguë rídëll. Iurë rnibë́'ahia tubi shmuza tsaguë́'nëll lo quë narac shtua'a, rzu'bë diáguëll shti'dza. 10Iurë Jesús bini di'dzë ni, nalë́ guasë́ ldu'u më. Guni'i më lu ra nazianaldë lë'ë më: ―Guldía rnia'a lu të, guëdubi naciuni Israel nunquë bëdza'guëlúdia'a tubi nguiu narialdí ldu'i shti'dza ziquë nguiu rë'. 11Rnia'a, cantidá mënë guëru'u rall de grë ladë shtë guë́'dchiliu. Guidë rall të parë subënú rall Abraham nu Isaac nu Jacob parë gaunú rall mënë ni catë rnibë'a Dios gube'e. 12Perë nanú mënë nabini shti'dzë më de quë guënibë'a më ziquë rëy; guëru'u rall tëchi fuërë catë nacahi. Nga'li gu'në rall nu guëchushí lai' rall. 13Iurní Jesús guní'i' lu capitán: ―Bëagzë́ lídchil; hia shmúzël bëac tal ziquë gualdí ldú'ul. Lë'ë muzë ni bëáqui' mizmë iurë ni. 14Jesús gua lidchi Pedro. Nga'li guná më naga'a suëgrë Pedro. Na'a ni rac shldi ru'bë. 15Iurní guna'zi më guia'a na'a. Lueguë bëru'u shldi. Iurní suëgrë Pedro guashtë́hi' nu bë́'ni' sirvë lu rai'. Bëdë́'ëi' nagáu rai'. 16Iurë gue'lë gu', be'dënú mënë zihani sa' rall lu Jesús. Be'dënú rall ra nanapë mëdzabë la'ni ldu'u rall; con tubsë di'dzë rgu më grë́të' ra mëdzabë. Nu zac bë'në më rumëdi grë́të' ra nanapë galguidzë. 17Zndë guzac parë gac cumplir lo quë nabëquë'ë muzë shtë Dios guahietë. Guni'i Isaías: “Lë'ë më bia'a më galguidzë shtë́na'a nu lë'ë më bia'a më grë́të' debilidá shtë́na'a”. 18Iurë guná Jesús cantidá mënë bëdëá rdondë catë zubë më, gunibë'a më parë tëdë ra shini gusë'dë më stubi tëchi nisë. 19Tubi mësë shtë lëy guabí'guëll lu Jesús nu répill: ―Mësë, rac shtua'a sënalda lë́'ël cualquier lugar ca tsal. 20Jesús bëquebi: ―Ra ma lachi napë cuevë shtë ma. Ra ma'ñi napë bëche'zë llicu hiaguë perë na, adë nápëdia'a catë guëcu'guë guëca aunquë nahia nguiu nabëshe'ldë Dios lu guë́'dchiliu. 21Stubi nguiu naguanaldë lë'ë Jesús repi lu më: ―Dadë, bëne'e sí, primërë tsaca'cha shtada, iurní gue'dë nalda lë́'ël. Gaca shmë́nël iurní. 22Jesús guni'i: ―Gude'e naldë na lueguë. Nanú mënë nadë rialdídi'i ldu'u shti'dza parë guëca'chi rall ra tëgulë. 23Iurní guatë́ Jesús la'ni barcu con ra shini gusë'dë më 24perë bëdchini mbë lu nisë. Nalë́ fuertë bëdchini mbë. Gutë́ zili nisë la'ni barcu. Jesús naga'si më. 25Iurní ra shini gusë'dë më guacua'ñi rai' lë'ë më nu repi rai': ―Dadë, bëlá lë'ë na'a. Aquë zátia'a iurne'. 26Lë'ë më guní'i' lu rai': ―¿Pëzielú nalë́ rdzëbë të? ¿Pë hia adë rialdídi'i ldu'u të na? Iurní guashtë́ më nu guni'i më guëc mbë nu guëc nisë ru'bë. Lueguë gurëdchí nisë. 27Hia ra nguiu naná zënú më, nalë́ bëdzëguëë' ldu'u rai'. Guasë́ ldu'u rai'. Guni'i rai': ―¿Chull më rë'? Rzu'bë diaguë mbë nu nisë shtí'dzi'. 28Iurë Jesús bëdchini stubi ladë rua' nisë, ladzë ra më gadareno, chupë nguiu bëru'u la'ni catë bëga'chi tëgulë. Guabi'guë rall lu më. Guërupë rall napë rall mëdzabë la'ni ldu'u rall. Nalë́ nadushë rall. Ni tubi adë chu ráquëdi'i rdëdë nezë catë nanú rall. 29Iurní guzublú gurushtiá rall fuertë: ―¿Pëzielú riutël con lë'ë na'a, Jesús shini Dios? ¿Gu bëdchínil ndë'ë parë guëzac zil lë'ë na'a antsë guëga'a tiempë? 30Zitu rëta' cantidá ra guchi. Quëháu ra ma gui'lli. 31Ra mëdzabë bë'në rall ruëguë lu Jesús; guni'i rall: ―Si talë guëgul lë'ë na'a la'ni ra nguiu rë', perë bëne'e permisi të guëdëu' na'a la'ni ra guchi. 32Iurní Jesús repi: ―Gulë gua. Lueguë bëru'u mëdzabë la'ni ra nguiu ni. Guatë́ rall la'ni guchi. Lueguë grë́të' ra guchi zia'a guëllu'në nasesë; gulaguë ra ma catë rlaguë guiu'u rua' nisë ru'bë. Guatë́ ma la'ni nisë. Bëlda'u nisë ra ma; lueguë guti ra ma. 33Hia naquëhapë guchi bëllu'në rall hashtë guë'dchi nu guzublú biadi'dzë rall lo quë naguc, nu shcuendë ra nguiu nagú mëdzabë la'ni ldu'u rai'. 34Iurní grë mënë shtë guë'dchi bëru'u rall; guagná rall catë quëbezë Jesús. Iurë guná rall lu më, bë'në rall ruëguë de quë guëru'u më ladzë rall.

will be added

X\