San Mateo 15

1Iurní bëldá fariseo nu ra mësë narlua'a lëy, guabi'guë rall lu Jesús. Ze'dë rall ciudá Jerusalén. Guna'bë di'dzë rall: 2―¿Pëzielú shini gusë́'dël adë rúnëdi'i rall cumplir custumbrë shtë ra shtadë guëlú hia'a? sino rau rall guetështildi sin quë riétidi'i guia'a rall. 3Perë Jesús guna'bë di'dzë: ―¿Pëzielú lë'ë të también adë rzu'bë diáguëdi'i të mandamientë shtë Dios? Mejurë zianaldë të custumbrë shtë të 4purquë Dios guni'i: “Gulë gapë rëspëti lu shtádël nu lu shní'al”. Nu guni'i Dios: “El quë nargué guëc shtádëll u guëc shní'all, napë quë zu rátill”. 5Perë lë'ë të rni'i të stubi cusë. Rni'i të: “Si talë guëni'i nguiu lu shtádëll u lu shní'all: Gáquëdi'i guna compañi lë'ë të purquë grë lo quë naniaca'a të de na, nahin ofrendë parë Dios”. 6Rni'i të cualquier nguiu narni'i zni, hiadë rquí'nidi'i guëdë'ë nguiu dumí ca'a shtádëll. Zni cagni'i të lasáquëdi'i mandamientë shtë Dios. Más tsanaldë të tëchi custumbrë shtë të. 7Na të falsë. Bien guni'i Isaías guahietë shcuendë të; bëquë́'ëi' lo quë naguni'i Dios zdë'ë: 8Ra mënë rë' rac shtu'u rall na nadë más con rua' rall perë ldu'u rall nalë́ zitu zuga'a parë na. 9Adë rlluí'idi'i ra cusë narunë rall iurë quëhunë rall adorar na. Enseñansë shtë rall nadë más nahin tubi mandadë shtë nguiu. 10Iurní guna'bë më ra mënë nu repi më: ―Gulë bëquë́ diaguë nu gulë tsasë́ lo quë narnia'a. 11Grë ra nariutë́ rua' nguiu, lëdë nídi'i rshí'nidi'i lë'ë nguiu. Más bien lo quë narru'u rua' nguiu, ze'din de la'ni ldu'u nguiu, ni sí rshi'nin ldu'u nguiu. 12Iurní ra shini gusë'dë më guna'bë di'dzë rai' lu Jesús: ―¿Pë adë nanël de quë ra fariseo bëldënú rall lë́'ël por di'dzë rë'? 13Perë Jesús repi: ―Cualquier plantë nabëcabnídi'i Shtada, më naquëbezë gube'e, guie'shi ni con grë shlu'chin. 14Adë gúnëdi'i të meter con lë'ë rall. Na rall ziquë ciegu nu rlua'a rall shti'dzë rall lu los de más ciegu. Si talë tubi ciegu guësëll sa'll, guërupë rall ldaguë rall la'ni guëru. 15Iurní Pedro repi: ―Biadi'dzë lu na'a pë runë cuntienë comparaciuni rë'. 16Jesús repi: ―¿Pë nu lë'ë të adë riasë́di'i të? ¿Pë na të ziquë los de más mënë? 17¿Pë adë rac bë́'adi'i të, grë́të' lo quë naráu mënë zia'a la'ni nguiu; despuësë rrú'uhin la'ni cuerpë? 18Perë lo quë narru'u rua' mënë, ze'dë de la'ni ldu'u nguiu. Ni sí, rshi'ni lë'ë nguiu lu Dios 19purquë la'ni ldu'u nguiu rru'u grë́të' cusë mal: mal llgabë, rguini rall sa'll; rquënú rall sa'll; nu napë nguiu zihani na'a nu napë na'a zihani nguiu; rbaa'në rall pë shtë mënë; nu ruadi'dzë rall bishi; nu rni'i rall didzabë cuntrë Dios. 20Grë ra cusë rë' rshi'ni ldu'u nguiu, perë parë gaul sin gúnëdi'il cumplir ra custumbrë ziquë guíbidi'il guiá'al, lëdë nídi'i narshi'ni ldu'u nguiu lu Dios. 21Jesús bëru'u lugar ni; zia'a më parë regiuni shtë Tiro nu Sidón. 22Tubi na'a më Cananea quëréldëll regiuni ni; bëdchíni' lu Jesús nu guní'ill fuertë: ―Dadë, llëbní David, bëga'a ldú'ul na. Lë'ë shtsa'pa nanú tubi mëdzabë la'ni ldú'ull. Nalë́ rzac zi shtsa'pa. 23Perë Jesús adë bëquébidi'i ni tubi di'dzë. Iurní ra shini gusë'dë më bëdchini rai' lu më nu bë'në rai' ruëguë lu më: ―Bë'në lo quë narna'bë na'a rë' të guziá'all purquë nalë́ cagní'ill nezë të́cha'a; ze'dë náldëll lë'ë hia'a. 24Iurní repi Jesús: ―Dios bëshe'ldë na nadë más parë guna sirvë ra më israelitë purquë na rall ziquë lli'li nabëniti lu Dios. 25Perë lë'ë na'a guabi'guë nu bëzullíbill lu më. Guní'ill: ―Dadë bë'në compañi na. 26Jesús repi: ―Nádi'i bien guëdchisúl guetështildi shtë ra shini mënë parë gau ra mbécu'në. 27Perë lë'ë na'a guni'i: ―Nia Dadë, perë ra mbécu'në nananú guëa' mellë, rau ma pedasë narru'u hia'ldë rua' llguë'në. 28Iurní Jesús repi: ―Nanë, llëru'bë na fe shtë́nël. Gaquin según rac shtú'ul. Mizmë iurní lë'ë shtsa'pë na'a bëac. 29Jesús bëru'u nga'li parë zia'a më rua' nisë ru'bë nalë Galilea. Lueguë güe'pi më lu tubi lumë nu guzubë më nga'li. 30Cantidá mënë bëdchini rall catë quëbezë më. Be'dënú rall cujë, ciegu, gu'pë, mancu, nu cantidá ra narac llu'u. Bëdchininú rall lë'ë narac llu'u lu Jesús. Lë'ë më bënëac më lë'ë rall. 31Nalë́ bëdzëguëë' ldu'u ra mënë iurë guná rall ra gu'pë biadi'dzë rall; ra mancu bëac rall, ra cujë bëabrí guzë́ rall, ra ciegu bëabrí guná rall. Ra mënë bë'në alabar Dios; guni'i rall llëru'bë na pudërë shtë Dios de Israel. 32Iurní guna'bë Jesús ra shini gusë'dë më nu repi më: ―Nalë́ rga'a ldua'a ra mënë rë' purquë hia guc tsunë dzë ze'dë naldë rall na. Nápëdi'i rall nagáu rall. Si talë guëshe'lda lë'ë rall lidchi rall sin quë gáudi'i rall, sca'a mbee'zë rall lu nezë. 33Ra shini gusë'dë më repi rai' iurní: ―¿Perë llallë gac guëdzelë dau parë blac zihani mënë? Lugar rë' ni tubi adë chu nádi'i. 34Jesús guna'bë di'dzë: ―¿Bëldá guetështildi napë të? Lë'ë rai' bëquebi rai': ―Gadchi guetështildi nu du'pë mbeldë mitu'në. 35Iurní gunibë'a më parë subë ra mënë lu guiu'u. 36Iurní guna'zi më guëzá gadchi guetështildi nu guna'zi më ra mbeldë. Bëdë'ë më graci lu Dios. Lueguë lë'ë më bëshullë mëhin. Bëdë'ë mëhin cua'a ra shini gusë'dë më. Hia lë'ë rai' gudi'dzë rai' parë ra mënë. 37Grë́të' ra mënë gudáu hashtë bielë rall. Despuësë gaulú gudáu rai', guadzë́ gadchi tëpë ra pedasë nabë'në subrë. 38Grë ra nagudáu na ra ziquë tapë mili nguiu sin nagábëdi'i na'a nilë ra llguë'në. 39Despuësë Jesús bë'në më despedir ra mënë. Iurní guatë́ më la'ni barcu parë zia'a më regiuni nalë Magdala.

will be added

X\