San Lucas 15

1Zihani mënë mal ziquë ra narunë cubrë impuestë nu ra pecadurë, be'dë bi'guë rall lu më parë guëquë́ diaguë rall shti'dzë më. 2Ra fariseo con mësë narlua'a lëy, guni'i rall cuntrë Jesús. Guni'i rall: ―Jesús na amigu shtënë ra pecadurë. Ria Jesús lidchi rall të gaull. 3Iurní Jesús guni'i comparaciuni rë' lu ra contrari shtë më: 4―Si talë nápël tubi gahiu'a lli'li perë guënítil tubsë ma, rsëá'nël los de más ra ma lachi parë tsatílil lë'ë ma naguniti hashtë guëdzélël lë'ë ma. 5Iurë guëdzélël lë'ë ma, quëdchíbël ma iénil nu nalë́ rquitë ldú'ul. 6Iurë nanul lídchil, guëná'bël amigu nu vëcini shtë́nël nu guëní'il lu rall: “Bë'në compañi na tantë rquitë ldua'a purquë bëdzela lë'ë ma naguniti”. 7Rnia'a lu të, na lëgrë lu gube'e iurë tubi mënë nanapë duldë, guëabrí ldú'ull con Dios, más lëgrë quë noventa y nueve mënë za'quë nanadë rquí'nidi'i guëabrí ldu'u rall con Dios. 8’Gulë bëquë́ diaguë stubi comparaciuni. Tubi na'a nápëll chi'i munedë bëdchichi nalasac. Si talë guënítill tubsë munedë, ¿pë gúnëll? Rquëguí'ill llni lintërnë. Rldú'bëll guëdubi la'ni hiu'u. Rguílill bien hashtë guëdzélëll dumí. 9Iurë bëdzélëll dumí, guëná'bëll vëcini nu amigu shtë́nëll; rní'ill: “Bë'në compañi na purquë hia bëdzela munedë naguniti nu rquitë ldua'a”. 10Manërë ni rquitë ldu'u ra ianglë iurë tubi mënë nanapë duldë, guëabrí ldú'ull con Dios. 11’Guzac tubi nguiu napë chupë llgá'ni'. 12El quë namás nabi'chi guní'ill lu shtádëll: “Dadë, rac shtua'a guëné'el herenci narunë tucarë cahia”. Iurní gudi'dzë shtadë ra sultërë herenci shtë́hi'. Bëdë'ë mënë ni entrë chupë llgá'ni'. 13Gudëdë bëldá dzë, iurní lë'ë ngulë'në menurë bëtuu'll herenci. Guná'zill nezë. Guall ladzë mënë zitu. Con dumí nanuá'all bë́'nëll zihani duldë. 14Hia bëga'a tiempë bëshí'nill dumí lu ra cusë mal. Iurní guna'zi tubi gubini lugar ni nu rldia'në nguiu ni. 15Guagná'bëll dchi'ni lu nguiu naquëreldë lugar ni. Shlámëll gunibë'a tsaguépill guchi lachi, gau ma. 16Bëdchini galërldia'në ldú'ull; guc shtú'ull gaull cumidë shtë ra guchi perë ni tubi mënë bëdë́'ëdi'i nagaull. 17Iurní bë'a llnill. Guní'ill: “Zihani muzë napë shtada. Rau rall hashtë napë rall de subrë, perë na gatia tantë rldia'na. 18Guëabría lidchi shtada. Guënia'a lúhi': Dadë, bëna duldë lul; nahia pecadurë lu Dios. 19Hia adë rúnëdi'i tucarë guëquërelda ziquë shínil. Bë'në tratë na ziquë tubi muzë shtë́nël.” 20Guna'zi nguiu ni nezë parë guëabrill lidchi shtádëll. ’Zitu nazé'dëll lídchill, guná shtádëll lull. Bëga'a ldu'u shtádëll lë́'ëll. Bëdchini guëllu'në shtádëll lull. Bë́'nëll recibir shínill con gustë. Gudë́dchill shínill. Bëtsagrua'll shínill. 21Nguiu ni guni'i lu shtádëll: “Dadë, bëna duldë lul nu nahia pecadurë lu Dios. Hia adë rúnëdi'i tucarë guëquërelda ziquë shínil.” 22Perë shtádëll guni'i lu ra muzë: “Nasesë guaglli'i shabë zá'quëll, lo más mejurë, gacu shinia. Guaglli'i tubi nigi parë guiá'all. Guaglli'i sabadu parë guëquëhin guëa'll. 23Gulë quini ngunë nandchú të guëdáuha'a. 24Gac laní purquë rnia'a guti shinia perë bëabrí nabani shinia. Bënítill perë hia bëdzéla'a lë́'ëll.” Lueguë guzublú laní. 25’Guzac shini mayurë nanull lachi. Iurë bëabrill lídchill, bínill musiquë nu cagui'i ra mënë. 26Guná'bëll tubi muzë. Guna'bë dí'dzëll pë runë cuntienë laní. 27Guni'i muzë: “Bë́chil bëabrill nabánill. Gunibë'a shtádël guëdini na'a ngunë nandchú të guëdáuha'a. Bë'në shtádël recibir bë́chil con gustë; nabánill.” 28Iurní lë'ë llga'në mayurë bëldëll; në́di'ill tsutëll la'ni hiu'u. Bëru'u shtádëll; guna'bë shtádëll lë́'ëll; bë́'ni' ruëguë lull tsutëll la'ni hiu'u. 29Perë guni'i shini mayurë: “Blac tiempë bëna sirvë lul nu bëzu'bë diaga shtí'dzël perë nunquë bëné'edi'il pë cahia, ni siquierë tubsë chivë mitu'në parë gac laní con amigu shtëna. 30Perë iurne' bëabrí shini rë́'ël; bëshí'nill shtumil. Guagnáldëll zihani na'a mal. Nu lë́'ël gunibë́'al gati ma nandchú, gau të. Gac laní.” 31Iurní guni'i shtádëll: “Nal shinia. Nabaninual. Grë lo quë nanapa nashtë́nël. 32Perë runë tucarë laní; gáca'a nalëgrë purquë bë́chil gútill perë bëabrill nabánill. Bënítill perë iurne' bëdzéla'a lë́'ëll stubi.”

will be added

X\