Hechos 17

1Gudëdë Pablo nu Silas ra guë'dchi nalë Anfípolis nu Apolonia parë bëdchini rai' ciudá Tesalónica. Ndë zubë tubi iádu'u shtë ra më israelitë. 2Ziquë na custumbrë shtë Pablo, guáhi' iádu'u. Tsunë llmalë bë́'ni' parë guagni'inull ra mënë cadë dzë descansë. 3Bí'ldi' la'ni Sagradas Escrituras lu ra mënë. Nu bëluá'ai' ra mënë Cristo napë quë gati më nu despuësë de guti më, napë quë tsashtë́ më ladi ra tëgulë. Rni'i Pablo: ―Lo mizmë Jesús nacagnia'a lu të, na më Cristo el quë nagudili Dios. 4Bëldá ra më israelitë gualdí ldu'u rall diza'quë nu bëtsa'guë rall Pablo nu Silas. Zihani më griego narunë adorar Dios, gualdí ldu'u rall, nu zihani na'a tse'lë ra më ru'bë narnibë'a, gualdí ldu'u rall shti'dzë Jesús. 5Perë los de más ra më israelitë nanadë rialdídi'i ldu'i diza'quë, nalë́ bëldënú rall Pablo nu Silas. Gudili rall bëldá nguiu mal nandigá canzë́ ra nezë. Guni'i rall lu mënë ciudá parë guëasë mënë cuntrë Pablo. Guatsutë́ rall lidchi Jasón. Ziatili rall Pablo nu Silas purquë nanë́ rall Jasón bëdë'ë lugar quëreldë Pablo nu Silas. Rac shtu'u rall guëna'zi rall lë'ë rai' parë gunë rall intriegu lë'ë rai' lu ra mënë parë gunë rall juzgar lë'ë rai'. 6Perë adë bëdzélëdi'i rall lë'ë rai' lidchi Jasón. Iurní guaca'a rall Jasón; bëshaguiú rall lë́'ëll con sëbëldá ra narialdí ldu'u diza'quë. Guagsa'në rall lë'ë rai' lu gubiernë shtë ciudá. Gurushtiá ra nguiu mal. Guni'i rall: ―Guëdubi lugar catë riutë́ Pablo rdzatsu ra më guë'dchi con ra creenci shtë rall nu ze'dë rall guë'dchi rë'. 7Jasón bëdë'ë lugar lídchill parë lë'ë rall. Grë ra nguiu rë' nanú rall cuntrë lëy shtë César purquë rni'i rall napë rall stubi rëy nalë Jesús. 8Iurë bini ra mënë ra cusë naguni'i rall, bëdzatsu rall. 9Perë Jasón con sëbëldá naguna'zi rall, gudilli rall dumí parë gupë rall libertá. Bëru'u rall. 10Ra narialdí ldu'i diza'quë naquëreldë Tesalónica, lueguë lueguë gugue'lë gulú nezë rall lë'ë Pablo nu Silas. Zia'a rall guë'dchi Berea. Zíquësë bëdchini rall ndë, gua rall iádu'u shtë ra më israelitë. 11Mënë naquëreldë ndë, más nabënë na rall quë ra israelitë naquëreldë Tesalónica purquë guëdubinú ldu'u rall bëquë́ diaguë rall diza'quë naguni'i Pablo, nu glli glli bë'në rall saber nia'a gu nahin verdá cumë ziquë na la'ni Sagradas Escrituras. 12De manërë quë zihani nguiu israelitë nu më griego, gualdí ldu'u rall diza'quë. Nu zihani na'a tse'lë ra më ru'bë, gualdí ldu'u rall diza'quë. 13Tsana bini ra contrari naquëreldë Tesalónica de quë nanú Pablo guë'dchi Berea, gua rall hashtë Berea parë guagtsatsu rall ra mënë guë'dchi ni. Cagni'i Pablo diza'quë lu ra mënë. 14Perë ra narialdí ldu'i Jesús, lueguë bëshe'ldë rall lë'ë Pablo hashtë rua' nisëdu'u. Niétiquë Silas nu Timoteo bëa'në rall guë'dchi Berea. 15Ra naguaguë'në compañi lë'ë Pablo, guagsa'në rall Pablo ciudá Atenas. Bëabrinú rall rsunë shtë Pablo; rac shtú'ui' tsa rall Atenas. Lueguë guzia'a Timoteo nu Silas catë nanú Pablo. 16Mientras cabezë Pablo lë'ë Silas nu Timoteo ciudá Atenas, nalë́ adë bëuu'di'i ldú'i'; adë gurëdchí ldú'i' iurë gunáhi' lu zihani ídolo narunë ra mënë adorar. 17La'ni iádu'u shtë ra më israelitë biadi'dzënú Pablo con los de más mënë narunë adorar Dios. Nu cadë dzë rni'i Pablo lu ra mënë lu llguëa' catë rdëá rall. 18Bëldá ra nguiu naná rsë'dë ldai' shtë narni'i rall estoicos nu sëbëldá nguiu naná rsë'dë ldai' narni'i rall epicúreos, biadi'dzënú rall Pablo. Nanú rall guni'i lu sa' rall: ―¿Pë quëadi'dzë ndë tantë ruadí'dzëll? Sëbëldá rall guni'i: ―Llua'a na'a di'dzë shtënë stubi dios cubi quëadí'dzëll. Rni'i rall zni purquë bini rall Pablo cagni'i diza'quë shtë Jesús, chu na më nu Dios bëldishtë́ lë'ë Jesús ladi ra tëgulë. 19Iurní bia'a rall lë'ë Pablo tubi lugar nalë́ Areópago catë rdëá ra më ru'bë parë guëquë́ diaguë rall pë rni'i ra mësë. Ndë guni'i rall lu Pablo: ―Rac shtu'u na'a gac bë'a na'a pë runë cuntienë ra ldai' cubi naze'dënul. 20Rní'il lu na'a ra cusë cubi na nunquë gá'adi'i guini na'a. Rac shtu'u na'a gac bë'a na'a pë na ra cusë naruadí'dzël. 21Zni guni'i rall purquë grë më Atenas nu ra më de stubi naciuni naquëreldë ndë, rëuu' ldu'u rall cualquier cusë cubi. Llëduni tiempë hiadë ruadi'dzë rall stubi cusë, niétiquë ra cusë cubi naguërë́ rini rall ruadi'dzë lu sa' rall. 22Iurní Pablo guasuldí guëláu rall lugar nalë Areópago nu guní'i': ―Lë'ë të më Atenas, rnahia demasiadë devociuni napë të parë ra dios shtë të 23purquë tsana canzë́a, rbí'ahia lugar catë cabezë ra dios shtë të. Bëdia'guëlúa tubi bëcu'guë naquë́ tubi letrërë luhin narni'i: “Dios nagá'adi'i chu guënë́di'i”. Pues Dios naquëhunë të adorar sin quë guënë́di'i të, nanë́a Dios rë'. Ze'dë guënia'a diza'quë shtë më. 24’Na më Dios nabëntsa'u guë́'dchiliu nu grë ra cusë nananú la'nin. Rnibë'a më guë́'dchiliu nu gube'e. Adë quëréldëdi'i më la'ni iádu'u nabëntsa'u ra mënë. 25Adë rquí'nidi'i më ra cusë naruntsa'u ra mënë. Niétiquë pë rqui'ni më purquë mizmë Dios rne'e vidë nu grë cusë narqui'ni hia'a. 26’Grë ra mënë nanarë́ lu guë́'dchiliu na rall shini Adán, nguiu nabëntsa'u Dios iurë bësinlú më guë́'dchiliu. Bë'në Dios punërë ra tiempë naguëbani grë ra naciuni nu lugar catë guëquëreldë mënë. 27Bë'në Dios ni parë quili ra mënë lë́'i' purquë rac shtu'u më grë mieti guëdia'guëlú rall lë'ë më. Dios adë núdi'i zitu de lë'ë hia'a. 28Por voluntá shtë Dios nacabezë gube'e, nadápa'a vidë nu por lë'ë më rni'bi hia'a nezë rë' nezë rë'. Por lë'ë më quërélda'a guë́'dchiliu. Por voluntá shtë më nabánia'a nu rdë́'na'a dchi'ni. Lo mizmë guni'i ra bëldá mësë shtë të: “Na hia'a shini Dios”. 29Ziquë shini Dios, adë chu gunë llgabë de quë na më cumë ziquë ra dzanë naguctsa'u con orë u bëdchichi u guë'ë. Mënë runtsa'u rall cusë ni ziquë na shgabë rall. 30Adë pë guni'i Dios lu ra mënë tiempë guahietë tsana gá'adi'i guënë́ rall lë'ë më perë iurne' sí, rnibë'a më lu mënë gudubi guë́'dchiliu, gunë nadzë'ë mudë nanabani rall nu guëabrí ldu'u rall con Dios 31purquë Dios hia bë'në më designar tubi dzë nagunë më juzguë ra mënë. Dios gulë́ tubi nguiu nagunë juzguë grë mënë lu guë́'dchiliu. Verdá nahin purquë bëldishtë́ Dios nguiu rë' ladi ra tëgulë. 32Iurë bini ra mënë lo quë naguni'i Pablo de quë tsashtë́ ra tëgulë, nanú rall bë'në burnë. Sëbëldá rall guni'i rall lu Pablo: ―Mejurë stubi dzë guëquë́ diaguë na'a ra shtí'dzël. 33Iurní Pablo gubi'. Bësëa'nëgáhi' lë'ë ra mënë, 34perë bëldá rall gualdí ldu'u rall diza'quë nu guanaldë rall Pablo. Ladi ra mënë ni nanú tubi nguiu lë Dionisio. Nall miembrë shtë partidë Areópago. Nu nanú tubi na'a lë Dámaris con zihani ra nagualdí ldu'u diza'quë shtë Jesús.

will be added

X\