1 San Juan 3

1Gulë bëdë'ë cuendë blac rac shtu'u Dios lë'ë hia'a. Rni'i më na hia'a shíni'. Ra mënë narialdídi'i ldu'i shti'dzë Dios, rdë́'ëdi'i rall cuendë chu na Jesús. 2Lë'ë të Dadë narac shtua'a, na hia'a shini Dios iurne', perë rluá'adi'i lla gáca'a más delantë. Pues rdë'ë hia'a cuendë dzë naguëdchini më stubi vueltë, gáca'a ziquë na më purquë guëná hia'a lu më tal ziquë na më. 3Grë ra narialdí ldu'i guëdchini më, gac cambi mudë nanabánill; adë tsaglá'guëdi'i gúnëll duldë. Rac shtú'ull gáquëll ziquë lë'ë më. 4Grë ra narunë duldë, runë rall faltë lu lëy shtë Dios. Napë rall faltë lu Dios. Grë duldë na cuntrë lëy nabëne'e Dios. 5Nanë́ të bëdchini Jesús parë guëzunë́ më almë shtë́na'a. Nápëdi'i më duldë. 6El quë narzu'bë diaguë shti'dzë Jesús, tsaglá'guëdi'i gúnëru'ull duldë. El quë nariagla'guë gunë duldë, adë rdë́'ëdi'ill cuendë chu na më. Nunquë bënguë bë́'adi'ill lë'ë më. 7Dadë, adë rdë́'ëdi'i të sí guësiguë́ mënë lë'ë të gunë të duldë. El quë narunë cumplir shti'dzë Dios, tubldí na shcuéndëll lu Dios igual ziquë na Jesús lu Dios. Justë na më. 8El quë nariagla'guë runë duldë, nall shini mëdzabë Satanás purquë Satanás antsë cueshtë́ guë́'dchiliu, bë́'nëll duldë. Por ni Jesús, shini Dios, bëdchini lu guë́'dchiliu parë guëchili më dchi'ni shtë mëdzabë. 9El quë nanapë vidë shtë Dios, adë tsaglá'guëdi'i gúnëll duldë purquë hia bidë mizmë vidë shtë Dios la'ni ldu'u nguiu ni; adë ni mudë gúnëru'ull duldë purquë gúlëll nacubi por pudërë shtë Dios. 10Zni rlua'a chu na shini më nu chu na shini Satanás. El quë natsagla'guë gunë duldë, nápëdi'ill vidë cubi shtë Dios. El quë narac shtú'udi'i bëchi sáhi', nápëdi'ill vidë shtë më. 11Di'dzë rë' bini të dizdë binlú diza'quë: napë quë gac shtu'u hia'a grë sa' hia'a. 12Adë guëdë́'nëdi'ia'a ziquë Caín. Gúquëll shini mëdzabë nu gudínill bë́chill. ¿Pëzielú gudínill bë́chill? purquë grë lo quë nabë́'nëll, na mal lu Dios, perë bë́chill lo quë nabë́'nëll na bien lu Dios. 13Dadë, lë'ë të narialdí ldu'u shti'dzë Dios, adë rdzëguëë'di'i ldu'u të si talë ra mënë shtë guë́'dchiliu rna zá'quëdi'i rall lu të. 14Nanë́ hia'a gudë́da'a lu galguti hashtë nadápa'a vidë sin fin purquë de verdá rac shtu'u hia'a ra narialdí ldu'i Dios. El quë nadë rac shtú'udi'i bëchi sáhi', todavía nápëdi'ill vidë sin fin. 15El quë narná zá'quëdi'i lu sáhi', nall ziquë narguini mënë. Nanë́ hia'a el quë narguini mënë, nápëdi'ill vidë sin fin. 16Por Jesús nanë́ hia'a lla na Dios, el quë narac shtu'u de verdá. Jesús guc cunformë; gúti' lu cruz por lë'ë hia'a. Por ni runë tucarë guëdë'ë hia'a vidë shtë hia'a parë sa' hia'a. 17Si talë tubi hia'a nápa'a ra cusë shtë guë́'dchiliu nu tubi sa' hia'a napë nicidá, napë quë guëdë́'na'a compañi lë́'ëll. Si talë në́di'ia'a guëdë'ë hia'a nacá'all, rac shtú'udi'ia'a Dios iurní. 18Bëchi, gac shtu'u hia'a sa' hia'a de verdá, lë́dëdi'i con di'dzë shtë́na'a sulamëntë, guëdë'ë hia'a narqui'ni sa' hia'a. 19Si talë guëdë́'na'a cumplir di'dzë rë', gac bë'a hia'a na hia'a shini Dios de verdá. Zni adë rdzë́bëdi'i ldu'u hia'a lu më iurë shgába'a quëgni'i guë́ca'a. 20Si talë nápa'a llgabë naquëgni'i guë́ca'a, nápëdi'ia'a confiansë lu më iurní, perë na më más më ru'bë quë shgába'a, nu nanë́ më grë cusë nananú la'ni ldu'u mieti. 21Lë'ë të narac shtua'a, si talë adë nápëdi'ia'a llgabë naquëgni'i guë́ca'a, nápa'a confiansë lu Dios. Adë rdzë́bëdi'ia'a lu më 22nu rne'e më ra cusë narná'ba'a lu më purquë dzudë́'na'a cumplir lo quë narac shtu'u më. Dzudë́'na'a cumplir mandamientë shtë më. 23Ni na mandamientë shtë më, tsaldí ldu'u hia'a shini më Jesucristo, nu rnibë'a më gac shtu'u hia'a bëchi sa' hia'a. Zni bësëa'në më mandamientë shtë më. 24Grë ra narunë cumplir mandamientë shtë më, quëbezënú rai' Dios nu quëbezënú Dios lë'ë rai'. Nanë́ hia'a quëbezënú më lë'ë hia'a purquë bëdë'ë më Espíritu Santo parë cuezënúhi' lë'ë hia'a.

will be added

X\