Romanos 7

1Sucu'une'ex te'ex a kaj óole'ex le a'almaj t'aano' a wojele'ex le a'almaj t'aano' yaan u páajtalil tu yóokol jun túul máaque' chéen ca'aliquil cuxa'an le máaco'. 2Tumen jun túul co'olel dzoca'an u beele' nupa'an tumen le a'almaj t'aan ti' u yíichamo' ca'aliquil cuxa'an u yíicham; ba'ale' wa le íichamtzil cu químilo', le co'olelo' jáalkab u p'áatal ti' le a'almaj t'aan nupic ca'acho'. 3Bey túuno' wa leti' cu nupicubáa yéetel u láak máac ca'aliquil cuxa'an u yíichame', táan u nup kebantal; ba'ale' wa cu quíimil u yíichame', leti'e' jáalkab u p'áatal ti' le a'almaj t'aano'; je'el u páajtal u dzo'ocol u beel yéetel u láak máaque' tumen ma' nupkebani'. 4Bey xan te'ex, in sucu'une'ex, dzo'oc a quíimile'ex u ti'al le a'almaj t'aano' tu yo'olal u wíinclil Cristo, u ti'al ca a nupaba'ex yéetel u yaanal. Bejela'e' u ti'ale'ex Cristo, máax ca'a púut cuxquinta'ab ti' le quíimilo'. Lela' úuch u ti'al ca ichnac c cuxtal tu táan Ku. 5Tumen ca'alquil ca'ach táan c cuxtal je'el bix u káat le lu'umcabil wíinclila', le a'almaj t'aano' meyajnaje' u ti'al u yajsic le kaakas dzíibolalo'ob ti' c wíinclilo', lela' tu bisajo'on ti' quíimil. 6Ba'ale' bejela'e' dzo'oc c quíimil u ti'al le a'almaj t'aan tu'ux yano'on ca'ach yáanal u páajtalilo', bey túuno' jáalkabo'on u ti'al c meyajtic Ku ti' le túumben cuxtal cu dzáic Quili'ich Pixano', ma' yáanal le úuchben a'almaj t'aan dzíiba'ano'. 7¿Ba'ax túun bin c a'ale'? ¿Keban le a'almaj t'aano'? ¡Tu jaajile' ma'! ba'ale' quex beyo', tene' ma' táan in wojéeltic ba'ax ca'ach le kebano', wa ma' tu yo'olal le a'almaj t'aano'. Bey túuno' ma' tin in wojéelt ca'ach ba'ax u dzíibolal ba'al u ti'al yaanal máac, wa ma' u ya'alic le a'almaj t'aano': Ma' a dzíiboltic ba'al u ti'al yaanal máac. 8Ba'ale' le kebano' tu ch'a'a u muuk yóokol le a'almaj t'aano' ca tu yajsaj ti' teen tuláacal u jejeláasil kaakas dzíibolalo'ob. Tumen jun páayil ti' le a'almaj t'aano' le kebano' jun p'éel ba'al quimen. 9Yanchaj kiino'ob ca'ach mina'an a'almaj t'aane', tene' cuxa'anen ca'achi. Ba'ale' le ca j taal le a'almaj t'aano', le kebano' cuxlaj tu ca'a téene' ca j quíimen teen. 10Bey túuno' le a'almaj t'aan unaj u dzáic cuxtal ca'acho' tu bisajen ti' quíimil, 11tumen le kebano' tu ch'a'aj u muuk ti' le a'almaj t'aano' ca tu tusajen, tu yo'olal le a'almaj t'aan túuno' tu quiimsajen. 12Tu jaajile' le a'almaj t'aano' quili'ich, le tzolbe'en t'aano' quili'ich yéetel utz. 13Bix yanil túun, ¿le ba'ax utza' tu bisajen ti' quíimil? ¡Tu jaajile' ma'! ¡Le kebano' leti' tu beetaj in quíimil, beyo' tu ye'esaje' leti'e' keban: lela' tu beetaj yéetel le ba'ax utzo', beyo' le tzolbe'en t'aano' tu ye'esaj u sen kaasil le kebano'! 14C ojel le a'almaj t'aano' pixanbe'en ba'al, tene' quíimilbe'en máaquen cona'anen u ti'al paltzilta'al tumen le kebano'. 15Tumen tene' ma' táan in na'atic ba'ax cu yúuchul teen, tumen ma' táan in beetic ba'ax in káati, ba'ale' le ba'ax in p'ecmajo' leti' quin beetic. 16Ba'ale' wa le ba'ax ma' leti' in káat quin beetico' quin kaj óoltic beyo' ma'alob le a'almaj t'aano'. 17Bey túuno', ma' teen beetiqui', ba'ale' le keban yaan ti' teno' leti' beetic. 18Tumen in wojel ti' tene', in káat in wa'ale', ti' in lu'umcabil wíinclile', mina'an mix ba'al utz; tumen yaan ti' teen u dzíibolal in beetic ba'ax ma'alob ba'ale' ma' tu páajtal in beetic. 19Ma' táan in beetic le ba'ax ma'alob in káato', ba'ale' táan in beetic le ba'ax kaas ma' in káato'. 20Bey túuno', wa quin beetic le ba'ax ma' in káat in beeto', ma' teen máax beetiqui', ba'ale' le keban yaan ti' teno'. 21Bey túuno' cu yúuchul teen lela': le quéen in wóolt in beet le utzo', chéen quin wilic ti' teen le kaaso'. 22In pucsi'ikale' cu qui'imactal u yóol tu yo'olal u ya'almaj t'aan Ku; 23ba'ale' quin wilique' ti' in wíinclile' yaan ba'ax cu bin tu contra in tuucul; lela' u ya'almaj t'aan le keban yaan ti' in wíinclilo' yéetel u palitziltmaen. 24¡Jach óotzilen! ¿Máax toquiquen ti' le wíinclil cu bisiquen ti' le quíimilo'? 25Chéen Yuum Ku, tu yo'olal c Yuumtzil Jesucristo. ¡Nib óolal ti' Ku! Bey túuno' tene' quin na'atic unaj in wantal yáanal u ya'almaj t'aan Ku, ba'ale' tu yo'olal in lu'umcabil wíinclile' palitzilen ti' u ya'almaj t'aan le kebano'.


Copyright
Learn More

will be added

X\