Romanos 4

1Ba'ale' co'ox a'alic tuun: ¿ba'ax tu náajaltaj Abraham, c úuchben láak? 2Tu jaajile' wa ca dza'abac leti' ma'alob tu táan Ku tu yo'olal ba'ax tu beetaje', yaan ba'ax yo'olal u ca'analtal u yich, ba'ale' ma' tu táan Kui'. 3Tumen ¿ba'ax cu ya'alic le Quili'ich Dzíibo'? Abrahame' tu yocsaj óoltaj Ku, tu yo'olal u yocsaj óolale' j ka'am tumen Ku je'el bix máac toje'. 4Bey túuno', wa jun túul máac cu beetic jun p'éel meyaje', u bo'olale' ma' tu dza'abal ti' bey jun p'éel siibale' ba'ale' bey jun p'éel ba'al p'axa'an ti'e'. 5Ba'ale' wa yaan jun túul máac quex ma' tu beetic mix ba'al, ba'ale' cu yocsic u yóol ti' Yuum Ku máax cu kamic le j kebano'obo', cu ka'amal tumen Ku je'el bix jun túul máac toje' tu yo'olal u yocsaj óolal. 6Davide' j t'aanaj tu yo'olal u qui'imac óolal jun túul máac cu ka'amal tumen Ku je'el bix jun túul máac toje' quex ma' u yila'al ba'ax u meentmaj. 7Davide' tu ya'alaj: Qui'imac u yóolo'ob le máaxo'ob cu sa'atsa'al u loobilo'ob tumen Kuo', yéetel cu tu'ubsa'al u kebano'obo'. 8Qui'imac u yóol le máac ma' tu dza'abal u si'ipil u keban tu yóokol tumen Yuumtzil. 9¿Le qui'imac óola' chéen wa u ti'alo'ob le máaxo'ob súutkupta'ano'obo', wa u ti'al xan le máaxo'ob ma'o'? Dzo'oc c a'alique' Kue' tu kamaj Abraham je'el bix jun túul máac toje' tu yo'olal u yocsaj óolal. 10Ba'ale' ¿ba'ax kiin ca tu kamaj? ¿Cu dzo'ocol u súutkupta'al Abraham wa ma'ili'e'? Ma' cu dzo'ocoli', ba'ale' ma'ili'e'. 11Cu dzo'ocole' Abrahame' tu kamaj le súutkuptajo' bey jun p'éel chíiculal wa jun p'éel ba'ax iquil u kaj óolta'al dzo'oc u ka'amal tumen Ku bey jun túul máac toje' tu yo'olal tu yocsaj óolal ma'ili' súut kupta'aque'. Tu yo'olal lela' Abrahame' j kuch u beetjubáa taata ti' tuláacal le máaxo'ob yaan ocsaj óolal ti'obo' quex ma' u kamajo'ob le súutkuptajo', bey túuno' cu ka'amalo'ob xan tumen Ku bey máaco'ob tojtaco'obe'. 12Tu jaajile' Abrahame' leti' u taata le máaxo'ob súutkupta'ano'obo', ba'ale' tu yóokol lelo' cu bino'ob tu bejil le ocsaj óolal yanji ti' c taata Abraham, ma'ili' súut kupta'aco'. 13Kue' tu ya'alaj ti' Abraham yéetel ti' u ch'i'ibale' yaan u ti'alintico'ob le yóokolcaaba'; ba'ale' le t'aana' dzaab ti'obe' ma' tumen tu dzo'ocbesaj Abraham le a'almaj t'aano' ba'ale' tumen tu yocsaj u yóol ti' Ku; Ku túune' tu kamaj je'el bix jun túul máac toje'. 14Tumen wa chéen le máaxo'ob cu dzo'ocbesico'ob le a'almaj t'aan cu kamico'ob le ayikalilo', bey túuno' chéen cunel le ocsaj óolalo', bey xan le t'aan tu dzaj Kuo', mix ba'al u biilal. 15Tumen le a'almaj t'aano' cu taasic jaadz; ba'ale' tu'ux mina'an a'almaj t'aane', bey xan mina'an táadz máansajo'ob ti' le a'almaj t'aano'. 16Le o'olale' u ti'al ca jéedzec le t'aan dzaab ti' Abraham u ti'al tuláacal u chi'ibale', yanchaj u béeytal bey jun p'éel siibal jedzecbal ti' le ocsaj óolalo'. U káat u ya'ale' le dzaabil t'aano', ma' chéen u ti'al le máaxo'ob cu dzo'ocbesico'ob le a'almaj t'aano', ba'ale' u ti'al xan tuláacal le máaco'ob cu yocsaj óolalo'obo' je'el bix ocsaj óolnajic Abrahame'. Leti' túune', cu kuchul u beetubáa taatatzilil ti' to'on tuláacalo'on 17tu táan Ku, máax ocsaj óolta'ab tumen leti'. Je'el bix cu ya'alic le Quili'ich Dzíibo': Dzo'oc in beetiquech u taatatzil ya'abcach máaco'ob. tumen Kue' cu dzáic cuxtal ti' le quimeno'obo', yéetel cu beetic u yantal le ba'alo'ob ma' yano'obo'. 18Quex mina'an alab óolale', Abrahame' ocsaj óolnaje' ca yanchaj alab óolal ti', bey túuno' j kuch u beetubáa taatatzil ti' ya'abcach máaco'ob, je'el bix a'ala'ab ti' tumen Kue': Bey cun kuchul u ya'abil a ch'i'ibalo'obo'. 19Abrahame' ma' j lúub u muuk u yocsaj óolali', quex míin ciento u ja'abilo'ob, yéetel táan u yilic leti' je'el bix Sarae' ta'itac u quíimilo'ob yéetel dzo'oc u jach nuxibtalo'ob u ti'al ca yanac u paalalo'ob. 20Ma' tu ca'a p'éel óoltaj mix tu kex óoltaj u t'aan Kui', ba'ale' yanchaj ya'ab ocsaj óolal ti' yéetel alab óolal. Tu qui'iqui' t'aantaj Ku, 21tumen tu dzaj tu yóole' jach jaaj Junab Kue' yaan páajtalil ti' u ti'al u beetic tuláacal ba'ax cu ya'alic. 22Tu yo'olal lela' j ka'am tumen Ku je'el bix jun túul máac toje' tu yo'olal u yocsaj óolal. 23Le ka'amic tumen Ku je'el bix jun túul máac toj tu yo'olal u yocsaj óolale', ma' dzíibta'ab chéen tu yo'olal Abrahami'; 24dzíibta'ab xan t o'olal. Tumen tu yo'olal c ocsaj óolale' Kue' cu kamico'on tac to'on je'el bix toj máaco'obe' le máaxo'ob c ocsaj óoltic le máax tu ca'a púut cuxquintaj Jesús, c Yuumtzil, ti' le quimeno'obo', 25máax ku'ub ti' quíimil tu yo'olal c kebano'ob yéetel ca'a púut cuxquinta'ab u ti'al ca dza'abaco'on ma'alob tu táan Yuum Ku.


Copyrighted Material
Learn More

will be added

X\