Romanos 14

1Wa yaan máax luba'an u muuk u yocsaj óolale', kame'ex x ma' ba'atel t'aanil tu yóokol le ba'alo'ob ma' jach sáasil oje'elanilo'obo'. 2Je'el bix lela' yaan máax cu tucultique' cu páajtal u jaantic tuláacal ba'al, yaan u láake', máax luba'an u muuk tu yo'olal u yocsaj óolale', cu jaantic chéen janalbe'en xíiwo'ob. 3Le máax cu jaantic je'el ba'alaque', ma' u p'ectic le máax cu tucultic yaan ba'axo'ob ma' unaj u jaanta'alo'obi'. Bey xan le máax cu tucultic yaan ba'ax ma' unaj u jaanta'alo' ma' u p'is óoltic le máax cu jaantic je'el ba'alaque', tumen Kue' dzo'oc u kamic le máaco'. 4¿Máaxech teech u ti'al a p'is óolt le máax táan u meyajtic yaanal máaco'? Tumen wa utz wa kaas u p'áatale', lelo' u dzuulil máax unaj u ya'alic. Yéetel utz cun p'áatal, tumen Yuumtzile' yaan páajtalil ti' u ti'al u beetic u p'áatal utzil. 5U láak ba'al je'el bix lela': Yaan máax cu táanilcunsic jun p'éel kiin ti' u láak, yaan máax xane' cu tucultique' queet tuláacal le kiino'obo'. Cada jun túule' unaj u jéedzel ma'alob ti' ba'ax cu tucultic. 6Le máax cu táanilcuntic jun p'éel kiine' cu beetic u ti'al u tziquic Yuumtzil; le máax ma' tu táanilcuntic jun p'éel kiine' cu beetic u ti'al u tziquic Yuumtzil xan. Bey xan le máax cu jaantic je'el ba'alaque', cu beetic xan u ti'al u tziquic Yuumtzil tumen cu dzáic nib óolal ti' Ku. Le máax ma' tu jaantic je'el ba'alaque', ma' tu jaantique' u ti'al u tziquic Yuumtzil yéetel cu dzáic nib óolal ti' Ku xan. 7Tumen mix jun túul ti' to'on cuxa'an chéen u ti'al tu juunal, mix cu quíimil u ti'al tu juunal. 8Tumen wa cuxa'ano'one', cuxa'ano'on u ti'al Yuumtzil, wa c quíimile', c quíimil u ti'al Yuumtzil. Bey túuno', wa cuxa'ano'one' wa quimeno'one' u ti'alo'on Yuumtzil. 9Tumen Cristoe' j quíimi, yéetel ca'a púut cuxlaj u ti'al ca u beetubáa u Yuumtzil le quimeno'ob yéetel le cuxa'ano'obo'. 10¿Ba'ale' teche', ba'axten ca p'is óoltic a sucu'un? ¿wa ba'axten ca p'ectic? Tumen tuláacalo'on yaan c antal tu táan Cristo u ti'al ca p'is óolta'aco'on tumen leti'. 11Tumen le Quili'ich Dzíibo' cu ya'alic: Jach tu jaajil je'el bix cuxa'anecho', cu ya'alic Yuumtzil, tuláacal bíin xolac tin táan, yéetel tuláacal bíin u nojbe'encunt Ku tu táan máaco'ob. 12Bey túuno' cada jun túul ti' to'one' yaan u tzolic ti' Ku ba'ax u beetmaj. 13Le o'olale', ma' unaj c p'is óolticbáa t baatzili'. Ba'ax unaj a beetique'exe' a dzáic a wóole'ex u ti'al ma' a beetique'ex tu'ux cu páajtal u t'óochpajal a sucu'une'ex, wa ca u beet u lúubul ti' keban. 14Tene' in wojel mina'an mix ba'al cu kastal wa ma' yaan ba'ax kascuntic; lela' jach in wojel je'el bix jun túul u yocsaj óolal Yuumtzil Jesuse'; ba'ale' wa yaan máax cu tucultic ka'asa'an wa ba'axe', u ti'al leti'e' kasa'an. 15Wa tu yo'olal wa ba'ax ca jaantic cu yaatal u yóol a sucu'une', bey túuno' ma' táan a beetic yéetel yaacunaj. Ma' a beetic u sa'atal mix jun túul tu yo'olal máax quíim Cristo, chéen tumen teche' a káat a jaant wa ba'ax. 16Ma' a dzáique'ex tu'ux u t'aan kaas mix máac tu yo'olal le ba'ax ca tucultique'ex utzo'. 17Tumen u aja'awil Kue' mix ba'al yaan u yil yéetel janal wa ukul, ba'ale' yaan ba'al u yil yéetel jun p'éel toj cuxtal, jéedzel óolal yéetel qui'imac óolal, ba'alo'ob yaan to'on tu yo'olal le Quili'ich Pixano'. 18Le máax cu meyajtic Cristo beya', cu lúubul utzil tu táan Ku, yéetel cu ka'amal ma'alob tumen máaco'ob. 19Bey túuno', cox caxantic le ba'alo'ob cu taasic jéedzel óolalo', le ba'alo'ob cu páajtal u yáantico'ono' u ti'al u ch'íijil c pixan. 20Ma' a kascuntic u meyaj Ku tu yo'olal ba'ax ca jaantic. Tu jaajile' tuláacal le janalo'obo' ma'alobtac, u kaasile' u jaanta'al wa ba'ax ca u beet u lúubul ti' keban máaco'ob. 21Ma'alob ma' a jaantic bak, mix a wukic vino, mix a beetic mix ba'al ca u beet u t'óochpajal a sucu'un, wa ca u beet u lúubul ti' keban, wa ca u beet u mina'antal u muuk u yocsaj óolal. 22Le ocsaj óolal yaan ti' techo', unaj u yantal teech tu táan Ku. ¡Qui' u yóol le máax ma' tu ta'acal u pool tu yo'olal ba'ax cu beetic tumen cu tucultic ma'alobo'! 23Ba'ale' le máax cu jaantic wa ba'ax yéetel le quéen u jaante' yaan u si'ipil, tumen ma' tu jaanta yéetel ocsaj óolali'; tuláacal ba'ax ma' tu beetaj yéetel ocsaj óolale' keban.


Copyright
Learn More

will be added

X\