Romanos 13

1Tuláacal máac unaj u yantal tu yáanal u páatalil le jalach wíinico'obo'. Tumen mina'an páajtalil wa ma' ti' Junab Ku u taali', yéetel le jalach wíinico'ob yano'obo' dza'ano'ob tumen Ku. 2Bey túuno' le máax ma' tu yu'ubic u t'aan le jalach wíinico'obo', táan u bin tu contra ba'ax a'ala'an tumen Ku. Le máaxo'ob ma' tu yu'ubaj t'aano'obe' yaan u si'ipilo'ob le o'olale' bíin ja'adza'aco'ob. 3Tumen le jalach wíinico'obo' ma' dza'ano'ob u ti'al u dzáico'ob sajquilil ti' le máaxo'ob cu beetico'ob utzo', ba'ale' ti' le máaxo'ob cu beetico'ob kaaso'. ¿A káat wa cuxtal x ma' sajquilil ti' le jalach wíinico'? Beet le ba'ax utzo', le jalach wíinic túuno' yaan u kamiquech ma'alob, 4tumen táan u meyajtic Ku u ti'al a wutzil. Ba'ale' wa ca beetic ba'ax kaase' unaj a ch'a'ic saajquil túun; tumen ma' chéen cunel yaan páajtalil ti' le jalach wíinic u ti'al u jaadzo', tumen táan u meyajtic Ku u ti'al u dzáic le jaadz cu najmatic le máax cu beetic kaaso'. 5Le o'olal unaj u yantal máac tu yáanal u páajtalil le jalach wíinico'obo', ma' chéen u ti'al ma' u taal le jaadzo', ba'ale' tumen bey unaj u toj tucultic máac u beetic. 6Bey xan tu yo'olal lela' ca bo'otique'ex le páatano'obo'; tumen le jalach wíinico'obo' táan u meyajtico'ob Ku yéetel u dzaamaj u yóolo'ob ti' le meyaja'. 7Bo'ot ti' tuláacal máaque' le ba'ax unaje'. Ti' máaxo'ob unaj a bo'otique'ex le áantajo'obo', bo'ote'ex le áantajo'obo'; ti' máax unaj a bo'otique'ex le páatano'obo', bo'ote'ex le impuesto'obo', máax unaj a tziquiltique'exe', tziquilte'ex: máax unaj a chíin pooltique'exe' chíin poolte'ex. 8Ma' a p'axique'ex mix ba'al ti' mix máac, wa ma' chéen le u p'aaxil yaacunaj a p'axme'ex ta baatzile'exo'; tumen le máax u yaabiltmaj u láake', yéetel lelo' dzo'oc u beetic le ba'ax cu ya'alic le a'almaj t'aano'. 9Le a'almaj t'aano' cu ya'alic: Ma' a nupkebantal, ma' a quiimsic wíinic, ma' a woocol, ma' a líiksic tuus tu yo'olal mix máac, ma' a dzíiboltic ba'ax u ti'al yaanal, ba'ale' lela' yéetel u láak a'almaj t'aano'obo' jun p'éelcunta'an ti' le t'aano'oba': Yaabilt a láak je'el bix a yaabilticabáa teche'. 10Le máax yaan u yaacunaj ti'e' ma' tu beetic kaas ti' u láak, bey túuno' le a'almaj t'aano' cu dzo'ocbesa'al ma'alob yéetel le yaacunajo. 11Ti' tuláacal lela', il a wile'ex le kiino'ob cuxlico'ona', yéetel ojéelte'exe' dzo'oc u p'iistal c ajal ti' c wenel. Tumen c tocsajile' mas naadz bejela'e' ti' le ca yáax ocsaj óolnajo'one'. 12Le áakabo' ta'itac u máan, táan u náadzal le kiino'; le o'olal unaj c p'atic le ba'ax cu beeta'al ichil éekjoche'enilo', yéetel c búuquintic u nookil ba'atel je'el bix le soldado'ob cu máanelo'ob ti' le sáasilo'. 13Co'ox máan tu beel je'el bix unaj u máan máac yéetel kiine'. Ma' c cuxtal ti' le cáaltalilo'ob mix ti' patan janalo'ob, mix ti' kaakas cuxtal yéetel ba'alo'ob kaastac cu suuctal u beeta'al, mix ti' ba'atelilo'ob yéetel kaakas tuuculo'ob. 14Ba'ax unaj a beetique'exe', búucbesaba'ex yéetel Yuumtzil Jesucristo bey je'el bix u nookil ba'atele', yéetel ma' a tucultique'ex a beetique'ex ba'ax cu dzíiboltic le wíinclila'.


Copyright
Learn More

will be added

X\