Romanos 12

1Bey túuno' sucu'une'ex, quin káat óoltic te'ex tu yo'olal u ch'a'a óotzilil Kue', ca a kub a wíinclile'ex bey jun p'éel cuxa'an siibal, jun páaycuna'an yéetel kambe'en tu táan Ku. Lela' leti' u jaajil kultajil unaj a dzáique'exo'. 2Ma' a cuxtale'ex je'el bix u ya'alic le yóokolcaaba'; ba'ale' kexe'ex a tuucule'ex u ti'al ca túumbenchajac a cuxtale'ex. Beyo' je'el a wojéeltique'ex máacalmáac u yóolal Kue', u káat u ya'ale' le ba'ax ma'alobo', ba'ax utz tu t'aano' yéetel ba'ax jach tu beel. 3Tu yo'olal le siibal utzil dza'an teen tumen Kuo', quin wa'alic ti' tuláacale'exe', mix jun túul ca u tucult tu yo'olale' maanal ti' le unaj u tucultico'. Tu jujun túule' unaj u tuucul yéetel cabal óolal, je'el bix u p'i'isil le ocsaj óolal dza'an ti' tumen Kuo'. 4Tumen je'el bix ti' jun p'éelili' wíinclil yaan to'on ya'ab xéexet'ale', ba'ale' ma' ti' jun p'éelili' ba'al cu meyaj le xéexet'alo'obo', 5bey xan to'on quex ya'abo'one', chéen jun p'éelili' wíinclil nupa'ano'on ti' Cristo, bey xan nupa'ano'on t baatzile' je'el bix u xéexet'al jun p'éelili' wíinclile'. 6Kue' u dzaamaj to'on jejeláas páajtalilo'ob, je'el bix tu yóoltaj u dzáa ti' cada jun túule'. Unaj c beetic u meyaj ma'alob le páajtalilo'obo'. Wa Ku u dzaamaj to'on u páajtalil c tze'eque', unaj c beetic je'el bix le ocsaj óolal yaan ti' to'ono'; 7wa u dzaamaj to'on u páajtalil c meyajtic u láako'obe', unaj c meyajtico'ob ma'alob. Le máax u yojel ca'ansaje' unaj u meyaj ti' ca'ansaj; 8le máax u yojel u líikes u yóol u láako'obe', unaj u beetic lelo'. Le máax cu dzáic wa ba'axe', ma' unaj u pa'atic u su'utul u jeel ti'. Le máax cu nu'uctic bix unaj u beeta'al wa ba'axe', unaj u canantic bix unaj u nu'uctaj. Le máax cu ch'a'a óotzilile' unaj u beetic yéetel qui'imac óolal. 9Yanac te'ex yaacunaj x ma' ca'a p'éel ichil ta baatzile'ex. P'ecte'ex le kaaso', beete'ex le utzo'. 10Unaj a yaabilticaba'ex ta baatzile'ex yéetel u yaacunajil sucu'untzilo'ob, ca a táanilcunte'ex u láako'ob yéetel ca a te'escuntaba'ex ta baatzile'ex. 11Mukulmuknene'ex, ma' a ma' óolta'ale'ex, meyajte'ex Yuumtzil yéetel tuláacal a pucsi'ikale'ex. 12Cuxlene'ex yéetel qui'imac óolal tu yo'olal le alab óolal yaan te'exo'; yanac te'ex chuca'an óolal quéen mukyajnaque'ex. Payalchi'inene'ex mantadz. 13Áante'ex le ocsaj óolo'obo' yéetel ba'ax kabéet ti'obo'; Kame'ex ma'alob le máaxo'ob cu xíimbaltique'exo'obo'. 14Qui'iqui' t'aante'ex le máaxo'ob ch'a'apachtique'exo'obo'. Qui'iqui' t'aante'ex, ma' a loolob t'aane'ex. 15Qui'imacchajac a wóole'ex yéetel le máaxo'ob qui'imac u yóolo'obo', yéetel okolnene'ex yéetel máaxo'ob cu yokolo'obo'. 16Bisajba'ex ma'alob ta baatzile'ex. Ma' u ca'analtal a wiche'ex, ba'ale' quetaba'ex yéetel le máaxo'ob cabal u yóolo'obo'. Ma' a tucultique'ex jach canbalnaja'ane'ex. 17Ma' a bo'otique'ex kaas yéetel kaas ti' mix máac. Il a wile'ex a beetique'ex ba'al utz tu táan tuláacal máac. 18Je'el bix cu pa'ata'al ti' te'exo', beetex tac tu'ux cu páajtal a cuxtale'ex ich jéedzel yéetel tuláacal máac. 19In yaabilaj sucu'une'ex, ma' a sutique'ex le loob cu beeta'al te'exo', ba'ale' p'ate'ex u bo'olil tu kab Ku; tumen le Quili'ich Dzíibo' cu ya'alic: Teen unaj in jaadz, teen quin bo'ol, cu ya'alic Yuumtzil. 20Cu ya'alic xane': Wa a aj p'eec wi'ije' dzáa ba'al u jaante, wa ukaje', dzáa ja' u yuke'; tumen le quéen a beet beyo', ca beetic u sublactal u yich. 21Ma' a cha'ic u dzáancha'atiquech le kaaso'. Ba'ale' dzáancha'at le kaas yéetel le utzo'.


Copyright
Learn More

will be added

X\