Apocalipsis 9

1Le quinto ángelo' tu paxaj u trompetae', ca tin wilaj jun p'éel eek luba'an j lu'um; ca j dzaab ti' le eeko' u llaveil le jach taamcach ch'e'eno'. 2Tu séeblaquil tu je'aj le jach taamcach ch'e'eno', ca j na'ac buudz bey ti' jun p'éel nojoch chujcabe'; u buudzil le ch'e'eno' tu beetaj u éekjoch'e'ental le kiino' bey xan le iiko'. 3Ti' le buudzo' jóok sáako'ob cu xiknalo'ob yóokol le lu'umo'; ti' le sáako'obo' j dzaab páajtalil ti'ob je'el bix le yaan ti' le síinano'obo'. 4Ca j a'ala'ab ti'ob ma' u beetico'ob loob ti' u xíiwil le lu'umo', mix ti' wa ba'ax ya'ax, mix ti' jun cúul che', ba'ale' chéen ti' le máaxo'ob ma' chíiculta'ano'ob yéetel u chíicul Ku tu táan jo'olo'ob. 5Ba'ale' ma' j cha'ab ti'ob u quiimsico'ob le wíinico'obo', ba'ale' chéen ca u beeto'ob u mukyajo'ob tu yáam cinco winalo'ob, le mukyaj cu dzáico'obo' bey je'el bix le yajil cu mukyajtic jun túul máac le quéen chi'ibic tumen síina'ane'. 6Ti' le kiino'obo' le máaco'obo' yaan u caxtico'ob quíimil, ba'ale' ma' bíin u nuptáanto'obi'; tumen quex u káato'ob quíimile', le quíimilo' yaan u náachtal ti'ob. 7Le sáako'obo' chica'an ti' tzíimino'ob nu'ucbesa'ano'ob u ti'al ba'atelil; tu poolo'obe' yaan wa ba'ax chica'an ti' jun p'éel péet jo'ol beeta'an yéetel oro, u yicho'obe' bey u táan yich wíinique'. 8U tzo'otzel u poolo'obe' bey u tzo'otzel u pool co'olele', u cojo'obe' bey u coj leóne'. 9U wíinclilo'obe' búucbesa'an yéetel u búuquil ba'atel bey beeta'an yéetel hierroe', u juum u xiiko'obe' bey u juum ya'abcach bolan'ob jíilta'ano'ob tumen tzíimino'ob le quéen xi'ico'ob j ba'atele'. 10Yaan u nejo'ob bey u nej síina'ane' yaan xan u yaacho'ob tu nejo'ob yéetel páajtalil u ti'al u beetico'ob loob ti' máaco'ob tu yáam cinco winalo'ob. 11Le sáako'obo' yaan jun túul u ajawo'ob, lela' u ángelil le jach taamcach ch'e'eno'; le áangelo' u kaaba' ich hebreoe' Abdon, ich griegoe' Apolión. 12Dzo'oc u máan le yáax loobo', ba'ale' cu bineltic u láak ca'a p'éel. 13Le sexto ángelo' tu paxaj u trompetae', ca tin wu'uyaj jun p'éel t'aan cu jóokol ichil u can ti'itzil le u multuunil kultaj beeta'an yéetel oro yaan tu táan Kuo'. 14Le t'aano' tu ya'alaj ti' le sexto ángelo' máax ti' yaan le trompetae': Wach' le can túul ángelo'ob kaxa'ano'ob tu tzéel le nojoch áalcab ja' Éufrateso'. 15Bey túuno' j wa'ach' le can túul ángelo'obo' u ti'al ca u quiimso'ob jun p'éel ti' u yóox jaatz máaco'ob, tumen le can túul ángelo'obo' nu'ucbesa'ano'ob jach u ti'al le horao', le kiino', le winalo' yéetel le ja'abo'. 16Tin wu'uyaj jay túul u ba'atel máaco'ob cu nat'ico'ob tzíimin, yaan docientos millones. 17Bey úuchic in wilic le tzíimino'ob ichil le chíicbesajilo', le máaxo'ob nat'mailo'obo' cu bisico'ob tu tzeemo'obe' jun p'éel u búuquil ba'atel bona'an chac, ch'oj yéetel kankan. U pool le tzíimino'obo' bey u pool leóne', tu chi'obe' cu jóokol káak, buudz yéetel azufre. 18Le jun p'éel ti' u yóox jaatz le máaco'obo' quiimsa'ab tumen le óox p'éel ba'al cu jóokol tu chi' le tzíimino'obo': káak buudz yéetel azufre. 19Tumen u páajtalil le tzíimino'obo' ti' yaan tu chi'obe' yéetel tu nejo'ob; u nejo'obe' chica'an ti' nucuch caano'ob yaan u poolo'ob, yéetel lelo'oba' cu beetico'ob loob. 20Ba'ale' u yalab le máaco'obo', le ma' quiimsa'abo'ob tumen le ba'alo'oba', ma' tu kexaj u cuxtalo'ob u ti'al ca u p'ato'ob ba'ax cu beetico'ob, mix xan tu p'ato'ob u kultico'ob le kasa'anilo'obo' mix le beetbil kuo'ob beeta'ano'ob yéetel oro, plata, bronce, tuunich, bey xan yéetel che'o', ba'alo'ob ma' táan u páajtal u paacato'ob mix u yu'ubajo'ob mix u xíimbalo'ob. 21Le máaco'obo' mix xan tu kexaj u cuxtalo'ob u ti'al ca u p'ato'ob u quiimsico'ob wíinic, u pulya'ajo'ob, u nupkebano'ob yéetel u yoocolo'ob.


Copyright
Learn More

will be added

X\