Apocalipsis 8

1Le ca ja'at le séptimo chíicul tumen le j Tamano', ma' u'uya'ab mix jun p'éel juum te j ca'ano' tu yáam media horai'. 2Cu dzo'ocole' tin wilaj le siete ángelo'ob wa'alacbalo'ob tu táan Kuo'; ca j dzaab ti'obe' siete trompetaob. 3Taal xan u láak ángel u machmaj jun p'éel x p'ulut beeta'an yéetel oro, ca wa'alaj tu táan le u multuunil kultajo'; ca j dzaab ti'e' ya'abcach incienso' u ti'al u kub pa'ate' yéetel u payalchi'ob tuláacal le máaxo'ob quili'icho'obo', tu yóokol le u multuunil kultaj beeta'an yéetel oroo' ti' yaan tu táan le jala'ach káanche'o'. 4U buudzil le incienso' j na'ac ti' u kab le ángelo' tac tu táan Ku pa'ate' yéetel u payalchi'ob le máaxo'ob quili'icho'obo'. 5Le ángel túuno' tu ch'a'a le x p'uluto', tu chupaj yéetel u t'aba'an chúuquil le u multuunil kultajo, ca tu pulaj yóokol le lu'umo'; ca yanji quíilbal cháac, juumo'ob, léembal cháac yéetel quíilbal lu'um. 6Le siete ángelo'ob túuno', ti' máaxo'ob yaan le siete trompetaobo', tu nu'ucbesajuba'ob u ti'al u paxico'ob. 7Le yáax jun túul ángele' tu paxaj u trompetae', ca wéecch'inta'ab yóokol lu'um bat yéetel káak xa'akan yéetel ki'ik. Ca j eel jun p'éel ti' u yóox búujul le lu'umo' pa'ate' yéetel ti' jun p'éel u yóox jaatz le che'obo', bey xan jun p'éel ti' u yóox jaatz le ya'ax xíiwo'obo'. 8Le u ca'a túul ángelo' tu paxaj u trompetae', ca j pu'ul te j ka'anabo' jun p'éel ba'al bey jun p'éel nojoch pu'uc táan u yelele'; jun p'éel ti' u yóox jaatz le ka'anabo' suunaj ki'ikil. 9Jun p'éel u yóox jaatz tuláacal ba'al cuxa'an te j ka'anabo' j quíimi; jun p'éel ti' u yóox jaatz le cheemo'obo' j xu'ulsa'abi. 10Le u yóox túul ángelo' tu paxaj u trompetae'; ca j lúub jun p'éel nojoch eek, táan u yelel bey jun p'éel tajche'e'. J lúub tu yóokol jun p'éel óox jaatz le áalcab ja'obo' yéetel le sayabo'obo'. 11Le eeko' cu kaaba'intique' Si'isim; jun p'éel u yóox jaatz ti' le ja'obo' káajchaji', ya'ab wíinico'ob j quíimo'ob tu yo'olal le ja'obo', tumen káajchajo'ob. 12Le u can túul ángel tu paxaj u trompetae', ca j loobilta'ab ti' jun p'éel u yóox búujul le kiino', jun p'éel ti' u yóox búujul le ujo' yéetel jun p'éel ti' u yóox jaatz le eeko'obo'. Bey túuno' jun p'éel ti' u yóox búujulo'obe' j p'áat éekjoch'e'enil yéetel ma' tu dzaj u sáasilo'ob tu yáam jun p'éel u yóox jaatz le kiino' mix ti' le áakabo'. 13Cu dzo'ocole' j paacatnajene', ca tin wu'uyaj táan u xiknal jun túul ángel chúumuc ti' le ca'ano', táan u ka'am a'alic: ¡Yaj yanil, yaj yanil, yaj yanil le máaxo'ob caja'ano'ob te j lu'umo' le quéen juumnac le trompeta cun j paxbil tumen u láak óox túul ángelo'obo'!


Copyright
Learn More

will be added

X\