Apocalipsis 7

1Cu dzo'ocol lela' tin wilaj can túul ángelo'ob wa'alacbalo'ob tu can ti'itzil le lu'umo', táan u katico'ob u beel le can p'éel iikilo'ob lu'um tu yo'olal ma' u yustaj mix jun p'éel iik yóokol lu'um, mix yóokol mix jun cúul che'. 2Tin wilaj xan u láak ángel j lakin u taal yaan ti'e' u chíicul le cuxa'an Kuo'. Le ángela' tu ka'am aawtaj ti' le can túul ángelo'ob u kammajo'ob páajtalil u ti'al u beetico'ob loob ti' lu'um yéetel ti' ka'anab: 3Ma' a beetique'ex loob ti' lu'um, mix ti' ka'anab, mix ti' le che'obo' ca'aliquil ma' c dzáa u chíiculal u palitzilo'ob c Ku yéetel jun p'éel chíicul tu táan jo'olo'ob. 4Ca tin wu'uyaj buca'aj le dza'an u chíiculalo'obo': ciento cuarenticuatro mil ti' ichil tuláacal u chi'ibalilo'ob Israel. 5Doce mil j dza'ab u chíiculalo'ob ti' u chi'ibalil Judá, doce mil ti' u chi'ibalil Rubén, doce mil ti' u chi'ibalil Gad, 6doce mil ti' u chi'ibalil Aser, doce mil ti' u chi'ibalil Neftalí, doce mil ti' u chi'ibalil Manasés, 7doce mil ti' u chi'ibalil Simeón, doce mil ti' u chi'ibalil Leví, doce mil ti' u chi'ibalil Isacar, 8doce mil ti' u chi'ibalil Sabulón, doce mil ti' u chi'ibalil José, yéetel doce mil ti' u chi'ibalil Benjamín. 9Cu dzo'ocol lela' j paacatnajene' ca tin wilaj ya'abcach máaco'ob taaljano'ob ti' tuláacal múuch'cabil caajo'ob, ch'i'ibalo'ob, jejeláas t'aano'ob yéetel jejeláas caajo'ob, wa'alacbalo'ob actáan ti' le jalach káanche'o' yéetel actáan ti' le j Tamano'; tu yo'olal sen ya'ab le múuch'cabilo' mix máac cu páajtal u xoquic jay túulo'ob, búucbesa'ano'ob yéetel sac búuc yéetel u machmajo'ob u le' xa'an. 10Tuláacalo'ob táan u ka'am a'alico'ob: Le tocsajilo' u ti'al c Ku, máax culucbal te j jala'ach káanche'o' yéetel u ti'al le j tamano'. 11Tuláacal le ángelo'ob wa'alacbalo'ob tu bakpach le jala'ach káanche'o' yéetel tu bakpach le u nuuquilo'ob u caajil Israelo' yéetel tu bakpach xan le cuxa'an ba'alo'obo'; ca j noclajo'ob j lu'um actáan ti' le jala'ach káanche'e'o' ca tu kultajo'ob Ku, 12táan u ya'alico'ob: ¡Amén! Le qui'iqui' t'aano', le nojbe'enilo', le na'atilo', le graciao', le tziiquilo', le páajtalilo' yéetel le mu'uka'anilo' dza'abac ti' Ku u ti'al ja'abo'ob mina'an u xuul. Amén. 13Jun túul ti' le nojochil u caajil Israelo' tu káataj teen: Le búucbesa'ano'ob yéetel sac búuco', ¿Máaxo'obi' yéetel tu'ux u taalo'ob? 14Tene' tin núucaj ti': Yuumtzil, teche' a wojel. Leti'e' tu ya'alaj teen: Lelo'oba' leti'ob le máanja'ano'ob ti' nojoch yaayaj óolalo', u p'o'omaj u nooko'ob yéetel u saccuntmajo'ob xan yéetel u ki'ikel le j Tamano'. 15Tu yo'olal lelo' ti' yano'ob actáan ti' u jalach káanche' Kue', táan u meyajtico'ob bul kiin yéetel bul áakab tu kulnaj; le máax culucbal te jala'ach káanche'o' leti' canantico'ob tumen ti' yaan tu yéetelo'obe'. 16Ma' bíin u mukyajto'ob wi'iji' mix ukaji', ma' bíin tóoca'aco'ob tumen kiini', mix bíin u yu'ubo'ob ooxowi, 17tumen le j taman yaan chúumuc ti' le jala'ach káanche'o' leti' bíin u cananto'ob yéetel bíin u biso'ob ti' u sayabilo'ob u ja'il cuxtal; Ku bíin cho'ic tuláacal u ja'il u yicho'ob.


Copyrighted Material
Learn More

will be added

X\