Apocalipsis 3

1Dzíibnen xan ti' u ángel u iglesiail Sardis: Bey cu ya'alic le máax yaan u siete pixano'ob Ku ti'o', ti' máax yaan xan le siete eeko'obo': Tene' in wojel tuláacal ba'ax ca beetic; in wojel quimenech, quex tumen joka'an u tzicbalil cuxa'anech. 2Ajsabáa, yéetel mu'ukancuns le ba'alo'ob p'aatal ta'aytac u quíimilo'obo'; tumen dzo'oc in wilique' le ba'ax ca beetico' ma' toj tu táan Kui'. 3Ka'ajac teech le ca'ansaj ta kamajo'; dzo'ocbese yéetel kex a tuucul. Wa ma' ta wajsicabae' bíin taalaquen ti' teech bey jun túul j oocole' ma' bíin a wojéelt ba'ax kini'. 4Chéen ba'ale' yaan teech te Sardiso' dze'edzec máaco'ob ma' u pa'apak u nooko'obi', lelo'oba' yaan u máano'ob tin wéetel yéetel u sac búuco'ob, tumen unajmatmo'ob. 5Le máax cu dzáancha'atic le kaaso' yaan u sac búucbesa'al, ma' bíin in tup u kaaba' ti' u libroil le cuxtalo'; ba'ale' yaan in kaj óoltic tu táan in Taata yéetel tu táan u ángelo'ob in Taata. 6Le máax yaan u xiquine' u yu'ub ba'ax cu ya'alic Quili'ich Pixan ti' le iglesiaobo'. 7Dzíibnen xan ti' ángel u iglesiail Filafelfia: Bey cu ya'alic le máax quili'icho' yéetel le máax u jaajilo', ti' le máax yaan u llave ajaw David, le máax le quéen je'ekabnaque' mix máac cu páajtal u je'ic. 8Tene' in wojel tuláacal ba'ax ca beetic. Dzo'oc in dzáic ta táan jun p'éel jool naj je'ekab, mix máac cu páajtal u kalic; ba'ale' quex tumen chéen jun p'íit muuk yaan teche', dzo'oc a dzaj óoltic in t'aan yéetel ma' a cúulpachcunteni'. 9Bey túuno' le cu taalo'ob ti' u múuch'cabil u yocsaj óolalo'ob Satanaso', le cu tuuso'ob táan u ya'alicuba'ob judíobo', ba'ale' ma' jaaj wa leti'obi', yaan in beetic u taalo'ob yéetel u xoltalo'ob tu ni' a wooc u ti'al ca u yojéelto'ob tene' in yaacuntmajech. 10Tumen ta dzo'ocbesaj u t'aanil in chuca'an óolale', bíin in canantech ti' le túuntaj óolal bíin taalac ti' tuláacal yóokolcaabo' u ti'al u túuntic u yóol tuláacal le máaxo'ob caja'ano'ob yóokolcaabo'. 11Táan in taal tu séeblaquil. Canant le ba'ax yaan techo', u ti'al beyo' mix máac ca u lukes teech a péet jo'ol. 12Le máax cu dzáancha'atic le kaaso', tene' bíin in beet u ocomtuunichil u kulnaj in Ku, yéetel mix bikin cun jóokoli'; bíin in dzíibt ti' leti'e' u kaaba' in Ku, bey xan u kaaba' u caajal in Ku, leti' le túumben Jerusalén ti' u taalbal tu ca'anil in Ku; bey xan bíin in dzíibt ti' leti'e' in túumben kaaba'. 13Le máax yaan u xiquine' u yu'ub ba'ax cu ya'alic Quili'ich Pixan ti' le iglesiaobo'. 14Dzíibnen xan ti' u ángel u iglesiail Laodicea: Bey cu ya'alic le máax u jaajilo', le jaajcunaj chuca'an u yóolo', le máax cu ya'alic u jaajil, u yáax chuun tuláacal ba'alo'ob beeta'an tumen Kuo': 15Tene' in wojel tuláacal ba'ax ca beetic. In wojel ma' síisechi' mix chocoechi'. ¡Buca'aj ma'alobil wa síisech wa chocoech! 16Ba'ale' tumen chéen kíinalech, mix síisechi' mix chocoechi', bíin in ca'aj in xéech. 17Teche' ca wa'alic: Tene' ayikalen, táan u bin teen utzil yéetel mixba'al cu bineltic teen. Teche' ma' táan a ch'a'a nu'uctic wa jun túul máaquech mix ba'al u biilal, j káat máatanech, óotzilech, ch'óopech yéetel chacnulech. 18Le o'olale' quin tzol xiquintiquech ca a man ti' tene' oro lúubsa'an u kaasil yéetel káak, u ti'al beyo' ca ayikalchajquech tu jaajil; ca a man xan ti' tene' sac nook u ti'al a búucbesicabáa u ti'al ca a bal beyo' u subtalil a chacnulil; ca a man xan colirio u ti'al a dzáa ta wicho'ob u ti'al ca pacatnaquech. 19Tene' quin chich t'antic yéetel quin jadz t'antic tuláacal le máaxo'ob in yaacuntmajo'. Bey túuno' yanac a wóol yéetel kex a tuucul. 20Il a wile' tene' ti' yanen tu jool naje' táan in t'aan. Wa máax cu yu'ubic in t'aane', yéetel cu je'ic le jool najo', quin wocol tu yicnal, quin janal tu yéetel, leti' xane' cu janal tin wéetel. 21Le máax cu dzáancha'atic le kaaso' bíin in dzáa ti'e' ca culac tin wéetel tin jalach káanche', bey je'el bix tene' dzo'oc in dzáancha'atic le kaaso' yéetel dzo'oc in cutal yéetel in Taata tu jalaa'ch káanche'. 22Le máax yaan u xiquine' u yu'ub ba'ax cu ya'alic Quili'ich Pixan ti' le iglesiaobo'.


Copyright
Learn More

will be added

X\