Apocalipsis 21

1Cu dzo'ocole' tin wilaj jun p'éel túumben ca'an yéetel jun p'éel túumben lu'um; tumen le yáax ca'an yéetel le yáax lu'umo' j p'áat mina'ano'ob, le ka'anabo' j p'áat mina'an xan. 2Tene' tin wilaj le nojoch quili'ich caajo', le túumben Jerusalén, cu yéemel te j ca'ano', ti' Ku u taal. U nu'ucbesmubáa bey jun túul x dzo'ocol beel u ti'al, u yíichame'. 3Ca tin wu'uyaj jun p'éel ka'amcach t'aan cu taal te j ca'ano' ca tu ya'alaj: Ile, Ku cajacbal bejela'e' ichil máaco'ob. Yaan u cajtal tu yéetelo'ob, leti'obe' u caajalo'ob Ku, Junab Kue' yaan u yantal tu yéetelo'ob u ti'al u Kuinto'ob. 4Ku cun cho'ic tuláacal u ja'il u yicho'ob, ma' túun yantal quíimil, mix okol, mix yaj óolal, mix ki'inamil, tumen tuláacal ba'ax yaan ca'ache' dzo'oc u máan. 5Le máax culucbal te jalach káanche'o' tu ya'alaj: Ile', tene' táan in túumbencunsic tuláacal ba'alo'ob. Tu ya'alaj xan: Dzíibte, tumen le t'aano'oba' jach tu jaajil u jaajilo'ob. 6Cu dzo'ocole' tu ya'alaj teen: Dzoca'an yanil. Teen u yáax chuun bey xan u xuul, le Alfao' yéetel le Omegao'. Le máax ukaje', tene' x ma' bo'olile' quin dzáic ti'e' u yuk u ja'il sayabil cuxtal. 7Le máax cu dzáanche'etic le kaaso' yaan u kamic u ti'alint tuláacal lela'; tene' bíin u Kuinten, leti'e' bíin in paalinte. 8Ba'ale' le sajac wíinico'obo', le ma' ocsaj óolo'obo', le j p'ecbe'eno'obo', le quiimsaj wíinico'obo', le nup kebano'obo', le j pulya'ajo'obo', le máaxo'ob cu kultico'ob beetbil kuo'obo', yaan u bino'ob ichil u káakil azufre. Lela' leti' le ca'a quíimilo'. 9Ca j taal jun túul ti' le siete ángelo'ob ti' máaxo'ob yaan ca'ach le siete copaob chuuptac yéetel le u dzooc siete núumyajo'obo', ca tu ya'alaj teen: Co'oten ca in we'es teech le dzo'ocol beelo', u yatan le j Tamano'. 10Yáanal u páajtalil Quili'ich Pixane', le ángelo' tu bisajen ti' jun p'éel ca'anal pu'uc, ca tu ye'esaj teen u quili'ich caajil Jerusalén táan u yéemel ca'an ti' Ku u taal. 11Yaan u nojbe'enil Ku ti'. U jóopbale' bey u jóopbal jun p'éel co'ocoj tuuniche', bey jun p'éel u tuunichil jaaspe, sáaskale'en bey cristale'. 12Tu bakpach le caajo' yaan jun p'éel nojoch ca'anal pak yaan doce u jool najilo'ob, yéetel jun túul ángel ti' jujun p'éel u jool najil. Ti' le jool najo'obo' dzíibta'an u kaaba'ob u doce chi'ibalilo'ob Israel. 13Yaan óox p'éel u jool najilo'ob j lakin, óox p'éel j xaman, óox p'éel j noojol yéetel óox p'éel j chikin. 14U bakpach pakil le caajo' jedzecbal tu yóokol doce tuunicho'ob; ti' le tuunicho'obo' dzíibta'an u kaaba'ob u doce apóstoo'ob le j Tamano'. 15Le ángel cu t'aan tin wéetelo' yaan jun p'éel x p'isib ti' beeta'an yéetel oro u ti'al u p'isic le caajo', u jool najilo'ob bey xan u bakpach pakil. 16Le caajo' can tzéel beeta'anil; u chowaquile' láaj queet yéetel u cóochil. Le ángelo' tu p'isaj yéetel u x p'isib le caajo', u p'iisile' chuca'an docientos kilómetros; u chowaquil, u ca'analil yéetel u cóochile' láaj queeto'ob. 17Cu dzo'ocole' tu p'isaj u bakpach pakil, u p'iisile' sesenta y cuatro metros, je'el bix u p'isib wíinico'ob le cu meyaj ti' le ángelo'. 18Le bakpach pakilo' beeta'an yéetel u tuunichil jaspe, le caajo' beeta'an yéetel oro, chica'an ti' sáaskale'en vidrio. 19Le u tuunichilo'ob u chuun u bakpach pakilo' jadzutzquinta'ano'ob yéetel tuláacal u jejeláasil co'ocoj tuunicho'ob: u yáax jun p'éele' yéetel jaspe, u ca'a p'éele' yéetel safiro, u yóox p'éele' yéetel agata; u can p'éele' yéetel esmeralda; 20u cincoile' yéetel ónice; u seisile' yéetel cornalina; u sieteile' yéetel crisólito; u ochoile' yéetel berilo; u nueveile' yéetel topacio; u diecile' yéetel crisoprasa; u onceile' yéetel jasinto; u doceile' yéetel amatista. 21U doce jool najilo'obe' doce perlaob; cada jool naje' beeta'an yéetel perla. U kíiwiquil le caajo' beeta'an yéetel oro bey sáaskale'en vidrioe'. 22Ma' tin wilaj mix jun p'éel kulnaj ti' le caajo', tumen Yuumtzil Ku ti' máax yaan tuláacal páajtalile', leti' u kulnajil, bey xan le j tamano'. 23Le caajo' ma' kabéet ca sáasilcunta'ac tumen le kiino' mix tumen le ujo', tumen u nojbe'enil Ku sáasilcuntic, le j tamano' u sáasilil xan. 24Le múuch' caajo'ob toca'ano'obe' yaan u xíimbalo'ob tu sáasil le caajo', u ajawilo'ob yóokolcaabe' yaan u taasico'ob u nojbe'enilo'ob ti'. 25U jool najilo'obe' ma' bíin ka'alac yéetel kiini', tumen te'elo' ma' bíin yanac áakabi'. 26Bíin bisa'ac te'elo' u nojbe'enil yéetel u tzicbe'enil le múuch' ocsajo'obo'; 27ba'ale' mix bikin bíin ococ ba'al kaas te'elo', mix le máax beetic p'ecbe'en ba'alo'ob wa tuusil ba'alo'obo', ba'ale' chéen le máaxo'ob dzíibta'an u kaaba'ob tu ju'unil cuxtal yaan ti' le j Tamano'.


Copyright
Learn More

will be added

X\