Apocalipsis 20

1Cu dzo'ocole' tin wilaj jun túul ángel táan u yéemel ti' ca'an yéetel u llaveil le jach taamcach ch'e'eno', yéetel jun p'éel cadena tu kab. 2Le ángela' tu machaj le nojoch caano', lela' kasilba'al wa Satanás, ca tu kaxaj tu yáam mil ja'abo'ob. 3Ca tu pulaj te jach taamcach ch'e'eno', tu'ux tu kalaj ca tu pakaj u jool, u ti'al ma' u tusic le múuch'; caajo'obo', p'is u máan mil ja'abo'obe'. Cu dzo'ocol u máan le mil ja'abo'obo', yaan u jáalkabta'al dze'edzec kiin. 4Cu dzo'ocole' tin wilaj jala'ach káanche'ob, tu'ux culucbalo'ob le máaxo'ob tu kamajo'ob páajtalil u ti'al u p'is óolo'obo'. Tin wilaj xan u pixano'ob le máaxo'ob xo'ot u poolo'ob tu yo'olal u jaajcunajil Jesús yéetel tu yo'olal u t'aan Ku, máaxo'ob ma' tu kultajo'ob le nojoch ba'alche'ob mix u yoochel, mix tu cha'ajo'ob u dza'abal u chíiculal tu táan jo'olo'ob mix tu kabo'ob. Tin wilaje' lelo'oba' j cuxlajo'ob tu ca'a téene' ca tu beetaj u jalachilo'ob yéetel Cristo tu yáam mil ja'abo'ob. 5Ba'ale' le u láak quimeno'obo' ma' cuxlajo'ob tu ca'a téeni' p'iis máanic le mil ja'abo'obo'. Lela' leti' le yáax ca'a púut cuxtalo'. 6Qui' u yóol yéetel quili'ich le máax yaan u táacpajal ti' le ca'a púut cuxtalo'. Le ca'a quíimilo' mina'an mix jun p'íit u páajtalil tu yóokol lelo'oba', ba'ale' bíin u beet u aj kiinilo'ob u ti'al Ku bey xan u ti'al Cristo, yaan xan u beetic u jalachilo'ob tu yéetel Cristoe' tu yáam mil ja'abo'ob. 7Le quéen máanac le mil ja'abo'obo' Satanase' yaan u jáalkabta'al. 8Yaan u jóokol u tuus múuch' caajo'ob ti' u yóokolcaabo'. Yaan u jóokol u tuus Gog bey xan Magog, yaan u much'quintic ba'atel máaco'obe' u ti'al u ba'atel, u ya'abilo'obe' bey le sa'am lu'um yaan tu jáal ka'anabo'. 9Bey túuno' j na'aco'ob ti' tuláacal u cóochil le lu'umo' ca tu bakpachto'ob u cajtalil le máaxo'ob quili'icho'obo', bey xan le caaj yaabilta'ano'. Ba'ale' Kue' tu beetaj u yéemel káake', ca tu láaj tóocajo'ob. 10Le kasilba'al máax tuso'obe' j pu'ul ichil u káakil azufre, tu'ux pu'ul le nojoch ba'alche'o' yéetel le tuusil aj bóobato'. Ti' cun mukyajo'ob yéetel kiin bey xan yéetel áakab u ti'al ja'abo'ob mina'an u xuul. 11Tin wilaj túun jun p'éel nojoch sac jala'ach káanche' yéetel máax culucbali'. Tu táane' jun puli' p'áat mina'an le lu'umo' mix le ca'ano', mix tu'ux caxta'abo'ob. 12Ca tin wilaj le quimeno'obo', nuuctaco'ob yéetel mejentaco'ob, wa'alacbalo'ob tu táan Ku; ca je'ekabta'ab le libro'obo', je'ekabta'ab xan u láak libro, lela' u libroil le cuxtalo'. Le quimeno'obo' p'is óolta'abo'ob tu yo'olal le ba'axo'ob u beetmajo'obe' je'el bix dzíibta'anil ti' le libro'obo'. 13Le ka'anabo' tu kubaj le quimeno'ob yaan ichilo', le quíimilo' yéetel u cúuchil le quimeno'obo' tu kubajo'ob xan le quimeno'ob yaan ti'obo'; tuláacalo'ob p'is óolta'abo'ob je'el bix le ba'alo'ob u beetmajo'obe'. 14Le quíimilo' yéetel u cúuchil le quimeno'obe' j pu'ulo'ob ichil u káakil azufre. Le káaka' leti' le ca'a quíimilo'; 15ti' j pu'ulo'ob le máaxo'ob ma' dzíibta'an u kaaba'ob tu libroil le cuxtalo'.


Copyright
Learn More

will be added

X\