Apocalipsis 2

1Dzíibnen ti' u iglesiail u ángel Efeso: Bey cu ya'alic le máax yaan le siete eeko'ob tu x no'oj kabilo', le máax cu máan xan ichil le siete x t'uchub sáasilo'ob beeta'an yéetel oroo'. 2Tene' in wojel tuláacal ba'ax ca beetic, in kaj óol a talam meyaj bey xan a chuca'an óolal, in wojel ma' táan u páajtal a mukyajtic le kaakas máaco'obo'. In wojel bix úuchic a túuntic u yóol le máaxo'ob cu ya'alicuba'ob apóstolo'obo', yéetel dzo'oc in wilic ma' leti'obi' ba'ale' chéen táan u tuuso'ob. 3Chúucpaj a wóol, mukyajnaje'ech yéetel meyajnajech ya'ab tin wo'olal, mix jun téen j lúub a wóol. 4Ba'ale' yaan teen jun p'éel tac pool ta wo'olal: mina'an teech le yaacunaj yanji teech tu yáax chuune'. 5Le o'olale' ka'ajac teech tu'ux lúubech; kex a cuxtal yéetel beet le ba'ax ta beetaj tu yáax chuune'. Wa ma' ta beetic beyo', tu séeblaquil quin taal in lukes a x t'uchub sáasil tu cúuchil, wa ma' ta kexic a cuxtal. 6Ba'ale' yaan teech jun p'éel ba'al ma'alob: a p'ectmaj le ba'ax cu beetic le Nicolaitaobo', lela' teen xane' in p'ectmaj. 7Le máax yaan u xiquine', ca u yu'ub ba'ax cu ya'alic Quili'ich Pixan ti' le iglesiaobo': Ti' le máaxo'ob cu dzáancha'atic le kaaso' bíin in dzáa u jaant u yich u che'il cuxtal yaan tu cúuchil u qui'imac óolal Ku. 8Dzíibnen xan ti' u ángel u iglesiail Esmirna: Bey cu ya'alic le máax u yáax chuun yéetel u xuulo', le máax quíimo' yéetel dzo'oc u ca'a púut cuxtal: 9Tene' in wojel tuláacal ba'ax ca beetic; in kaj óol a mukyajo'ob, bey xan a wóotzilil, quex tumen u jaajile ayikalech. In wojel bix u yúuchul t'aan kaas ta wo'olal tumen le máaxo'ob cu ya'alicuba'ob judíob ba'ale' chéen u múuch'cabil u ocsaj óolalo'ob satanás. 10Ma' u yantal teech sajaquil ti' ba'ax bíin a mukyajte; tumen le kaasil ba'alo' yaan u beetic u ka'alal dze'edzec ti' te'exe' tu yo'olal u túunta'al a wóole'ex tuláacalile'ex; bíin mukyajnaque'ex tu yáam diez kiino'ob. Ba'ale' chuca'anchajac a wóol tac tu kiinil a quíimil, teen túune' bíin in dzáa teech u péet jo'olil cuxtal. 11Le máax yaan u xiquine' u yu'ub ba'ax cu ya'alic Quili'ich Pixan ti' le iglesiobo': Le máax cu dzáancha'atic le kaaso' ma' bíin loobilta'ac tumen le ca'a quíimilo'. 12Dzíibnen xan ti' u ángel u iglesiail Pérgamo': Bey cu ya'alic le máax ti' yaan le máascab pupudzquil ca'amat u yejo'. 13Tene' in wojel tuláacal ba'ax ca beetic, in wojel xan ti' cajacbalech tu'ux cu dzo'ocbesic u yóol Satanaso', chéen ba'ale' teche' táan a beetic in meeyjul. Ma' a p'at a wocsaj óoltiqueni', mix ti' u kiinilo'ob le ca quiimsa'ab Antipas in jach chuca'an óol jaacunaj, máax quiimsa'ab ichile'ex te tu'ux cajacbal Satanaso'. 14Ba'ale' yaan teech dze'edzec ba'alo'ob ta wóokol: Yaan teech te Pérgamo dze'edzec máaxo'ob ma' u káat u p'ato'ob u ca'ansaj Balaam, le máax tu tzol xiquintaj Balac ca u beet u kebanchajal le j israelitaob iquil u jaantico'ob le ba'alo'ob kuba'an ti' le beetbil kuo'obo' yéetel iquil u yantalo'ob ti' kaakas cuxtalil. 15Bey xan yaan teech te'elo' dze'edzec máaxo'ob ma' u káat u p'ato'ob u ca'ansaj le Nicolaitaobo', le ca'ansaj in p'ectmaj. 16Tu yo'olal lelo' kex a tuucul; tumen wa ma' ta kexique', bin in ca'a tu séeblaquil ta wicnal, bíin ba'atelnaquen xan tu yéetelo'ob yéetel le máascab cu jóokol tin chi'o'. 17Le máax yaan u xiquine' u yu'ub ba'ax cu ya'alic le Quili'ich Pixan ti' le iglesiaobo': Le máax cu dzáancha'atic le kaaso' bíin in dzáa u jaant le manaj ta'aca'ano'; bíin dzáa xan ti'e' jun p'éel sac tuunich, ti' le tuunicho' dzíiba'an jun p'éel túumben kaaba' mix máac kaj óoltmail wa chéen le máax kamico'. 18Dzíibnen xan ti' u ángel u iglesiail Tiatira: Bey cu ya'alic u Paal Ku, le máax yaan u yicho'obe' bey u tóoch'bal káake' yéetel u yooco'obe' bey bronce dzidzibquie': 19Tene' in wojel tuláacal ba'ax ca beetic; in kaj óol a yaacunaj, a wocsaj óolal, a meyaj bejela'e' ma' je'el bix ca'ache'. 20Ba'ale' yaan teen jun p'éel ba'al ta wóokol: tumen ca cha'ic u ca'ansaj le co'olel cu kaaba'itic Jezabel cu ya'alic táan u t'aan tu kaaba' Kuo', ba'ale' chéen táan u tusic in palitzilo'ob yéetel u ca'ansaj u ti'al u beet u nupkebantalo'ob yéetel u jaanto'ob ba'alo'ob kuba'an ti' beetbil kuo'ob. 21In dzaamaj ti' leti' kiin u ti'al ca u kex u tuucul, ba'ale' ma' u yóolt u kex u tuucul u ti'al ca u p'at u nupkebani'. 22Bejela'e' bin in ca'aj in beet u lúubul ti' koja'anil tu kam yéetel ca ya'abchajac u mukyaj le máaxo'ob cu nupkebano'ob tu yéetelo', wa ma' tu kexic u tuuculo'ob ca u p'ato'ob le ba'axo'ob cu beetic leti'o'. 23Bíin in quiims u paalalo'ob leti'. Beyo' tuláacal le iglesiaobo' yaan u yojéeltico'obe' tene' in kaj óol tac u sen taamil le tuuculo', bey xan u sen taamil le pucsi'ikalo'; ti' jujun túul ti' te'exe' yaan in bo'otic je'el bix a beetmaje'exe'. 24Ba'ale' ti' tuláacal máaxe'ex yane'ex Tiatira, máaxe'ex ma' táan a bine'ex tu paach le ca'ansajo' mix a kaj óoltmaje'ex le ba'axo'ob cu ya'ala'al u ta'acbil ba'alilo'ob Satanaso', quin wa'alic te'exe' ma' táan in dzáic te'ex u láak cuuch. 25Ba'ale' canante'ex le ba'ax yaan te'exo' tac quéen taalaquen. 26Le máax cu dzáancha'atic le kaaso' yéetel cu beetic in meyajo'ob tac tu xuule', bíin in dzáa páajtalil ti'e' yóokol nucuch caajo'ob, 27je'el bix in Taata tu dzaj teen páajtalile', yaan in beetic u jalachil tu yóokol nucuch caajo'obo' yéetel chichich kab, bíin u xe'exet'o'ob je'el bix u xe'exet'a'al katil cuume'. 28Bíin in dzáa xan ti'e' le ja'atzcab kiin eeko'. 29Le máax yaan u xiquine', u yu'ub ba'ax cu ya'alic Quili'ich Pixan ti' le iglesiaobo'.


Copyright
Learn More

will be added

X\