Apocalipsis 19

1Cu dzo'ocol lela' tin wu'uyaj u ka'amcach t'aan máaco'ob te j ca'ano', táan u ya'alico'ob: ¡Aleluya! Le tocsajilo', le nojbe'enilo', yéetel le páajtalilo' u ti'al c Junab Ku 2tumen u p'is óole' toj yéetel jaaj; tumen dzo'oc u p'is óoltic le nojoch x nupkeban co'olelo' máax kascunt yóokolcaab yéetel u nupkeban, yéetel dzo'oc u sutic tu yóokole' u loobil quiimsa'abic u palitzilo'ob. 3Cu dzo'ocole' tu ya'alajo'ob tu ca'a téen: ¡Aleluya! U buudzil le caajo mix bikin bíin jáawac u na'acal. 4Le veinticuatro u nuuquilo'ob u caajil Israelo' yéetel le can túul cuxa'an ba'alo'obo' noclajo'obe' ca tu kultajo'ob Ku máax culucbal te j jala'ach káanche', táan u ya'alico'ob: ¡Amén! ¡Aleluya! 5Ca túun u'uya'ab jun p'éel t'aan jóok te j jala'ach káanche'o', táan u ya'alic: Qui'iqui' t'ante'ex Ku, tuláacale'ex ca meyajtique'ex yéetel le máaxe'ex sajaque'ex ti'o', mejentaque'ex yéetel nuuctaque'ex. 6Tin wu'uyaj xan jun p'éel ba'al bey u t'aan ya'abcach máaco'obe', bey u juum ya'abcach áalcab ja'obe' yéetel bey u quíilbal ka'amcach cháaque', táan u ya'alic: ¡Aleluya! Tumen dzo'oc u chu'unpajal u beetic u jala'achil Yuumtzil c Ku, ti' máax yaan tuláacal páajtalil. 7Qui'imacchajac c óol, co'ox chupicbáa yéetel qui'imac óolal yéetel co'one'ex dzáic nojbe'enil ti', tumen dzo'oc u kuchul u kiinil u dzo'ocol u beel le j Tamano'. U yatane' dzo'oc u nu'ucbesicubáa. 8J dzaab ti'e' u búucbescubáa yéetel linoo', tumen cu ye'esic u tojil u cuxtal le máaxo'ob quili'icho'obo'. 9Ca túun tu ya'alaj teen le ángelo': Dzíibte: Qui' yóolo'ob le máaxo'ob t'aanajo'ob ti' qui'imac óolalil u dzo'ocol u beel le j Tamano'. Ca tu ya'alaj teen: Le t'aano'oba' u jaajil T'aano'ob Junab Ku 10Ca j xolajen tu ni' yooc le ángel u ti'al in kultico', ba'ale' tu ya'alaj teen: Ma' beetic lelo'; tumen tene' u palitzilen Ku jeel bix teche' yéetel je'el bix a sucu'uno'ob máaxo'ob jeedzel yanilo'ob ti' u ca'ansajo'ob Jesuso'. Tumen le jaajil t'aan ca'ansa'ab tumen Jesuso' cu sáasilcuntic u na'at le aj bóobato'obo'. 11Tin wilaj je'ekab le ca'ano'; ca chíicpaj jun túul sac tzíimin, le máax nat'mailo' cu kaaba'intic Chuca'an óol yéetel jaaj óol, tumen cu p'is óol bey xan cu ba'atel yéetel tojil. 12U yicho'obe' cu jóopbal bey u tóoch'bal káake', tu poole' yaan ya'abcach péet jo'olo'ob, ti' leti'e' yaan jun p'éel kaaba' dzíibta'an chéen leti' kaj óoltmail. 13U búuquintmaj jun p'éel nook boonol yéetel ki'ik, u kaaba'e' u T'aan Ku. 14Cu tzaypachta'al tumen u múuch'cabil u cajnáalilo'ob ca'an, u búucbesmajuba'ob yéetel sac lino ma' pa'apaki', u nat'ma'ob sac tzíimino'ob. 15Tu chi'e' cu jóokol jun p'éel máascab yaan u yej u ti'al u beetic loob tu yéetele' ti' le múuch' caajo'obo'; yaan u beetic u jalachil yéetel jun p'éel x p'isib beeta'an yéetel hierro. Leti'e' yaan u p'is óoltico'ob bey je'el bix le máax cu yedzic uva yéetel u yooco'obe', yaan u beetic u yukico'ob u vinoil le yaj jaadz cu taal ti' u p'u'ujul Ku ti' máax yaan tuláacal páajtalil. 16Dzíibta'an tu nook yéetel tu muuk yooque' u kaaba': U ajaw ajawo'ob yéetel u Yuumtzil yuumtzilo'ob. 17Cu dzo'ocole' tin wilaj jun túul ángel wa'alacbal tu yóokol le kiino', ca tu ka'am t'anaj tuláacal le ch'íich'o'ob cu xiknalo'ob j ca'ano': Co'otene'ex, much'aba'ex u ti'al u noj janal Ku, 18u ti'al ca jaante'ex u bakel ajawo'ob, u bakel noj poolo'ob, u bakel mu'uka'an máaco'ob, u bakel tzíimino'ob yéetel u bakel máaxo'ob nat'mailo'ob, u bakel tuláacal máaco'ob, quex jáalkabo'ob wa palitzilo'ob, quex mejentaco'ob wa nuuctaco'ob. 19Ca túun tin wilaj le nojoch ba'alche'o' yéetel u ajawilo'ob yóokolcaab yéetel u ba'atel máaco'obe', dzo'oc u much'cuba'ob j ba'atel u ti'al u beetico'ob loob ti' le máax nat'mail le tzíimino' yéetel u ba'atel máaco'ob. 20Le nojoch ba'alche'o' j ma'ache' ca j ka'al pa'ate' yéetel le tuusil aj bóobate' le máax tu beetaj chíiculo'ob tu táane'. Yéetel le chíiculo'obo' le tuusil aj bóobato' tu tusaj le máaxo'ob tu cha'ajo'ob u dza'abal ti'ob u chíicul le nojoch ba'alche'o' yéetel tu kultajo'ob u yoochel xan. Le nojoch ba'alche'ob bey xan le tuusil aj bóobato' j pu'ulo'ob cuxa'anta'aco'ob ichil u káakil azufre. 21Le u láako'obo' quiimsa'abo'ob yéetel le máascab cu jóokol tu chi' le máax nat'mail le tzíimino', tuláacal le ch'íich'o'obo' tu na'ajcunsuba'ob yéetel u bakel le quimeno'obo'.


Copyrighted Material
Learn More

will be added

X\