Apocalipsis 17

1Ca j taal jun túul ti' le siete ángelo'ob ti' máaxo'ob yaan le siete copaobo' ca tu ya'alaj teen: Co'oten, bin in ca'aj in we'es teech u xot kinajil le nojoch nupkeban co'olel culucbal tu yóokol le ja'abo'. 2U ajawilo'ob u yóokolcaabe' dzo'oc u cuxtalo'ob ich nup keban tu yéetel, u cajnáalilo'ob lu'ume' dzo'oc u cáaltalo'ob yéetel u yuklil u nup keban. 3Tu yáanal u páajtalil Quili'ich Pixane', le ángelo' tu bisajen ti' jun p'éel x tocoy lu'um, te'elo' tin wilaj jun túul co'olel culucbal yóokol jun túul nojoch ba'alche', chuup yéetel pooch'ilo'ob dzíibta'ano'ob iquil u po'och'ol Yuum Ku, le ba'alche'o' yaan siete u pool yéetel siete u dzíitil u baac. 4U búuc le co'olelo' ch'oj chac yéetel chac jadzutzquinta'an yéetel oro, co'ocoj tuunicho'ob, bey xan yéetel perla'ob. Tu kabe' yaan jun p'éel copa beeta'an yéetel oro chuup yéetel p'ecbe'en ba'alo'ob bey xan yéetel u kóokolil u nup keban; 5tu táan jo'olale' dzíiba'an jun p'éel balbil kaaba': Le nojoch Babilonia, u maama tuláacal x nupkebano'ob yéetel tuláacal le ba'ax p'ecbe'en yóokolcaabo'. 6Tu séeblaquile' tin kaj óoltaje' le co'olelo' cala'an yéetel u ki'ikel le máaxo'ob quili'icho'obo' bey xan yéetel u ki'ikel le máaxo'ob quiimsa'abo'ob tu yo'olal u kaaba' Jesuso'. Le ca tin wilaj lelo', j p'áaten sen jaka'an in wóol. 7Ca tu ya'alaj teen le ángelo': ¿Ba'axten jaka'an a wóol? Bin in ca'aj in beet a wojéeltic ba'ax u káat u ya'al u balbil kaaba' le co'olelo' yéetel ba'ax u káat ya'al le nojoch ba'alche' bisico', le yaan siete u poolo' yéetel diez u dzíitil u baaco'. 8Le nojoch ba'alche' dzo'oc a wilico' yaan ca'achi, bejela'e' mina'an; ba'ale' quex beyo' bin u ca'aj jóokol ti' le jach taamcach ch'e'eno' u ti'al u binbal ti' quíimil mina'an u xuul. U cajnáalilo'ob lu'ume', le máaxo'ob ma' dzíiba'ano'ob tu libroil cuxtal le ca j beeta'ab yóokolcaabe', yaan u ja'akal u yóolo'ob le quéen u yilo'ob le nojoch ba'alche' yaan ca'acho' bejela'e' mina'an, ba'ale' yaan u suut tu ca'a téen. 9Te'ela' yaan ba'ax u ti'al le máaco'ob cu páajtal u na'atico'obe': Le siete poolo'obo' cu ye'esic le siete pu'uco'ob tu'ux culucbal le co'olelo'; 10cu ye'esico'ob xan siete ajawo'ob. Cinco u túululo'obe' dzo'oc u lúubulo'ob, jun túul ti'obe' táan u beetic u jalachil bejela'e', u dzooc jun túule' ma' taalaqui'. Le quéen taalaque' ma' tu xáantal u jalachil. 11Le nojoch ba'alche' yaan ca'ache' ba'ale' bejela'e' mina'ane', leti'e' u ocho u túulul ajaw, quex leti'e' jun túul ti' le sieteobo', cu dzo'ocole' cu bin ti' quíimil mina'an u xuul. 12Le diez u dzíitil baac dzo'oc a wilico' diez ajawo'ob ma' cáajac u beetico'ob u jalachilo'obi'; ba'ale' yaan u kamico'ob páajtalil bey ajawo'obe' chéen tu yáam jun p'éel hora jun múuch' yéetel le nojoch ba'alche'o'. 13Le diez ajawo'oba' jun p'éelili' u tuuculo'ob yaan u dzáico'ob u muuko'ob yéetel u páajtalilo'ob ti' le nojoch ba'alche'o'. 14Yaan u ba'atelo'ob u ti'al u beetico'ob loob ti le j tamano', ba'ale' yaan u dzáanche'eta'alo'ob tumen le j tamano'; tumen leti'e' u Yuumtzil yuumtzilo'ob yéetel u Ajaw ajawo'ob, le máaxo'ob yaan tu yéetelo' t'ana'ano'ob yéetel yéeya'ano'ob tumen Ku, chuca'an u yóolo'ob ti' leti'. 15Le ángelo' tu ya'alaj xan: Le ja'abo'ob ta wilaj tu'ux culucbal le x nupkeban co'olelo', leti'ob le caajo'ob, máaco'ob, jejeláas t'aano'ob yéetel múuch' caajo'obo'. 16Le diez u dzíitil baaco'ob ta wilaj ti' le nojoch ba'alche'o' yaan u p'ectico'ob le x nupkeban co'olelo', yaan xan u xúump'atico'ob tu juunal yéetel chacnul; yaan u jaantico'ob u bakel u wíinclil yéetel yaan u tóquico'ob ti' káak. 17Ku dzáa tu pucsi'ikalo'ob ca u beeto'ob le ba'ax u káat leti'e' le ca jun p'éelili'ichaj u tuuculo'obe' ca tu dzajo'ob le páajtalil ajaw yaan ti'obo' ti' le nojoch ba'alche'o' tac quéen dzo'ocpajac u t'aan Ku. 18Le co'olel ta wilajo' leti' le nojoch caaj yaan páajtalil ti' tu yóokol u ajawilo'ob yóokolcaabo'.


Copyright
Learn More

will be added

X\