Apocalipsis 16

1Tin wu'uyaj túun jun p'éel ka'amcach t'aan cu jóokol ti' le quili'ich cúuchilo', táan u ya'alic ti' le siete ángelo'obo': Xeene'ex a weque'ex yóokolcaabe' u siete copailo'ob u p'u'ujul Ku. 2Le yáax jun túul ángelo' bine' ca tu wecaj u copa yóokolcaab, ti' tuláacal le máaco'ob yaan u chíicul le nojoch ba'alche' ti'obo' yéetel cu kultico'ob u yoochele', jóok ti'ob jun p'éel yaayaj kaakas chu'uchum. 3Le u ca'a túul ángelo' tu wecaj u copa yóokol ka'anab, u ja'il le ka'anabo' j suunaj ki'ikel bey u ki'ikel jun túul quimene', ca j quíim tuláacal ba'ax cuxa'an te j ka'anabo'. 4Le u yóox túul ángelo' tu wecaj u copa yóokol áalcab ja'ob yóokol sayabo'ob, ca j suunajo'ob ki'ikel. 5Tu séeblaquile' tin wu'uyaj u ya'alic u ángelil le ja'obo': Teche' tojech tumen dzo'oc a p'is óol beyo', Yuumtzil, quili'ich Ku, máaxech yanech bejela'e' yéetel yanili'eche', 6tumen leti'obe' tu wecajo'ob u ki'ikel le máaxo'ob quili'icho'obo' bey xan u ki'ikel le aj bóobato'obo'; bejela'e' dzo'oc a beetic u yukico'ob ki'ik; ¡Tumen bey cu najmatico'ob! 7Tin wu'uyaj xan jun p'éel t'aan cu jóokol ti' le u muultunil kultajo', táan u ya'alic: Bey, Yuumtzil Ku, ti' máax yaan tuláacal páajtalil, dzo'oc a p'is óol yéetel jaajil bey xan yéetel tojil. 8Le u can túul ángelo' tu wecaj u copa yóokol kiin, ca j dza'ab ti' le kiino' páajtalil u ti'al u tóoquic máaco'ob yéetel káak. 9Le máaco'obo' j tóoca'abo'ob yéetel nojoch ooxowil, ba'ale' ma' tu kexaj u tuuculo'obi' mix tu nojbe'encunto'ob Kui', ba'ale' tu poch'ajo'ob u kaaba' Ku, ti' máax yaan páajtalil tu yóokol le núumyajo'obo'. 10Le u quinto ángelo' tu wecaj u copa yóokol u jalach káache le nojoch ba'alche'o', beyo' u ajawile' j p'áat ich éekjoch'e'enil; le máaco'obo' tu yaayaj chi'ilantaj u yaako'ob; 11ba'ale' mix bey tu yóoltajo'ob u kex u tuuculo'ob u ti'al u p'áatico'ob le kaas cu beetico'obo', ba'ale' tu poch'ajo'ob u Kuil ca'an tu yo'olal u yaayaj mukyajo'ob yéetel tu yo'olal u chu'uchumo'ob. 12Le u sexto ángelo' tu wecaj u copa yóokol nojoch áalcab ja'il Éufrates, u ja'il le áalcab ja'o' j tiji u ti'al u je'ic beyo' jun p'éel bej u ti'al u ajawo'ob j lakin. 13Ca tin wilaj túune' tu chi' le caano', tu chi' le nojoch ba'alche'o', yéetel tu chi' le tusil aj bóobato' táan u jóokol óox túul kaakas pixano'ob beyo'ob muuche'. 14Lelo'oba' u pixano'ob kasiba'alo'ob cu beetico'ob chíiculo'ob, táan u jóokolo'ob u much'quinto'ob tuláacal u ajawo'ob yóokolcaab u ti'al u ba'atelil u nojoch kiinil Junab Ku, ti' máax yaan tuláacal páajtalil. 15Ile'ex, tene' táan in taal ti' le kiin mix máac pa'atiquene', je'el bix u taal jun túul j oocole'. Qui' u yóol máax ma' táan u wenel yéetel u nu'ucbesmaj u nook u ti'al ma' u máan chacnul yéetel u ti'al ma' u yila'al u subtalil. 16Ca tu much'quinto'ob le ajawo'ob ti' le cúuchil cu kaaba'intic ich hebreoe' Armagedón. 17Le u séptimo ángelo' tu wecaj u copa ti' iik, ca jóok jun p'éel ka'amcach t'aan ti' le jalach káanche' yaan te j quili'ich cúuchilo', táan u ya'alic: Dzoca'an yanil. 18Ca túun yanji' léembal cháac, juumo'ob yéetel quíilbal cháaco'ob; le lu'umo' quíilbanaj yéetel jun p'éel nojoch quíilbal lu'um mix jun téen ila'an u láak beyo' ca'aliquil yanac wíinic yóokolcaab. 19Le nojoch caajo' jóok óox búuj ti', u caajilo'ob yóokolcaabe' júutla'ajo'ob; ca ka'aj ti' Kue' u nojoch caajil Babilonia u ti'al ca u beet u yukic u yuklil le u p'u'ujulil tu túuxtaj ti'o'. 20Tuláacal le peteno'obo' yéetel le pu'uco'obo' sa'ato'ob. 21U nucuch batil ca'ane' j káax yóokol wíinico'ob, míin cuarenta kilos u aalil cada jun p'éel. Le wíinico'ob túuno' tu poch'ajo'ob Ku tu yo'olal u núumyajil le bato', tumen jun p'éel jaadz jach nojoch.


Copyright
Learn More

will be added

X\