Apocalipsis 13

1Wa'alacbalen tu jáal ka'anabe', ca tin wilaj u jóokol ichil le ka'anabo' jun túul nojoch ba'alche' yaan siete u poolo'ob yéetel diez u dzíitil u baaco'ob. Ti' cada jun dzíit u baaque' yaan jun p'éel péet jo'ol, ti' u poolo'obe' yaan jun p'éel kaaba' cu ya'alic ba'al ti' Ku. 2Le nojoch ba'alche' tin wilajo' chica'an ti' jun túul j coj, u yoco'obe' bey u yooco'ob osoe', u chi'e' bey u chi' léone'. Le caano' tu dzáa u muuk yéetel u jalach káanche' ti', bey xan nojoch páajtalil. 3Jun p'éel u pool le nojoch ba'alche'o' bey loobilta'an u ti'al quíimile'; ba'ale' le loob beeta'an ti'o' utzchaji'. tuláacal u cajnáalilo'ob yóokolcaabe' chu'upo'ob yéetel jak óolale' ca j bino'ob tu paach le nojoch ba'alche'o'. 4Tu kultajo'ob le caano' tumen tu dzáa páajtalil ti' le nojoch ba'alche'o', tu kultajo'ob xan le nojoch ba'alche'o', táan u ya'alico'ob: ¿Máax yaan je'el bix le nojoch ba'alche'a'? ¿Máax je'el u páajtal u bin u beet loob ti'e'? 5J cha'ab xan ti' le nojoch ba'alche'o' u ya'alic nucuch ba'alo'ob yéetel pooch'ilo'ob ti' Ku, yéetel ca yanac páajtalil ti' tu yáam cuarenta yéetel dos winalo'ob. 6Bey tu beetilo'; t'aanaj kaas tu y'oolal Ku yéetel tu poch'aj u kaaba' Ku, u quili'ich najil, bey xan le máaxo'ob yano'ob te j ca'ano'. 7J cha'ab xan ti'e' u bin u ba'atelt le máaxo'ob quili'icho'obo', tac u dzáanche'etico'ob; bey xan j dza'ab páajtalil ti' tu yóokol tuláacal ch'i'ibal, caaj, jejeláas t'aan yéetel u múuch'ul caaj. 8Tuláacal u cajnáalilo'ob lu'ume' máaxo'ob ma' j dzíibta'ab u kaaba'ob le ca j beeta'ab yóokolcaab ti' u libroil le cuxtal yaan ti' le aj taman quíimsa'abo' bíin u kulto'ob le nojoch ba'alche'o'. 9Le máax yaan u xiquine' u'uyajnac. 10Le máax cu bisic máac u ti'al kalbile', bey xan leti'e' bíin bisa'ac kalbil; le máax cu quíimsaj yéetel espadae', leti' xane' bíin quiimsa'ac yéetel espada. Tu yo'olal lela' le máaxo'ob quili'icho'obo' ka'ana'an ti'ob chuca'an óolal yéetel ocsaj óolal. 11Cu dzo'ocole' tin wilaj u láak nojoch ba'alche' cu jóokol ti' le lu'umo'. Lela' yaan ca'a dzíit u baac bey u baac j tamane', ba'ale' cu t'aan bey jun túul caane'. 12Ti' leti'e' yaan tuláacal le páajtalil yanji' ti' le yáax jun túul nojoch ba'alche' tu táan leti'o', yéetel cu beetic ca kulta'ac le yáax nojoch ba'alche'o' leti' le utzchaj ti' le loob beeta'ab ti' u ti'al u quíimbal ca'acho'. 13Cu beetic xan nucuch chíiculalo'ob, cu beetic tac u yéemel káak ca'an tu yóokol lu'um tu táan máaco'ob. 14Tu yo'olal le chíiculalo'ob j cha'ab ti' u beetic tu táan le yáax nojoch ba'alche'o' tu tusaj le máaxo'ob caja'ano'ob yóokol le lu'umo' ca tu ya'alaj ti'ob ca u beeto'ob jun p'éel u yoochel le nojoch ba'alche' j loobilta'ab ca'ach yéetel espadae' ba'ale' ma' j quíimi'. 15Le u ca'a túul nojoch ba'alche'o' j dza'ab páajtalil ti' u ti'al u dzáic cuxtal ti' u yoochel le yáax nojoch ba'alche'o', u ti'al xan ca páatac u t'aan yéetel ca u beet u quíimsa'al tuláacal le máaxo'ob ma' bíin u kulto'obo'. 16Tu beetaj xan u dza'abal jun p'éel chíicul tu x no'oj kab wa tu táan jool tuláacal máac: mejentac wa nuuctac, ayikalo'ob wa óotzilo'ob, jáalkabo'ob wa palitzilo'ob. 17Mix máac cu páajtal u man mix u coonol wa mina'an ti'e' le chíiculo' wa u kaaba' le nojoch ba'alche'o' wa u númeroil u kaaba'. 18Te'ela' yaan na'ati'; le máax yaan na'at ti'e' u yil u númeroil le nojoch ba'alche'o', lela' jun p'éel u númeroil wíinic. Le númeroo' seicientos setenta y seis.


Copyright
Learn More

will be added

X\