Apocalipsis 1

1Lela' leti' le sáasilcunaj tu dzaj Ku ti' Jesucristo u ti'al ca u dzáa u yojéelt ti' u palitzilo'ob Kue' le ba'ax bíin úuchuc séeba'ano'. Jesucristoe' tu dzaj ojéeltbil le sáasilcunaj iquil tu túuxtilac u ángel ti' Juan u palitzil. 2Juane' tu ya'alaj u jaajil tu yo'olal tuláacal ba'ax tu yilaj, yéetel cu jaajcuntic u t'aan Ku, bey xan le ba'ax dzo'oc u jaajcunta'al tumen Jesucristoo'. 3Qui' u yóol le máax cu xoquic le dzíiba'. Qui' yóol xan le máaxo'ob cu yu'ubico'ob le t'aan túuchi'ita'an tumen Kua', yéetel cu dzo'ocbesico'ob le ba'ax dzíibta'an te'ela', tumen táan u náadzal u kiinil u yúuchul le ba'alo'oba'. 4Teen Juane' táan in dzíib ti' le siete iglesiaob yano'ob tu lu'umil Asiao'. Yanac te'ex u siibal utzil yéetel u jéedzel óolal Ku, le máax yaan, yanili'e' yéetel bíin taalaco'; yanac te'ex xan u siibal utzil yéetel u jéedzel óolal le siete pixano'ob yaan tu táan u jalach káanche' Kuo'. 5Yanac te'ex xan le utzil siibal yéetel le jéedzel óolal cu taal ti' Jesucristoo', le máax cu yaacunaj yéetel le chuca'an óolal, yéetel le máax ca'a púut cuxlaj ti' le quimeno'obo', máax yaan xan páajtalil ti' tu yóokol u ajawilo'ob lu'um. Cristo le máax u yaabiltmajo'one' dzo'oc u p'o'ico'on ti' c kebano'ob yéetel u ki'ikel. 6Dzo'oc xan u beetico'on ajawo'on bey xan j kiino'on u ti'al c meyajtic Ku u Taata. ¡U ti'al leti' le nojbe'enilo' bey xan le páajtalilo' u ti'al kiino'ob mina'an u xuul! 7¡Ile'ex, táan u taal Cristo ichil le múuyalo'obo'! Yaan u yila'al tumen tuláacal máaco'ob, tac tumen le máaxo'ob loobilto'; tuláacal u cajnáalilo'ob yóokolcaabe' bíin okolnaco'ob tu yo'olal leti'. Bey bíin úuchuco'. Amén. 8Teen le Alfao' yéetel le Omegao', u yáax chuun yéetel u xuul, cu ya'alic Yuumtzil máax yaan tuláacal páajtalil ti', le máax yaan, yanili'e' yéetel bíin taalaco'. 9Teen Juan a sucu'une'ex, tu yo'olal Jesucristoe' chuca'an in wóol mukyaj pa'ate' ta wéetele'ex tu ajawil Ku. Bisa'aben tu petenil Patmos tu yo'olal tin tze'ectilac u t'aan Ku, yéetel tu yo'olal úuchic in wa'alic u jaajil tu yo'olal Jesucristo. 10J úuch te'elo' ti' jun p'éel u kiinil Yuumtzile', j p'áaten tu yáanal u páajtalil Quili'ich Pixan, ca tin wu'uyaj paachil ti' tene' jun p'éel ka'amcach t'aan, bey u juum trompetae', 11ca tu ya'alaj teen: Teen le Alfao' yéetel le Omegao', u yáax chuun yéetel u xuul. Dzíibt ti' ju'un le ba'ax ca wilica', túuxt xan ti' le siete iglesiaob yano'ob tu lu'umil Asiao': Ti' Efeso, ti' Esmirna, ti' Pérgamo', ti' Tiatira, ti' Sardis, ti' Filadelfia yéetel ti' Laodicea. 12Le ca tin sutinbáa u ti'al ca páatac in wilic le máax cu t'aan tin wéetelo', tin wilaj siete x t'uchub sáasilo'ob beeta'an yéetel oro, 13chúumuc ti' le siete x t'uchub sáasilo'obo' tin wilaj jun túul chica'an ti' u Paal Máac, u búucbesmubáa yéetel jun p'éel nook cu kuchul tac tu ni' yooc yéetel u kaxmaj u tzeem yéetel jun p'éel kaxnak beeta'an yéetel oro. 14U tzo'otzel u poole' sac je'el bix u tzo'otzel j tamane' wa je'el bix sac ye'ebe', u yiche' bey u tóoch'bal káake'. 15U yooco'obe' táan u léembal bey yiba'an bronce dzidzibquie'; u t'aane' ka'am je'el bix u juum ya'abcach ja'obe'. 16Tu x no'oj kabe' ti' yaan siete eeko'ob yéetel ti' u chi'e' cu jóokol jun p'éel máascab pupudzquil ca'a mat u yej. U táan yiche' bey le kiin le quéen juulnac yéetel tuláacal u muuke'. 17Le ca tin wilaje' j lúuben tu ni' u yooc beyen jun túul quimene'. Ba'ale' leti'e' tu dzaj u x no'oj kab tin wóokole' ca tu ya'alaj teen: Ma' a ch'a'ic sajaquil. Teen u yáax chuun yéetel u xuul. 18Teen le máax cuxa'ano'; j quíimen ca'achi, ba'ale' bejela'e' cuxa'anen u ti'al kiino'ob mina'an u xuul. Ti' teen yaan u llaveilo'ob le quíimilo', bey xan u ti'al u cúuchil le quimeno'obo'. 19Dzíibt le ba'ax dzo'oc a wilico', le ba'ax yaan bejela'o' bey xan le ba'ax bíin úuchuc cu dzo'ocol lela'. 20Lela' leti' u ta'acbil ba'alilo'ob le siete eeko'ob dzo'oc a wilic ti' yaan tin x no'oj kabilo', le máax cu máan xan ichil le siete x t'uchub sáasilo'ob beeta'an yéetel oroo': Le siete eeko'obo' u siete ángelo'ob le siete iglesiaobo', le siete x t'uchub sáasilo'obo' leti' le siete iglesiaobo'.


Copyright
Learn More

will be added

X\