Filemon 1

1Teen Pablo, máax kala'anen tu yo'olal Cristo Jesuse' quin dzíibtic le ju'una' jun múuch' yéetel sucu'un Timoteo ti' teech, Filemón, c yaabilaj yéetel c éet meyaj, 2bey xan ti' le Iglesia cu much'icubáa ta wotocho' je'el bix xan ti' c quiic Apia yéetel ti' Arquipo máax cu láakintico'on ti' le ba'atelo'. 3Kame'ex u siibal utzil yéetel u jéedzel óolal Ku c Taata yéetel Yuumtzil Jésucristo. 4Mantadz quin dzáic nib óolal ti' Ku, le quéen in ka'ajsech ti' in payalchi'ob, 5tumen dzo'oc u kuchul ti' teen u péectzil le yaacunaj yéetel le ocsaj óolal yaan ti' teech u ti'al Yuumtzil Jesuso' bey xan u ti'al tuláacal le máaxo'ob u ti'alo'ob Kuo'. 6Quin káatic ti' Kue' le máaxo'ob dzo'oc u yocsaj óolo'ob tu yo'olal a wocsaj óolale' ca kuchuc u na'ato'ob ma'alob tuláacal le qui'iqui' t'aano'ob yaan to'on tu yo'olal Cristo Jesuso'. 7Tumen jach qui'imac in wóol yéetel lika'an in wóol tu yo'olal a yaacunaj, tumen ta wo'olale', sucu'un, dzo'oc u qui'imaccunta'al u yóol u pucsi'ikal le j ocsaj óolo'obo'. 8Tu yo'olal lela', quex tumen bey jun túulen u apóstol Cristo yaan teen u páajtalil in wa'alic teech ba'ax unaj a beetique', 9quin táanilcuntic in káat óolal ti' teech tu yo'olal yaacunaj. Teen, Pablo, nuxiben yéetel beora' kala'anen tu yo'olal Cristo Jesuse', 10quin káat óolal tu yo'olal in paal Onésimo, máax síij ti' ocsaj óolal way tu'ux kala'anena'. 11Ti' le kiino'ob dzo'oc u máano'obo', Onésimoe' j kuch béeytal a ti'al teche' jun túul palitzil mixba'al u biilal, ba'ale' beora' yaan u biilal je'el bix ti' teche' bey xan ti' teen. 12Quin túuxtic teech tu ca'a téen; kam túun bey je'el bix in pucsi'ikale'. 13Je'el in wóoltic ca'ach ca p'áatac way tin wéetele' u ti'al u meyajtiquen ta lugar ca'aliquil kala'anen tu yo'olal le ma'alob péectzilo'. 14Ba'ale' ma' in káat in beet mixba'al wa ma' utz ta t'ani', u ti'al beyo' le meyaj utz ca beetic teno' ma' a beetic chéen tumen táan u tza'abal techi' ba'ale' ca a beet tu juunal a wóolal. 15Onésimoe' tu p'atajech wale' dze'edzec kiino'ob u ti'al ca a kam beora' u ti'al láaj kiino'ob, 16ma' bey jun túul palitzile', u káat u ya'ale', je'el bix jun túul sucu'un yaabila'ane'. Tene' jach in yaabiltmaj, ba'ale' teche; unaj a yaabiltic asab, ma' chéen je'el bix jun túul máaque' ba'ale' bey xan je'el bix jun túul sucu'un ti' u yocsaj óolal Yuumtzile'. 17Bey túuno' wa ca tucultic tene' in wéet óolaleche', kam leti' je'el bix, a kamiquen teno'. 18Wa yaan wa ba'ax kaas u beetmaj teche', wa yaan ba'ax u p'axmaj teche', tzáa ti' teen. 19Teen Pabloe' tin kabil quin dzíibtic lela' teen quéen in bo'ot teech; quex tumen je'el u páajtal in beetic a ka'ajsique' teche' a p'axmaj teen a cuxtal xan. 20Bey, sucu'un, beet teen le meyaj utza' je'el bix jun túul j ocsaj óol Yuumtzile'; qui'imaccunt u yóol in pucsi'ikal ti' Cristo'. 21Quin dzíib teche' tumen jach in wojel ca wu'uyic t'aan yéetel in wojel yaan a beetic u masil ti' le quin káatic techa'. 22Bey xan nu'uct tu'ux in kuchul; tumen quin pa'atic tu yo'olal a payalchi'exe', Kue' yaan u dzáic te'ex ca xi'iquen in wilech. 23Cu túuxtic tziquil t'aano'ob Epafras, máax kala'an tin wéetel tu yo'olal Cristo Jesús, 24bey xan Marcos, Aristarco, Demas yéetel Lucas, máaxo'ob táan u yáantiqueno'ob ti' le meyajo'. 25U siibal utzil Yuumtzil Jésucristo ca yanac ta wéetele'ex. Amén.


Copyright
Learn More

will be added

X\