San Mateo 7

1Ma' p'is óoltique'ex u láak máaco'ob tu yo'olal ma' a p'is óolta'ale'ex. 2Tumen bíin p'is óolta'aque'ex tumen Ku je'el bix a p'is óoltique'ex u láak máaco'obe', bíin xan p'i'isique'ex yéetel le x p'isib iquil a p'isique'ex u láak máaco'obo'. 3¿Bix anil cu páajtal a wilic le chan sojol yaan tu yich a sucu'uno' wa ma' táan u páajtal a wilic le che' yaan ta wich techo'? 4Wa yaan jun p'éel che' ta wiche' ¿bix úuchac u páajtal a wa'alic ti' a sucu'un: cha'a in jóokesic le chan sojol yaan ta wicho'? 5¡J ca'a p'éel ich! jóokes táanil le che' yaan ta wicho' tu yo'olal beyo' ca páatac a wilic ma'alob a jóokesic le chan sojol yaan tu yich a sucu'uno'. 6Ma' a dzáique'ex le quili'ich ba'alo'ob ti' peeko'ob, bix úuchac ca u suticuba'ob ta wóokole'ex u ti'al u xe'exet'ique'ex. Mix a pulique'ex a perlaex ti' kéekeno'ob u ti'al ca u pepe'echa'ato'ob. 7Káatnene'ex, bíin dza'abac te'ex tumen Ku; caxannene'ex, bíin a nuptáante'ex; koopnene'ex, bíin je'ebec te'ex le jool najo'. 8Tumen máax cu káataje' cu kam; máax cu caxane' cu nuptáan; máax xan cu kope' cu je'ebel jool naj ti'. 9¿Yaan wa máax ichile'ex je'el u dzáic jun p'éel tuunich ti' u paal le quéen káata'ac waaj ti'e'? 10¿Wa ca u dzáa jun túul caan ti' le quéen kata'ac jun túul cay ti'e'? 11Wa te'ex, quex kaakas máaque'ex, a wojele'ex a dza'ex ma'alob ba'alo'ob ti' a paalale'exe', a Taataex yaan te j ca'ano' asab je'el u dzáic ma'alob ba'alo'ob ti' máaxo'ob káatic ti'o'. 12Bey túuno' beete'ex mantadz ti' u láak máaco'ob le ba'ax a káate'ex ca u beeto'ob ti' te'exo'; tumen le cu ca'ansic u ya'almaj t'aan Moisés yéetel u dzíibo'ob le aj bóobato'obo'. 13Ooquene'ex ti' le nu'unut' jool najo'. Tumen cóoch le jool naj bey xan le bej cu bíin ti' xu'ulsajilo', yéetel ya'ab máaco'ob cu yoclobi'; 14ba'ale' nu'ut' le jool naj bey xan le bej cu bin ti' cuxtalo', yéetel jach jun p'íit máaco'ob nuptantico'ob. 15Canataba'ex ti' le tuus máaco'ob cu ya'alico'ob táan u t'aano'ob tu yo'olal Ku. Cu taalo'ob ti' te'ex je'el bix j tamano'obe', ba'ale' tu pucsi'ikalo'obe' beyo'ob chacmo'ole'. 16Te'exe' je'el u páajtal a kaj óoltique'exo'obe' tu yo'olal ba'ax cu beetico'ob, tumen ma' teech u t'o'ocol uva ti' ki'ixo'ob, mix higo ti' tzacamo'ob. 17Bey túuno', tuláacal ma'alob che'e' cu dzáic ma'alob ich, ba'ale' le kaakas che'e' kaakas ich cu dzáic. 18Jun cúul ma'alob che'e ma' tu páajtal u dzáic kaakas ich, mix xan jun cúul kaakas che' cu páajtal u dzáic ma'alob ich. 19Tuláacal che' ma' táan u dzáic ma'alob iche', cu ch'a'acale' cu tóoca'al ti' káak. 20Le beetique', te'exe' je'el a kaj óoltiquexo'ob tu yo'olal ba'ax cu beetico'obe'. 21Ma' tuláacal le máaxo'ob cu ya'alico'ob ten: Yuumtzil, Yuumtzil, bíin ojco'ob tu ajawil Ku, ba'ale' chéen le máaxo'ob cu beetico'ob u alab óolal in Taata yaan te j ca'ano'. 22Le quéen kuchuc le kiino', yaab máaxo'ob bíin u ya'alo'ob ten: Yuumtzil, Yuumtzil, to'one' j t'aanajo'ob ta kaaba', ta kaaba' xan t jóokesaj kaakas pixano'ob, ta kaaba' xan t mentaj ya'ab chíiculalo'ob. 23Ba'ale' tene' bíin in wa'al ti'ob: Mix bikin in kaj óolte'ex; ¡tzelaba'ex tin táan, te'ex ta beetaje'ex ba'alo'ob kaastac! 24Le máax cu yu'ubic in t'aan yéetel cu beetic ba'ax quin wa'alique', bey jun túul máac yaan u na'at tu beetaj u yotoch tu yóokol tuuniche'. 25J káax cháaque', áalcabnaj le ja'obo', j taal ka'amcach iik tu yóokol le najo', ba'ale' ma' j lúubi', tumen yóokol tuunich yaan u chunpakil. 26Le máax cu yu'ubic in t'aan, ba'ale' ma' tu beetic ba'ax quin wa'alique', bey jun túul máac mina'an u na'at tu beetaj u yotoch tu yóokol le sa'am lu'umo'. 27J káax cháaque', áalcabnaj le ja'obo', j taal ka'amcach iik tu yóokol le najo'. ca j lúubi, ¡Ca jach xu'ulsa'abi'! 28Le ca j dzo'oc u t'aan Jesuse', le máaco'obo' jaka'an u yóolo'ob tu yo'olal u ca'ansaj; 29tumen cu ca'ansaj bey jun túul máac yaan u páajtalile', ma' je'el bix u j ca'anbesajilo'ob le a'almaj t'aano'.


Copyright
Learn More

will be added

X\