San Marcos 6

1Jesuse' j luk te'elo' ca j suunaj tu lu'um, u aj canbalo'obe' j bino'ob yéetel. 2Le ca j kuch u kiinil sábadoe', chu'unpaj u ca'ansaj te j sinagogao'. ya'ab ti' le máaxo'ob j u'uyo' ja'ak u yóolo'ob ca tu ya'alajo'ob: ¿Tu'ux tu canaj le máac tuláacal le ba'alo'oba'? ¿Ba'ax le sen na'at dza'an ti'a'? ¿Cux le chíiculalo'ob cu beetica'? 3¿Lela' ma' wa leti' le carpintero u paal María yéetel u sucu'un Jacobo, José, Judas yéetel Simón? ¿Ma' wa way cajnáalo'ob xan ichilo'on u x ch'upul íidzino'obe? Le t o'olale' tu kéex óoltajo'ob. 4Ba'ale' Jesuse' tu ya'alaj ti'ob: Jun túul aj bóobate' cu yaabilta'al tumen tuláacal máaco'ob, ba'ale' ma' tu yaabilta'al; tumen u yéet caajalo'ob, u láako'ob, mix tumen u yéet otochnáalo'ob. 5Ma' j páatji u beetic mix jun p'éel chíiculal te'elo', chéen tu dzaj u kab yóokol dze'edzec koja'ano'ob ca tu dzaj u toj óolalo'ob. 6Leti'e' jaka'an u yóol tumen leti'obe' ma' tu yocsaj óoltico'ob. Cu dzo'ocole' Jesuse' tu xíimbaltaj le mejen caajo'ob naadztaco'obo' táan u ca'anbesaji'. 7Ca tu t'anaj le doce aj canbalo'obo', ca jo'op' u túuxtico'ob ca'a ca'a túulil, ca tu dzaj páajtalil ti'ob u ti'al u jóokesico'ob le kaakas pixano'obo'. 8Ca tu ya'alaj ti'ob ma' u bisico'ob mix ba'al bej, chéen u xóolte'ob. Ma' u unaj u bisico'ob sáabucani', mix waaj, mix taakin. 9Unaj u dzáico'ob xanab kéewel yéetel chéen jun wal u nook ma' ca'a p'éeli'. 10Ca tu ya'alaj ti'ob: Le quéen ocoque'ex ti' jun p'éel naje', ti' a p'áatale'exi' ca'aliquil ma' xi'ique'ex táanxeli'. 11Wa yaan tu'ux ma' ta ka'amle'ex, mix u káato'ob u yu'ubo'obe'exe', jóokene'exi', tíite'ex u lu'umil a wooque'ex u ti'al chíiculal ti'ob. Tu jaajil quin wa'alic ti' te'exe' tu kiinil p'is óole' asab ya'ab cu bin j mukyaj u cajnáalilo'ob le caajo' ti' sodomailo'ob yéetel gomorrailo'ob. 12Leti'ob túune' jóoko'obe' ca tu tze'ectajo'ob kabéet u kexic u tuucul máaco'ob. 13Tu jóokeso'ob xan ya'abcach kaakas pixano'ob, ca tu ji'ikabto'ob yéetel aceite ya'abcach koja'ano'obe', ca j tojchaj u yóolo'ob. 14Ajaw Herodese' tu yojéeltaj lela', tumen u ma'alob péectzilil Jesuse' j ki'itpaj tuláacal tu'ux. Ca tu ya'alaj Herodes: Dzo'oc u ca'a púut cuxtal Juan Bautista ti' ichil le quimeno'obo'; le o'olale' yaan le páajtalil ti'a'. 15U láak máaco'obe' cu ya'alico'ob: Lela' aj bóobat Elías. Yaan u láak máaco'obe' cu ya'alico'ob: Lela' jun túul aj bóobat je'el bix le úuchben aj bóobato'obo'. 16Le ca tu yu'ubaj Herodes lela', tu ya'alaj: Lela' Juan, le máax tin túuxtaj cúulch'acbil u caale', bejela'e' dzo'oc u ca'a put cuxtal ti' ichil le quimeno'obo'. 17Tumen Herodese' tu túuxtaj kalbil Juan, ca j ka'ax yéetel cadena ti' le kalabilo' tu yo'olal Herodías. Tumen Herodiase' u yatan ca'ach Felipe u sucu'un Herodes, ba'ale' Herodese' tu ch'a'aj u ti'al ca cajlac yéetel. 18Juane' tu ya'alaj túun ti' Herodes: Ma' utz a cajtal yéetel u yatan u sucu'uni'. 19Herodías túune' jach u ch'a'ap'ectmaj Juan yéetel u káat u quiimse, ba'ale' ma' j páatchaji', 20tumen Herodese' u yojéeltmaje' Juane' jun túul máac toj yéetel quili'ich u cuxtal, le o'olal u ch'a'amaj sajaquil ti'. Le beetique' ma' tu cha'aj u loobilta'al tumen le co'olelo'. Herodese', quex ma' tu jach na'atic le ba'ax cu ya'alic Juane', cu yu'ubic yéetel qui'imac óolal. 21Ba'ale' Herodiase' tu yilaj jun p'éel kiin jach ti'ibil le ca tu kiinbesaj Herodes u kiin u kaaba', tumen tu dzaj jun p'éel nojoch janal ti' tuláacal u jalachilo'ob, u nojocho'ob le aj ba'atelo'obo' yéetel u nojochilo'ob Galilea. 22U x ch'upul paal Herodiase' j ooc ti' u cúuchil le nojoch janalo' ca j óokotnaji; le óokoto' j lúub jach utzil ti' Herodes yéetel ti' tuláacal le cu janalo'ob yéetelo'. Le ajawo' tu ya'alaj túun ti' le x ch'úupalo': Káat ti' teen je'el ba'alac a káate', tene' je'el in dzáic ti' teche'. 23Ca tu jalach t'aantaj ti', je'el u dzáic je'el ba'alac ca u káate', tac táanchumuc le lu'um tu'ux cu beetic u jalachilo'. 24Le x ch'úupalo' jóoke' ca tu ya'alaj ti' u maama: ¿Ba'ax je'el in káatic ti'e'? u maamae' tu ya'alaj ti': Káat u pool Juan Bautista ti'. 25Tu séeblaquil j ooc le x ch'úupal tac tu'ux yaan le ajawo', ca tu ya'alaj ti': In káat u ca a dzáa ti' teen tu séeblaquil ti' jun p'éel platoe' u pool Juan Bautista. 26Le ajaw túuno' jach j lúub u yóol; ba'ale' tumen u ya'almaj tu táan Ku yéetel u'uya'ab tumen u yu'ula'obe', ma' tu yóoltaj u ya'al ma'il ti' ba'ax káata'ab ti'i'. 27Tu séeblaquil ajawe' tu túuxtaj jun túul aj ba'atel u ti'al taasic u pool Juan. 28Le aj ba'atelo' j bin te j kalabilo', ca tu cúulch'actaj u caal Juan, ca tu dzaj ti' le x ch'úupalo', le x ch'úupalo' tu kubaj ti' u maama. 29Le ca j ojéelta'ab tumen u j tzaypacho'ob Juane', tu ch'a'ajo'ob u wíinclil ca tu dzajo'ob ti' jun p'éel mucnal. 30Cu dzo'ocole' Le aj canbalo'obo' j much'lajo'ob yéetel Jesús ca tu tzicbaltajo'ob ti' tuláacal ba'ax tu beeto'ob yéetel ba'ax tu ca'ansajo'ob. 31Jesuse' tu ya'alaj ti'ob: Co'otene'ex, co'ox je'elel jun p'íit ti' jun p'éel cúuchil jun páaycunta'an. Tumen ya'abcach máaco'ob cu bino'ob yéetel cu taalo'ob, mina'an u yorail mix u ti'al u janalo'ob. 32Bey túuno' Jesús yéetel u aj canbalo'obe' j bino'ob tu juunalo'ob ti' jun p'éel cheem tac ti' jun páay cúuchil. 33Ba'ale' ya'ab tu yilo'ob u bino'obe', ca tu kaj óoltajo'ob Jesús. Lelo'oba' jóoko'ob ti' tuláacal le caajo'obo' ca j bino'ob áalcabil tac te'elo', ca j kucho'ob táanil ti'ob. 34Le ca jóok Jesús ti' le cheemo', tu yilaj ya'abcach máaco'ob, ca tu ch'a'aj óotzilil ti'ob, tumen beyo'ob j taman mina'an máax canantico'obe', ca jo'op' u ca'ansic ti'ob ya'abcach ba'alo'ob. 35U ti'al u t'úubul kiine' u aj canbalo'obe' j taalo'ob ca tu ya'alajo'ob ti': Táan u t'úubul kiin, yéetel mix máac cajacbal ti' le cúuchila'. 36Túuxt le máaco'obo' u ti'al ca xi'ico'ob ti' coolo'ob yéetel ti' mejen caajo'ob naadztaco'ob u ti'al u máano'ob waaj, tumen mina'an ba'al u jaanto'ob. 37Ba'ale' Jesuse' tu núucaj ti'ob: Dza'ex ba'al u jaanto'ob. Leti'obe' tu ya'alajo'ob: ¿Cu páajtal wa c bin c man doscientos denarios waaj, u ti'al c dzáic ba'al u jaanto'ob? 38Jesuse' tu ya'alaj ti'ob: ¿Jay p'éel waaj yaan ti' te'ex? Le ca tu yojéeltajo'obe', tu ya'alajo'ob ti': cinco waajo'ob yéetel ca'a túul cayo'ob. 39Ca túun tu ya'alaj ca culac le máaco'obo' jujun múuch'il yóokol le ya'ax su'uco'; 40ca j culajo'ob jujun múuch' a cientoil yéetel a cincuentail. 41Ca túun tu machaj Jesús le cinco waajo'ob yéetel le ca'a túul cayo'obo' ca tu dzáa nib óolal ti' Yuum Ku. Tu xet'aj le waajo' ca tu dzaj ti' u aj canbalo'ob u ti'al ca u t'oxo'ob ti' le máaco'obo'. Tu t'oxaj xan le ca'a túul cayo' ti' tuláacal. 42Tuláacal jaano'ob ca j na'ajchajo'ob. 43Cu dzo'ocole' tu chupo'ob doce xaaco'ob yéetel u xéexet'al le waaj yéetel le cay j p'áato'. 44Le máaxo'ob tu jaanto'ob le waajo' míin cinco mil máaco'ob. 45Cu dzo'ocole' Jesuse' tu beetaj u yocol u aj canbalo'ob ti' le cheemo' u ti'al ca xi'ico'ob tac Betsaida táanil ti', tu táanxel tzéel le ka'anabo', ca'aliquil táan u yutzil túuxtic le máaco'obo'. 46Le ca tu láaj utzil túuxtajo'obe' ca j bin paach pu'uc. 47Le ca j áakabchaje', le cheemo' dzo'oc u kuchul chúumuc le ka'anabo', Jesuse' ti' yaan tu juunal lu'ume'. 48Tu yilaj istiquiaj u bisico'ob le cheemo', tumen le iiko' actáan ti'ob u taal. U ti'al u sáastale' Jesuse' tu nadzajubáa ti'ob, táan u xíimbal yóokol le ja'o', óolac máanac táanil ti' leti'ob. 49Le ca tu yilajo'ob táan u xíimbal yóokol le ja'o', tu tuclajo'ob jun túul ja'asaj óol, ca j awatnajo'ob; 50tumen tuláacal j ile ca ja'ak u yóolo'ob. Ba'ale' leti'e' j t'aanaji' ca tu ya'alaj ti'ob: Yanac a wóole'ex, teen lela' ma' a sajactale'ex. 51Ca j na'ac ti' le cheem tu'ux yano'obo', ca jedzlaj le iiko'. Leti'ob túune' j p'áat jaajap u chi'ob yéetel jaka'an u yóolo'ob. 52Tumen ma' tu na'atajo'ob u chíiculalil le waajo', tumen láili' dzu'uy u pucsi'ikalo'obe'. 53Jóoko'ob táanxel tzéelil le ka'anabo' ca j kucho'ob tu lu'umil Genezaret, tu'ux tu káaxo'ob le cheem tu jáal ja'. 54Jach le cu jóoklo'ob te j cheemo' ca j kaj óolta'ab Jesús tumen le máaco'obo'. 55Ca j máano'ob ti' tuláacal le lu'umo', ca jo'op' u taasico'ob le koja'ano'ob ti' kóochche'ob tac tu'ux cu yu'ubico'ob u ya'ala'al ti' yaan Jesuso'. 56Yéetel je'el tu'uxac ca ocoque', ti' mejen cajtalilo'ob, ti' caajo'ob wa ti' káaxo'obo', cu dza'abal le koja'ano'ob ti' le noj bejo' yéetel cu káat óoltico'ob ti' Jesús ca u cha'a u péedzkabto'ob quex chéen u chi' u nook; tuláacal túun le je'enquex tu péedzkabtajo'obo' j tojchaj u yóolo'ob.


Copyright
Learn More

will be added

X\