San Marcos 16

1Le ca j máan u kiinil sábadoe', María Magdalena, Salomé yéetel María u maama Jacoboe' tu manajo'ob qui'iboc ja' u ti'al u ji'ikabtico'ob u wíinclil Jesús. 2Jach tu ja'atzcabil u yáax kiinil le semanao', j kucho'ob te j mucnalo', dzo'oquili' u jóokol kiine'. 3Táan u ya'alico'ob tu baatzilo'ob: ¿Máax cu bin lukesic le tuunich yaan tu jool le mucnalo'? 4Ba'ale' le ca tu pactajo'obe' tu yilajo'ob le nojoch tuunich iquil maca'anil ca'ach le mucnalo' mina'an tu cúuchil. 5J ooco'ob te j mucnalo', ca tu yilajo'ob jun túul táanquelem máac culucbal tu x no'ojil le mucnalo', u búuquintmaj jun p'éel chowac sac nook, ca ja'ak u yóolo'ob. 6Ba'ale' le ti'e' tu ya'alaj ti'ob: Ma' u ja'akal a wóole'ex. te'exe' táan a caxantique'ex Jesús Nazaretil máax j quíimsa'ab ti' cruz. Ba'ale' leti'e' dzo'oc u ca'a púut cuxtal. mina'an waye'. Ile'ex le cúuchil tu'ux j dzaabo'. 7Xeene'ex ca a wa'ale'ex ti' u aj canbalo'ob yéetel ti' Pedroe' leti'e' táan u bin táanil ti' te'ex tac Galilea. Ti' can a wile'exi', je'el bix tu ya'alaj te'exo'. 8Le co'olelo'ob túuno' j bino'ob táan u púudzulo'ob ti' le mucnalo', tumen táan u quiquilanquilo'ob jaka'anil u yóolo'ob. Ma' tu ya'alajo'ob mix ba'al ti' mix máaqui', tumen j sajacchajo'ob. 9Cu dzo'ocol u ca'a púut cuxtal Jesús tu ja'atzcabil u yáax kiinil le semanao', j chíicpaj táanil ti' María Magdalena, ti' máax tu jóokesaj siete kaakas pixano'ob. 10Leti'e' j bine' ca tu dzaj u péectzil ti' le máaxo'ob j máano'ob yéetel Jesús, máaxo'ob okomtac u yóolo'ob yéetel táan u yokolo'obo'. 11Le ca tu yu'ubajo'ob cuxa'an Jesús, yéetel dzo'oc u yila'al tumen María Magdalenae', ma' tu yocsaj óolto'obi'. 12Cu dzo'ocol lela', Jesuse' chíicpaj jela'an ti' ca'a túul u aj canbalo'ob táan u bino'ob xíimbalil káax. 13Leti'obe' j bino'ob ca tu dzajo'ob u péectzilil ti' le u láak j canbalo'obo'. Ba'ale' mix u t'aan leti'ob ocsaj óolta'abi'. 14Cu dzo'ocole' Jesuse' chíicpaj ti' u once aj canbalo'ob, ca'aliquil culucbalo'ob te j mesao'. Ca tu keyajo'ob tu yo'olal u x ma' ocsaj óolalilo'ob yéetel tu yo'olal u chichil u pucsi'ikalo'ob, tumen ma' tu yocsaj óoltajo'ob u t'aan le máaxo'ob dzo'oc u yilico'ob leti'e' ca'a púut cuxa'an. 15Ca tu ya'alaj ti'ob: Xeene'ex ti' tuláacal yóokolcaab, yéetel tze'ecte'ex u ma'alob péectzil le tocsajila' ti' tuláacal máac. 16Le máax cu yocsaj óoltic yéetel cu yocja'e, cu to'ocol. Ba'ale' le máax ma' tu yocsaj óoltique', cu xot kinta'al. 17Le chíiculalo'ob cu bin ilbil ti' le máaxo'ob tu yocsaj óolo'obo', leti' lelo'oba': Tin kaaba' bíin u jóokeso'ob kaakas pixano'ob; yaan u t'anico'ob túumben t'aano'ob; 18wa cu machico'ob caano'ob yéetel wa cu yukico'ob loolob ukule', ma' táan u yúuchul mix jun p'éel loob ti'ob. Bey xan yaan u dzáic u kabo'ob yóokol le koja'ano'obo', lelo'oba' cu yutztalo'ob. 19Cu dzo'ocol u t'aan yéetelo'obe', Yuumtzil Jesuse' j bisa'ab ca'an, ca j culaj tu x no'oj kabil Ku. 20Leti'ob túune' jóoko'ob, ca tu tze'ecto'ob le ma'alob péectzil tuláacal tu'uxo', Yuumtzile' tu yáantajo'ob, bey xan tu jaajcuntaj le ma'alob péectzilo' yéetel le chíiculalo'ob tu beetajo'. Ca béeyac.


Copyright
Learn More

will be added

X\