San Marcos 15

1Le ca j sáasjie', u nuuctaquil le aj kiino'obo' tu much'uba'ob yéetel le anciano'obo', u aj ca'anbesajilo'ob le a'almaj t'aano' yéetel tuláacal u yéet nuuctaquilo'obo'. Ca tu bisajo'ob Jesús kaxa'an, ca tu kubajo'ob ti' Pilato'. 2Pilatoe' tu káat chi'itaj ti': ¿Teech wa u ajaw le judíobo'? Jesuse' tu núucaj ti': Beyo', je'el bix ta wa'alajo'. 3Le u nuuctaquil le aj kiino'obo' tu tacajo'ob u pool tu yo'olal ya'abcach ba'alo'ob. 4Bey túuno' Pilatoe' tu ca'a káat chi'itaj ti', táan u ya'alic: ¿Ma' ta núuquic mix ba'al? Il tu yo'olal buca'aj ba'alo'ob cu taquico'ob a pool. 5Ba'ale' Jesuse' ma' tu núucaj mixba'ali'. Bey túuno' Pilatoe' ma' tu caxtaj ba'ax u tuculti'. 6Suuca'an ti' Pilato u jáalkabtic jun túul máac kala'an ti' u kiinilo'ob le kiinbesajo', je'el máacalmáac ca káata'ac tumen le máaco'obo'. 7Kala'an túun jun múuch' yéetel u láak máaco'obe' jun túul máac u kaaba'e' Barrabás; lelo'oba' u quíimsmajo'ob wíinico'ob ti' jun p'éel líiksaj óolal. 8Le máaco'obo' j taalo'ob ca jo'op' u káatico'ob ti' Pilato ca u beet je'el bix sucja'anil ti'e'. 9Pilatoe' tu núucaj ti'ob: ¿A káate'ex ca in jáalkabt u Ajaw le Judiobo'? 10Tumen leti'e' táan u yilic j ku'ub Jesús tu yo'olal u p'eca'anil tumen le u nuuctaquil le aj kiino'obo'. 11Ba'ale' u nuuctaquil le aj kiino'obo' tu p'u'ujsajo'ob u yóol le máaco'obo' u ti'al ca u káato'ob ca jáalkabta'ac Barrabás. 12Pilatoe' tu káataj ti'ob tu ca'a téen: ¿Ba'ax a káate'ex ca in beet yéetel le ca wa'alique'ex u ajaw le judíobo'? 13Leti'ob túune' tu yawat núucajo'ob: ¡Quiimsa'ac ti' cruz! 14Pilatoe' tu ya'alaj ti'ob: ¿Ba'ax kaasil u beetmaj? Ba'ale' leti'obe' tu yawat a'alo'ob tu ca'a téen: ¡Quíimsa'ac ti' Cruz! 15Pilatoe' tu yóoltaj túun yantal ma'alob tu táan le máaco'obo' ca tu jáalkabtaj Barrabás. Cu dzo'ocol u túuxtic jadzbil Jesuse', tu kubaj u ti'al ca quíimsa'ac ti' cruz. 16Le aj ba'atelo'ob túuno' tu bisajo'ob Jesús tu táancabil le chúumuc najo' ca tu láaj much'ajuba'ob tu yicnal. 17Ca tu búucbesajo'ob yéetel jun p'éel chacjome'en nook, bey xan tu dzajo'ob tu pool jun p'éel péet jo'ol jit'a'an yéetel ki'ix. 18Ca jo'op' u yawtico'ob ti': ¡Papaxkabta'ac u ajaw le judíobo'! 19Cu dzo'ocole' tu ko'okolajo'ob u pool yéetel jun p'éel che', yéetel tu túubajo'ob; xolajo'ob xan tu táan u ti'al u chíinpoltico'ob. 20Cu dzo'ocol u p'a'astico'obe' tu lukesajo'ob le chacjome'en nook ti'o' ca tu dzajo'ob u nook. Cu dzo'ocole' tu jóokesajo'ob u ti'al u quíimsico'ob ti' cruz. 21Jun túul cireneil máac, Simón u kaaba', u taata Alejandro yéetel Rufoe', táan u yúul káax, ca tu beetajo'ob u cuchic u cruz Jesús. 22Tu bisajo'ob Jesús ti' jun p'éel cúuchil u kaaba'e' Golgota, u káat ya'ale' u Cúuchil Baaquel Pool. 23Ca tu dzajo'ob vino ti' xa'akta'an yéetel Mirra, ba'ale' Jesuse' ma' tu yukaji'. 24Ca tu sinajo'ob Jesús ti' cruz. Le aj ba'atelo'obo' tu bulajo'ob ichilo'ob u nook Jesús, u ti'al ca u yilo'ob ba'ax cu bin u ti'alint jujun túulil. 25Las nueve kiin ca tu sinajo'ob ti' cruz. 26J dzaab tu yóokol le cruzo' jun p'éel dzíib iquil u tzo'olol ba'ax o'olal cu quíimsico'ob. Le dzíibo' cu ya'alic beya': U ajaw le judíobo'. 27yéetel leti'e' tu sinajo'ob ti' cruz ca'a túul j oocolo'ob, jun túul tu x no'oji', u láake' tu x dzíic. 28Bey dzo'ocbesa'abic le Quili'ich Dzíib cu ya'alic beya': J xo'oc ichil le kaakas máaco'obo'. 29Le máaxo'ob cu máano'obo' cu poch'ico'ob Jesús, cu yúuntico'ob u poolo'ob, táan u ya'alico'ob: ¡Je'elo'! Teech ca jenic le kulnajo', yéetel ca líikesic tu ca'a téen ichil óox p'éel kiine', 30tocabáa, éemen ti' le cruzo'. 31Bey xan u nuuctaquil le aj kiino'obo' yéetel u aj ca'anbesajilo'ob le a'almaj t'aano' tu p'a'astajo'ob, táan u ya'alico'ob tu baatzilo'ob: Tu tocaj u láako'ob, ba'ale' leti'e' ma' tu páajtal u toquicubáa. 32Wa le Cristo u ajaw le judíobo', c ilic u yéemel ti' le cruz beoraa', bey túuno' je'el c ocsaj óoltique'. J po'och' xan tumen le sina'ano'ob ti' cruz tu yéetelo'. 33Le ca j kuch chúumuc kiine', éekjoch'e'enchaj tuláacal lu'um tac las tres u binbal kiin. 34Ti' le horao' Jesuse' tu ka'am a'alaj: Eloi, Eloi, ¿Lama sabactaní? u káat ya'ale': In Ku, in Ku. ¿Ba'axten dzo'oc a p'atiquen? 35Dze'edzec ti' le yano'ob te'elo' tu yu'ubajo'ob lela' ca tu ya'alajo'ob: U'uye'ex, táan u t'anic aj bóobat Elías. 36Jun túul ti' leti'obe' áalcabnaj túun, cu dzo'ocol u ch'ulic jun p'éel esponja yéetel su'udz vinoe, tu dzaj ti' jun p'éel chowac che'e, ca tu nadzaj ti' u ti'al u yuke, táan u ya'alic: Cha'ex, co'ox ilic wa cu taal Elías éemsic. 37Jesuse' j ka'am awatnaje' ca j quíimi'. 38U cortinail le kulnajo' jáat chúumuc, ca'anal tac cabal. 39Le máax cu canano' wa'alacbal actáan ti' Jesuse', le ca tu yu'ubaj bix awatnajic yéetel bix quíimique', tu ya'alaj: Tu jaajile' le máaca' u Paal Ku. 40Bey xan yaan dze'edzec co'olelo'ob táan u pactico'ob náachil, le ba'ax cu yúuchulo'; ichilo'obe' ti' yaan María Magdalena, Salomé, yéetel María u maama Jacobo le chichano' yéetel José. 41Le co'olelo'oba' tu tzaypachtajo'ob, yéetel tu yáantajo'ob Jesús le ca'ach táan u xíimbaltic Galileao'. Bey xan yaan ca'ach te'elo' u láak ya'abcach co'olelo'ob j bino'ob yéetel Jesús tac Jerusalén. 42Ti' le oca'an kiino', tumen u kiinil le nu'uctajilo', u káat u ya'ale', naadz yanil u kiinil sábado, 43J taal José Arimateail, jun túul máac nojoch ichil le u múuch'ul le nuuctaquilo'obo', máax táan u pa'atic u ajawil Ku. Ca j ooc x ma' sajaquil tac tu'ux yaan Pilato, ca tu káataj u wíinclil Jesús ti'. 44Pilatoe' ja'ak u yóol ca tu yu'ubaj dzo'oc u quíimil Jesús, ca tu t'anaj le aj ba'atelo' u ti'al u káat chi'itic ti' wa tu jaajil beyo'. 45Le ca j a'ala'ab tumen le aj ba'atel jaaj dzo'oc u quíimile', Pilatoe' tu dzaj le wíinclil ti' Joseo'. 46Josee' tu manaj túun jun p'éel ma'alob sac nooke', ca tu yéemsaj le wíinclilo', ca tu to'aj yéetel. Cu dzo'ocole' tu dzaj ti' jun p'éel mucnal pota'an ti' tuunich, ca tu balkesaj jun p'éel tuunich tu jool le mucnalo'. 47María Magdalena yéetel María u maama Josee' tu yilajo'ob tu'ux j mu'uqui.


Copyright
Learn More

will be added

X\