San Lucas 5

1Jun téene' ti' yaan Jesús tu jáal u ka'anabil Genesaret, táan u ya'ach'al tumen ya'abcach máaco'ob. Lelo'oba' j kucho'ob u yu'ubo'ob u tze'equil u t'aan Ku. 2Tu yilaj Jesús ca'a p'éel cheem tu jáal le ka'anabo'; le j chuc cayo'obo' dzo'oc u jóokolo'ob, táan u p'o'ico'ob u káanil u chuc cayo'ob. 3Ca túun j ooc Jesús ichil jun p'éel ti' le cheemo'obo', le ca'ach u ti'al Simón, ca tu ya'alaj ti' ca u chan náachcunt jun p'íit ti' u jáal le ja'o'. j culaj túun Jesús te j cheemo' ca jo'op' u ca'ansic le máaco'obo'. 4Le ca j dzo'oc u ca'ansaje'. ca tu ya'alaj ti' Simón: Bis le cheem tu taamil le ja'o', ca pul u káanil a chuc caye'ex, ca chuc caynaque'ex. 5Simón tu núucaj ti': Aj ca'anbesaj, j meyajnajo'on bul áakab, mixba'al t chucaj, ba'ale' bey teech a'alica' bíin in ca'aj in pul le u káanil chuc caya'. 6Le ca tu beeto'obe', ti' jach ya'abil cay tu chuco'obe', tac u káanil u chuc cayo'ob óolac jáatac. 7Ca túun tu béech' kabto'ob u yéet meyajo'ob yano'ob te tu láak cheemo' tu yo'olal ca taalac áantbilo'ob. Ca j taalo'obe' ca tu chupo'ob tu ca'a p'éelal le cheemo'obo'. Ti' jach chuupilo'obe' ta'aytac u búululo'ob ca'achi. 8Le ca tu yilaj Simón Pedro lela', xolaj tu táan Jesús ca tu ya'alaj ti': P'aten, in Yuum, tumen tene' j keban wíiniquen. 9Tumen Simón Pedroe' jaka'an u yóol ca'achi', bey xan tuláacal le yano'ob ca'ach yéetelo', tu yo'olal le chuc cay dzo'oc u beetico'obo'. 10Bey xan Jacobo yéetel Juan u paalalo'ob Zebedeo, u yéet meyajo'ob simón, jaka'an u yóolo'ob. Ba'ale' Jesús tu ya'alaj ti' Simón: Ma' a ch'a'ic sajaquil, bejela'e' bíin a ca'aj a chuc wíinico'ob. 11Le ca túun tu biso'ob le cheemo'ob te j lu'umo', tu p'ato'ob tuláacale' ca j bino'ob yéetel Jesús. 12Ca'aliquil ti' yaan Jesús ti' jun p'éel le caajo'obo' j kuch jun túul máac koja'an ti' jáaway, le ca tu yilaj Jesuse' xolaje' ca tu takaj u yich lu'um, táan u ya'alic: Yuumtzil, wa a káate', je'el u páajtal a dzáic in toj óolale'. 13Jesús túune' ca tu dzáalkabtaj, táan u ya'alic: In káati. Quin dzáic a toj óolal. Tu séeblaquil j luk le jáaway ti' le koja'ano'. 14Jesús tu kuben t'antaj ti' ma' u tzicbaltic ti' mix máac lela'. Ba'ale' xeen, e'esabáa ti' le aj kiino'obo', kub xan tu yo'olal a toj óolal le siibal u ya'almaj Moisés, u ti'al ca ila'ac tumen máaco'ob dzo'oc a wutztal. 15Ba'ale' sen ki'itpaj u yutzil péectzilil Jesús, yéetel ya'ab máaco'ob cu much'talo'ob ca'ach u ti'al u yu'ubo'ob u ca'ansaj yéetel tu yo'olal u tojquinta'al u yóolo'ob ti' u koja'anilo'ob. 16Ba'ale' Jesuse' bin tu'ux mixmáac yaan u ti'al ca payalchi'inac. 17Jun p'éel kiine' táan u ca'ansaj Jesús, ti' culucbal ca'ach dze'edzec fariseobi' yéetel u aj ca'anbesajilo'ob le a'almaj t'aano'. Lelo'oba' taalaja'ano'ob ti' tuláacal u mejen caajilo'ob Galilea yéetel Judea, bey xan ti' Jerusalén. U páajtalil Kue' táan u ye'esicubáa ti' Jesús iquil u dzáic u toj óolal le koja'ano'obo'. 18Ca túun j kuch dze'edzec máaco'ob u cuchmajo'ob jun túul máac ti' kóochche' tumen tu'uch' u wíinclil. U káato'ob ca'ach u yocso'ob ichil le najo' tu yo'olal u dzáico'ob tu táan Jesús, 19ba'ale' ma' tu caxtajo'ob tu'ux u yocsico'obi', tumen jach ya'ab máac yani'. Ca túun j na'aco'ob yóokol le najo', ca tu jolo'obe' ca tu yéemsajo'ob le koja'an yanil tu kóochche'ilo' chúumuc ti' le máaco'obo', tu táan Jesús. 20Le ca tu yilaj Jesús u yocsaj óolalo'obe', tu ya'alaj ti' le koja'ano': Wíinic, sa'atsa'an a kebano'ob. 21Je'el túuna' le u aj ca'anbesajilo'ob le a'almaj t'aano' yéetel le fariseobo' jo'op' u tucultico'ob: ¿Máax le máac cu ya'alic ba'al ti' Yuum Ku iquil u t'aan beya'? Mix máac cu páajtal u sa'atsic kebano'ob wa ma' chéen Ku. 22Ba'ale' Jesuse' u yojel ba'ax cu tucultico'ob, ca tu ya'alaj ti'ob: ¿Ba'ax teen ca tuucule'ex beyo'? 23¿Ba'ax asab séeba'an u ya'ala'al: Sa'atsa'an a kebano'ob, wa u ya'ala'al: Líiken xíimbalnen? 24Ja'alibe' bíin in ca'aj túun in we'es te'ex yaan páajtalil ti' u Paal Máac u ti'al u sa'atsic kebano'ob. Ca túun tu ya'alaj ti' le máac tu'uch' u wíinclilo': Ti' teech quin wa'alic: líiken, ch'a'a kóochche'ilo', xeen ta wotoch. 25Tu séeblaquil le máac tu'uch' u wíinclilo' j líik tu táano'ob ca tu ch'a'aj le kóochche' tu'ux chilicbal ca'acho' ca j bin tu yotoch táan u qui'iqui' t'antic Ku. 26Tuláacalo'ob jaka'antac u yóolo'ob, ca tu qui'iqui' t'antajo'ob Ku. Ichil u sajaquilo'obe' tu ya'alajo'ob: Bejela'e' dzo'oc c ilic jak óolal ba'alo'ob. 27Cu dzo'ocol lela' jóok Jesuse' ca tu yilaj jun túul máac cu kamic páatano'ob, Leví u kaaba', culucbal te tu'ux cu bo'ota'al le páatano'obo', ca tu ya'alaj ti': Tzaypachteni'. 28J líik túun Leví, ca tu p'ataj tuláacale' ca j bin tu paach Jesús. 29Cu dzo'ocole' tu beetaj leví jun p'éel nojbe'en janal tu yotoch u ti'al Jesús. Culucbalo'ob xan janal tu yéetelo'ob ya'abcach máaxo'ob cu kamico'ob páatano'ob, yéetel u láak máaco'ob. 30Ba'ale' le fariseobo' yéetel u aj ca'anbesajilo'ob le a'almaj t'aano' jo'op' u ch'inch'in t'aano'ob tu contra u aj canbalo'ob Jesús, táan u ya'alico'ob: ¿Ba'axten ca janale'ex yéetel ca wukule'ex tu yéetel le j kam páatano'obo' bey xan tu yéetel le j kebano'obo'? 31Jesuse' tu núucaj ti'ob: Ma' kaabéet dzaac ti' le máaxo'ob toj yóolo'obo', ba'ale' ti' le máaxo'ob koja'antaco'obo'. 32Tene' ma' taalaja'anen in t'aan le máaxo'ob utzo'obo' ba'ale' le máaxo'ob kebano'obo' tu yo'olal u kexic u tuuculo'ob. 33Je'el túuna' leti'obe' tu káat chi'ito'ob ti' Jesús: ¿Ba'axten u aj canbalo'ob Juane' cu su'ukino'ob yéetel cu sen payalchi'ob, bey xan le u aj canbalo'ob le fariseobo', ba'ale' a aj canbalo'obe' mantadz táan u janalo'ob yéetel táan u yukulo'ob? 34Jesús tu núucaj ti'ob: ¿Je'el wa a beetique'ex u su'ukin le máaxo'ob t'ana'ano'ob u ti'al jun p'éel dzo'ocol beel ca'aliquil le íichamtzil ti' yaan tu yéetelo'obo'? 35Ba'ale' bíin taalac u kiinil le quéen luksa'ac le íichamtzil ichilo'obo', le túun quéen su'ukinaco'ob. 36Tu ya'alaj ti'ob xan le queet t'aana': Mixmáac cu xotic jun xéet' túumben nook u ti'al u pakacoctic jun p'éel úuchben nook. Wa cu beetic beyo' cu kascuntic le túumben nooko', cu dzo'ocol xane' le túumben nooko' ma' ma'alob u yila'al yéetel le úuchben nooko'. 37Mixmáac xan cu láalic túumben vino ti' úuchben kéewelo'ob. Wa cu beetic beyo', le túumben vinoo' cu tejic le kéewelo'obo', le vinoo' cu wéequel, le kéewel xano'' cu kastal. 38Le beetique' kaabéet u láala'al le túumben vinoo' ti' túumben kéewelo'ob; beyo' mix jun p'éel cu kastali'. 39Mixmáac túun cu dzo'ocol u yukic le úuchben vinoo' cu yóoltic u yuk le túumbeno', tumen yaan u ya'alic: Asab ma'alob le úuchbeno'.


Copyright
Learn More

will be added

X\