San Lucas 4

1Jesús chuup yéetel Quili'ich Pixane' j luk tu áalcab ja'il Jordano' ca j bisa'ab x tocoy lu'um tumen le pixano'. 2Ti' yanchaj cuarenta kiino'obi' táan u túunta'al u yóol tumen kasilba'al. Ma' jaan ti' le kiino'obo', le beetique' tu yu'ubaj wi'ij. 3Le kasilba'alo' ca túun tu ya'alaj ti': Wa tumen u Paalech Kue', a'al ca suunac waajil le tuunicha'. 4Jesús tu núucaj ti': Le quili'ich Dzíibo' cu ya'alic: Ma' chéen yéetel waaj bíin cuxlac wíiniqui', ba'ale' tac xan yéetel tuláacal u t'aan Ku. 5Cu dzo'ocole' le kasilba'alo' tu bisaj Jesús ti' jun p'éel ca'anal múul, jun súutuc ca tu ye'esaj ti' tuláacal u caajilo'ob yóokolcaab, 6le kasilba'alo' ca tu ya'alaj ti': Tene' je'el in dzáic teech tuláacal le páajtalila' yéetel u nojbe'enil le caajo'oba'. Tumen tene' in kamaj tuláacal lela', yéetel quin dzáic ti' le máax bíin in wóolte'. 7Wa teech ca xoltal a kultene' tuláacal bíin a ti'alinte. 8Ba'ale' Jesús tu núucaj ti': Tzelabáa tin táan, kasilba'al, tumen le Quili'ich Dzíibo' cu ya'alic: Kult Yuumtzil a Ku yéetel meyajt chéen leti'. 9Cu dzo'ocole' le kasilba'alo' tu bisaj Jesús tu caajil Jerusalén ca tu na'acsaj tu yóokol le kulnajo', ca tu ya'alaj ti': Wa tumen u Paalech Kue', pulabáa lu'um, 10tumen ti' le Quili'ich Dzíibo' cu ya'alic: Kue' yaan u ya'alic ti' u ángelo'ob ca u canantecho'ob. 11Yaan u kamiquecho'ob tu kabo'ob tu yo'olal ma' a kolic a wooc ti' tuunich. 12Jesús tu núucaj ti': Cu ya'alic xan le Quili'ich Dzíibo': Ma' a túuntic u yóol Yuumtzil a Ku. 13Le ca tu yilaj le kasilba'al ma' tu caxtic bix u túuntic u yóol Jesuse', ca j náachchaj ti' leti' dze'edzec kiin. 14Jesuse' suunaj Galilea chuup yéetel u páajtalil Quili'ich Pixan, yéetel cu yúuchul tzicbal tu yo'olal ti' tuláacal le lu'umo'. 15Ca'ansajnaj cajal caaj tu sinagogailo'ob yéetel nojbe'encunsa'ab tumen tuláacal máaco'ob. 16Ca j bin Jesús Nazaret le caaj tu'ux ch'íiji'. Tu kiinil sábado j ooc sinagoga je'el bix suuquile', ca j wa'alaj u xoc le Quili'ich Dzíibo'. 17Ca j dza'ab ti' le dzíibil ju'un tu beetaj aj bóobat Isaíaso'. Ca tu je'aj ca tu caxtaj le tu'ux dzíibta'an beya': 18U pixan Yuumtzile' ti' yaan tin wóokole', tumen u jun páaycunsmajen u ti'al in dzáa ma'alob péectzil ti' le óotzilo'obo', u túuxtmajen in dzáa toj óolal ti' le cu mukyaj u pucsi'ikalo'obo', u ti'al in ka'ayt jáalkabil ti' le kala'ano'obo', u ti'al in dzáa u sáasil le ch'óopo'obo', u ti'al in jáalkabt le loobilta'ano'obo', 19yéetel u ti'al in tze'ect u ma'alob kiinil Yuumtzil. 20Jesús ca tu nup'aj le dzíiba'an ju'uno' ca tu dzáaj ti' u j áantajil le sinagogao' ca j culaji'. Tu yo'olal láili' táan u pacta'al tumen tuláacal le máaco'ob yano'ob ca'ach te j sinagogao', 21leti'e' t'aanaje' ca tu ya'alaj: Bejela'e' dzo'ocpaja'an ta táane'ex le dzíibo'oba'. 22Tuláacalo'ob táan u yutzil t'aano'ob tu yo'olal Jesús, yéetel jaka'an u yóolo'ob tu yo'olal le t'aano'ob jach jadzutztac cu ya'alico'. Táan xan u káatico'ob tu baatzilo'ob: ¿Ma' wa u paal José lela'? 23Jesuse' tu ya'alaj ti'ob: Jach in wojel bíin in ca'aj a wa'ale'ex teen le queet t'aana': J dzacyaj, dzacabáa ta juunal. Yéetel yaan a wa'alique'ex tene': Le ba'ax t u'uyaj ta beetaj Capernaume', beet xan way ta lu'ume'. 24Ca túun tu ya'alaj: Jach tu jaajil quin wa'alic te'ex mina'an aj bóobat cu yutzil ka'amal tu caajal. 25Tu jaajil quin wa'alic te'ex, ya'ab x quimen íichamo'ob, yaan ca'ach tu caajil Israel tu kiinilo'ob aj bóobat Elías le ca j p'áat ma' tu káaxal ja' ichil óox p'éel ja'abo'ob ca'a tac táan chúumuc, yéetel yanchaj ca'ach wi'ij ti' tuláacal le lu'umo', 26ba'ale' Kue' ma' tu túuxtaj Elías tu yicnal mix jun túul ti' le x quimen íichamo'ob yano'ob ca'ach tu caajil Israelo' ba'ale' tu yicnal chéen jun túul cajacbal ca'ach Sarepta, naadz ti' u caajil Sidón. 27Yaan xan ca'ach Israel ya'ab koja'ano'ob ti' jáaway tu kiinilo'ob aj bóobat Eliseo, ba'ale' mix jun túul ti' leti'ob dza'aqui', chéen Naamán leti'e' Siria u taal. 28Le ca tu yu'ubajo'ob le ba'alo'oba', tuláacal le yano'ob te j sinagogao' sen kuuxilnajo'ob. 29Ca j líiko'obe' ca tu jóokesajo'ob Jesús te j caajo' ca tu biso'ob tu xuul ca'anlil le múul tu'ux yaan le caajo' u ti'al u léench'intico'ob ca'ach te'elo'. 30Ba'ale' Jesuse' j máan chúumuc ti'obe' ca j bini. 31Ca j bin Jesús Capernaum, jun p'éel caaj ti' Galilea, te'elo' tu ca'ansaj le máaco'ob tu kiinil sábadoo'. 32Jaka'an yóolo'ob ca'ach ti' bix u ca'ansaj, tumen cu t'aan yéetel páajtalil. 33Te j sinagogao' yaan ca'ach jun túul máac yaan kaakas pixan ti'e' ca j awatnaji: 34P'ato'oni'. ¿Ba'axten ca wocsicabáa t éetel, Jesús Nazaretil? ¿Taalech wa u ti'al a xu'ulso'on? Tene' in kaj óolech, in wojel xan teech u Quili'ich Ku. 35Jesús tu keyaj le kaakas pixano', táan u ya'alic: ¡Mac a chi' yéetel p'at le máaca'! Le kaakas pixan túuno' ca tu lúubsaj lu'um le máac actáan ti' leti'obo', ca jóok ti' leti' mix tu beetaj loob ti'i'. 36Tuláacal ja'ak u yóolo'ob, táan u ya'alico'ob ca'ach tu baatzilo'ob: ¿Ba'ax t'aanil le beyo'oba'? Tumen le máaca' yéetel nojoch páajtalil cu ya'alic ca jóokoc le kaakas pixano'obo', leti'ob xane' cu jóokolo'ob. 37Bey túuno' jóok u tzicbalil Jesús ti' tuláacal u bakpach le caajo'. 38Jesús jóok ti' le sinagogao' ca j ooc tu yotoch Simón. U suegra Simone' jach koja'an ca'ach yéetel chocwil, ca j káat óolta'ab ti' Jesús tu yo'olal leti'. 39Jesús j chinlaj tu yóokole' ca tu keyaj le chocwilo' ca tu luksaj ti'. Tu séeblaquil j líik le co'olelo' ca jo'op' u meyajtico'ob. 40U ti'al u bin kiine' tuláacal le máaxo'ob yaan u koja'ano'ob ti' jejeláas koja'anilo'obo' tu taaso'ob tu yicnal Jesús. Leti' túune' tu dzáaj u kab tu yóokol jujun túulilo'obe' ca tu tojquintaj u yóolo'ob. 41Te ichil le koja'ano'obo' jóok xan ya'abcach kaakas pixano'obe' táan u yawato'ob yéetel táan u ya'alico'ob: Teech u paalech Ku. Ba'ale' Jesús tu keyaj le kaakas pixano'obo' yéetel ma' tu cha'aj u t'aano'obi', tumen leti'obe' u yojelo'ob leti'e' Cristo. 42U ti'al u sáastale' jóok Jesús ti' le caajo' ca j bin ti' jun p'éel táanxel cúuchil. Ba'ale' jo'op' u caxta'al tumen le máaco'obo' yéetel j kucho'ob te tu'ux yano', tumen ma' u káato'ob ca xi'iqui', 43ba'ale' jesús tu ya'alaj ti'ob: Kaabéet in dzáic u ma'alob péectzilil u ajawil Ku ti' u láak caajo'ob xan, tumen le u biilal túuxta'abilaquen. 44Bey túun máanic Jesús táan u tze'ec ti' u sinagogailo'ob Galilea.


Copyright
Learn More

will be added

X\