San Lucas 22

1Nadza'an u kiinil u kiinbesa'al u jaanta'al le waaj x ma' levadurao', u káat u ya'ale' u kiinbesajil le Pascuao'. 2U nojochilo'ob le aj kiino'obo' yéetel u aj ca'anbesajilo'ob le a'almaj t'aano' táan ca'ach u caxtico'ob bix je'el u páajtal u quiimsico'ob Jesús, tumen sajaco'ob ti' le máaco'obo'. 3Ca túun j ooc Satanas tu pucsi'ikal Judas, le máax cu kaaba'intic xan Iscariote, leti'e' jun túul ti' le doce aj canbalo'obo'. 4Lela' j bin u yil u nojochilo'ob le aj kiino'obo' yéetel u nojochilo'ob le kulnajo', ca tu ya'alaj ti'ob bix je'el u kubic Jesús tu kabo'obe'. 5Leti'obe' qui'imacchaj u yóolo'ob ca tu ya'alajo'ob u dzáico'ob taakin ti'. 6Judas tu éejemtaje' ca jo'op' u caxtic bix cun u kubic ti'ob le quéen mina'anchajac mix máaque'. 7J kuch u kiinil u jaanta'al le waaj x ma' levadurao', u kiinil u quiimsa'al u j tamanil le Pascuao'. 8Jesuse' tu túuxtaj Pedro yéetel Juan, táan u ya'alic: Xeene'ex a nu'ucbese'ex to'on u janalil le Pascuao'. 9Leti'obe' tu káat chi'ito'ob ti': ¿Tu'ux a káat ca c nu'ucbesej? 10Ca j núuca'ab ti'ob tumen Jesús: Le quéen ocoque'ex ichil le caajo', yaan a wilique'ex jun túul máac táan u bisic juum p'uul ja'. Xeene'ex tu paach tac te j naj tu'ux cun ocolo', 11ca a wa'ale'ex ti' u yuumil le najo': Le aj ca'anbesajo' cu ya'alic teech: ¿Tu'ux yaan le cúuchil tu'ux quin in jaant u janalil le Pascua yéetel in aj canbalo'obo'? 12Leti' túune' yaan u ye'esic te'ex jun p'éel nojoch cúuchil nu'uc ta'an tu ca'anlil le najo'; máakante'ex le janal te'elo'. 13Leti'obe' j bino'obe' ca tu yilajo'ob tuláacal je'el bix a'ala'abic ti'ob tumen Jesuse', ca tu máaka'anto'ob u janalil le Pascuao'. 14Le ca j kuch u yoraile' Jesuse' j culaj janal yéetel u aj canbalo'ob. 15Ca tu ya'alaj ti'ob: Buca'aj in dzíiboltmail in jaantic ta wéetele'ex u janalil le Pascua' ma'ili' mukyajnaquene'. 16Tumen quin wa'alic te'exe' ma' bíin in jaant tu ca'a téeni' p'is le quéen dzo'ocpajac tu ajawil Kue'. 17Ca tu ch'a'aj tu kab le ukulo', tu dzáaj nib óolal ca tu ya'alaj: Ch'a'ex lela', t'oxe'ex ichile'ex; 18tumen quin wa'alic te'exe' ma' bíin in wuk tu ca'a téen u kab uvao' p'is le quéen taalac u ajawil Kue'. 19Cu dzo'ocole' tu machaj le waajo', tu dzáaj nib óolal, tu xet'aje', ca tu dzáaj ti'ob, táan u ya'alic: Lela' in wíinclil kuba'an ti' quíimil ta wo'olale'ex. Beete'ex lela' u ti'al a ka'ajsiquene'ex. 20Bey xan tu beetaj yéetel le ukulo' le ca j dzo'oc le janalo', ca tu ya'alaj: Le ukula' leti' le túumben nup t'aan jajcuna'an yéetel in ki'ikel weca'an ta wo'olale'ex. 21Ba'ale' u kab le máax cun kubiqueno' ti' yaan yéetel in kab tu yóokol le mayacche'a'. 22U Paal Máaque' táan u bin ti' le bej dza'an ti' u xíimbalto', ba'ale' ¡Yaj yanil le máax kubico'! 23Le aj canbalo'ob túuno' jo'op' u káatic tu baatzilo'obe' máax ichilo'ob cun kubic. 24Ca jo'op' u ba'atel t'antico'ob tu baatzilo'obe' máax ichilo'ob u mas nojochil. 25Ba'ale' ca j a'ala'ab ti'ob tumen Jesús: U ajawo'ob caajo'obe' cu beetic u jalachilo'ob yéetel páajtalil tu yóokolo'ob, le xan u nuuctaquilo'obo' cu ya'alale' máaco'ob cu beetico'ob utz. 26Te'exe' ma' unaj a béeytale'exo', ba'ale' le máax mas nojoch ichile'exe' yaan u beeticubáa bey u mas chichanile'; le máax nojpoole' yaan u beeticubáa bey le máax cu meyajo'. 27Tumen ¿máax mas nojoch, le máax cu cutal janalo' wa le máax meyajtico'? ¿Ma' wa leti' le máax cu cutal janalo'? Ba'ale' tene' ti' yanen ichile'ex bey le máax cu meyajo'. 28Te'ex máax yanchaja'ane'ex tin wéetel mantadz ti' in túuntaj óolalo'ob. 29Le beetique' teen quin dzáic te'ex jun p'éel ajawil je'el bix dza'anil ti' teen tumen in Taatae', 30u ti'al ca yanaque'ex yéetel ca ukulnaque'ex tin wéetel tin ajawil, bey xan u ti'al ca culaque'ex ti' jalach káanche'ob u ti'al ca p'is óolte'ex u doce chi'ibalilo'ob Israel. 31Yuumtzile' tu ya'alaj xan: Simón, ilawile satanase' dzo'oc u káatique'ex u ti'al u tíite'ex je'el bix u beeta'al ti' trigoe', 32ba'ale' tene' dzo'oc in payalchi' ta wo'olale' u ti'al ma' u mina'antal a wocsaj óolal. Teech túune', le quéen suunaqueche'; áant a sucu'uno'ob u ti'al ca jéedzec u yóolo'ob. 33Ca j a'ala'ab ti' tumen Simón: Yuumtzil, tene' in dzaama in wóol u ti'al ca ka'alaquen ta wéetel wa tac u ti'al ca quíimiquen ta wéetel. 34Ca j a'ala'ab ti' tumen Jesús: Pedro, quin wa'alic teche', ma'ili' kaaynac le j t'eel bejela'o', teche' óoxten bíin a wa'al ma' a kaj óoleni'. 35Ca túun j káata'ab ti'ob tumen Jesús: Le ca tin túuxtaje'ex x ma' sáabucanil, x ma' taakinil, x ma' xanabile', ¿yaan wa ba'ax tu binetaj te'ex? Leti'obe' tu ya'alajo'ob: Mixba'al. 36Ca tu ya'alaj ti'ob: Bejela'e' ma' beyi'; le máax yaan sáabucan ti'e' u bise, bey xan taakin; le máax mina'an táadz máascab ti'e' u con u búuque' ca u mane. 37Tumen quin wa'alic te'exe' yaan u dzo'ocpajal ti' teen le ba'ax cu ya'alic le Quili'ich Dzíibo'obo': Ichil kaakas máaco'ob xo'oqui. Tumen tuláacal le ba'axo'ob dzíibta'an tin wo'olalo' yaan u dzo'ocpajal. 38Leti'ob túune' tu ya'alajo'ob: Yuumtzil, je'el ca'a p'éel táadz máascaba'. Leti'e' tu núucaj: Yaan yéetel lelo'. 39Ca jóok Jesuse' ca j bin tu pu'uquil Olivo'ob je'el bix suuquil ti'e', ca j bin u aj canbalo'ob tu paach. 40Le ca j kuch te'elo' tu ya'alaj ti'ob: Payalchi'inene'ex tu yo'olal ma' a lúubule'ex ti' túuntaj óol. 41Cu dzo'ocole' ca j náachchaj Jesús ti'ob: u náachile' bey tac tu'ux cu náacal u ch'in jun túul máaque', ca j xolaj payalchi'. 42Tu ya'alaj: In yuum, wa a káate' toquen ti' le mukyaja', ba'ale' ma' u beeta'al le ba'ax in káat tene', ba'ale' le ba'ax a káat teche'. 43Ca túun j chíicpaj jun túul u ángel ca'an u ti'al dzáic muuk ti'. 44Ca'aliquil táan u sen mukyaje' tu asab dzáaj u yóol ti' u payalchi', ca j ch'áaj u kíilcab bey u nucuch ch'áajal ki'ik cu lúubul ju'ume'. 45Cu dzo'ocol u payalchi'e' líike' ca j bin tu'ux yaan u aj canbalo'obe', ca tu yilaje' táan u wenelo'ob, luba'an u muuko'ob tu yo'olal yaayaj óolal. 46Ca tu ya'alaj ti'ob: ¿Ba'axten táan a wenele'ex? Líikene'ex, payalchi'inene'ex tu yo'olal ma' a lúubule'ex ti' túuntaj óol. 47Ca'aliquil táan u t'aan Jesuse' j kuch ya'ab máaco'ob. Táanil ti' leti'obe' j taal Judas lela' jun túul ti' le aj canbalo'obo', ca tu nadzajubáa ti' Jesús u ti'al u dzu'udze. 48Ca túun j a'ala'ab ti' tumen Jesús: Judas, ¿Yéetel jun p'éel dzu'udz ca kubic u Paal Máac? 49Le máaxo'ob yano'ob yéetel Jesuso', le ca tu yilajo'ob ba'ax cu yúuchule', tu káatajo'ob ti': Yuumtzil, ¿c kamico'ob wa yéetel máascab? 50Jun túul ichilo'obe' tu beetaj loob ti' u palitzil u nojoch le aj kiino'obo', tu ch'acaj u le' u x no'oj xiquin. 51Ba'ale' tu ya'alaj Jesús: P'áate'ex, yaan yéetel lelo'. Ca tu péedzkabtaj Jesús u xiquin le palitzilo' ca tu dzacaj. 52Cu dzo'ocole' tu ya'alaj ti' u máaquilo'ob le aj kiino'ob, ti' u nuuctaquil le kulnajo', yéetel ti' le anciano'obo', le máaxo'ob j taalo'ob u ti'al bisico': ¿Dzo'oc wa a jóokole'ex yéetel máascabo'ob bey xan yéetel che'ob, bey u ti'al a chuquique'ex jun túul j ocole'? 53Le ca'ach ti' yanen ta wéetele'ex láaj kiin te j kulnajo', mix ta tich'aj a kabe'ex u ti'al a machquene'exi'; ba'ale' lela' a hora'ex bey xan u ti'al u páajtalil le éekjoch'e'enilo'. 54Ca túun ma'ach Jesuse' ca j bisa'ab tu yotoch u nojochil le aj kiino'obo'. Pedroe', quex náach tu tzaypachtilaque', j kuch tac tu'ux j bisa'abi. 55Chúumuc táancabe' j t'a'ab jun p'éel káake', ca j culajo'ob tu bakpach; Pedroe' j culaj xan ichilo'ob. 56Jun túul x palitzile', le ca tu yilaj ti' culucbal Pedro tu chuun le káako', tu jach pactaje' ca tu ya'alaj: Bey xan le máaca' ti' yaan ca'ach yéetel Jesuse'. 57Ba'ale' Pedroe' tu ya'alaj ma' jaaji, táan u ya'alic: Co'olel, tene' ma' in kaj óoli'. 58Ca j máan jun súutuque' j ila'ab tumen jun túul máaque', ca j a'ala'ab ti' tumen: Teche' jun túulech ti'obi'. Ba'ale' Pedroe' tu ya'alaj: Ma', wíinic, ma' teni'. 59Cu dzo'ocol u máan míin jun p'éel horae', u láak jun túul máaque' tu sen a'alaj: Jach tu jaajile' le máaca' ti' yaan ca'ach tu yéetele' tumen Galileail xan. 60Ca túun tu ya'alaj Pedro: Wíinic, mix in wojel ba'ax ca wa'aliqui'. Jach ti' le súutuco', ca'aliquil táan u t'aan Pedroe', j kaaynaj jun túul j t'eel. 61Yuumtzile' tu sutaj u yiche' ca tu pactaj Pedro. Pedro túune' j ka'aj ti' ba'ax j a'ala'ab ti' tumen Yuumtzil: Ma'ili' kaaynac le j t'eel bejela'a' óox téen bíin a wa'al ma' a kaj óoleni'. 62Ca jóok Pedroe' ca okolnaj yéetel yaayaj óolal. 63Le máaxo'ob canantic Jesuso' tu sen p'a'astajo'ob yéetel tu ja'ajadzo'ob. 64Tu pixajo'ob u yiche', tu lajo'obe', ca tu ya'alajo'ob ti': ¡Na'at máax lajech! 65Tu ya'alajo'ob xan ya'abcach ba'alo'ob u ti'al u poch'ico'ob. 66Le ca j sáaschaje', j much'laj u ancianoilo'ob le judíobo', u nojochilo'ob le aj kiino'obo' yéetel u aj ca'anbesajilo'ob le a'almaj t'aano', ca j bisa'ab Jesús tu táano'obe'; ca tu káat chi'ito'ob ti': 67A'al to'on, ¿teech wa le Cristoo'? Leti'e' tu núucaj ti'ob: Wa quin wa'alic te'ex tene', ma' táan a wocsaj óolte'ex. 68Wa xan quin káatic a chi'exe', ma' táan a núuque'ex teen mix táan a cha'iquene'ex. 69Ba'ale' líikbal bejela'e' u Paal Máaque' yaan u cutal tu x no'oj Ku máax yaan tuláacal páajtalil ti'. 70Tuláacalo'ob tu káatajo'ob ti': ¿Teech wa túun u Paal Ku? Ca tu núucaj Jesús ti'ob: Bey, teen, je'el bix dzo'oc a wa'alique'exo'. 71Leti'ob túune' tu ya'alajo'ob: ¿Ba'ax u biilal to'on u láak j tacpoolo'ob? To'on dzo'oc c u'uyic u jóokol tu chi'.


Copyright
Learn More

will be added

X\