Santiago 3

1In sucu'une'ec, ma' unaj u yantal ichile'ex ya'ab ca u betajuba'ob j ca'anbesajo'obi', tumen a wojele'exe' le máaxo'on ca'anbesajo' asab ya'ab bíin p'is óolta'aco'on. 2Tuláacalo'one'ex c beetic ba'alo'ob ma' tu beeli'; wa yaan máax ma' tu ya'alic ba'al ma' tu beeli', lela' jun túul máac utzil chuca'an cu páajtal u nu'uctic ma'alob tuláacal u wíinclil. 3Le quéen c dzáa jok ni' ti' tu chi' le tzíimino'ob u ti'al ca u yu'ubo'ob c t'aano', cu páajtal c su'usutic tuláacal u wíinclil beyo'. 4Il a wile'ex xan le cheemo'obo'; quex jach táaj nuuctaco'ob bey xan le iik péecsico'ob jach ka'amo', le máac bisico' cu páajtal u bisic je'el tu'uxac u káate' yéetel jun p'éel chan béebe' che'. 5Bey xan u yúuchul yéetel u yaak wíinic; jun jaatz jach chichan ti' le wíinclilo', ba'ale' cu tuculticubáa jach yaan u páajtalil u ti'al u beetic ya'abcach nucuch ba'alo'ob. ¡Buca'aj nucuch káaxo'ob cu páajtal u tóoca'al yéetel jun p'éel chan káak! 6U yaak wíinique' jun p'éel káak, jun p'éel yóokolcaab chuup yéetel kaas dza'an ti' c wíinclil, cu kascuntic tuláacal u wíinclil máac. 7Jun túul máaque' cu páajtal u suucbesic dzíidzic ba'alche'ob, ch'íich'o'ob, caano'ob yéetel u ba'alche'ilo'ob ka'anab; u suucbesmajo'ob xan. 8Ba'ale' mix máac cu páajtal u suucbesic u yaak tumen jun p'éel kaas ma' táan u cha'ic comquinta'al, chuup xan yéetel u kaab yaach cu quiimsaj. 9Yéetel le aaka' c qui'iqui' t'antic c Yuumtzil c Taata, yéetel leti' xane' c kaakas t'aantic máaco'ob beeta'ano'ob je'el bix u chica'anil Kue'. 10Ti' jun p'éelili' chi' cu jóokol qui'iqui' t'aano'ob yéetel kaakas t'aano'ob. In suucu'une'ex, lela' ma' unaj u yúuchul beyo'. 11¿Je'el wa u jóokol ti' jun p'éelili' sayab ch'ujuc ja' yéetel káakaj ja'e'? 12In sucu'une'ex, ¿je'el wa u dzáic aceitunaob jun cúul higuerae', wa jun cúul uvae' je'el wa u dzáic higo'obe'? Bey xan jun p'éelili' sayabe' ma' tu páajtal u dzáic ch'óoch' ja' yéetel ch'ujuc ja'. 13¿Yaan wa máax ichile'ex yaan u na'at bey xan kaj óolal? U ye'es yéetel u ma'alob cuxtale' u utzil meyajo'ob yéetel le cabal óolal cu dza'abal ti' tumen le na'ato'. 14Ba'ale' wa te'ex yaan loolob dzíibolalo'ob ta pucsi'ikale'exe' yéetel ba'atelile', ma' unaj túun u ca'analtal a wiche'exi' mix a tuuse'ex tu tu yo'olal le jaajo'. 15Tumen lela' ma' ca'anilbe'en na'ati' ba'ale' lu'umcabil na'at, wíinicbe'en yéetel ti' kaasil ba'al u taal. 16Tumen tu'ux yaan loolob dzíibolalo'ob yéetel ba'atelile', ti' yaan xan xa'axa'ak óolal yéetel tuláacal u jejeláasil kaasi'. 17Ba'ale' le máaxo'ob yaan le ca'anilbe'en na'at ti'obo' yáax táanile' yaan jun p'éel qui'ilich cuxtal ti'ob; cu dzo'ocole' yaan suuc óolal ti'ob; utz u pucsi'ikalo'ob yéetel toj u tuuculo'ob. Cu ch'a'ico'ob óotzilil yéetel cu beetico'ob utz; cu ya'alico'ob ba'al jaaj yéetel mina'an ca'a p'éel ichil ti'ob. 18Yéetel le máaxo'ob cu táan ¿ooltico'ob u yantal jéedzelo', cu paakalo'ob ich jéedzel u ti'al u jochico'ob jun p'éel toj cuxtal.


Copyright
Learn More

will be added

X\