Santiago 2

1Sucu'une'ex te'ex ca wocsaj óoltique'ex c nojbe'en Yuumtzil Jesucristoe', ma' unaj a pactique'ex jela'an jun túul máac tu yóokol u láaki'. 2Je'el bix lela': wa cu yocol ti' le cúuchil tu'ux ca much'tale'exo' jun túul máaque' yaan tu kabe' jun p'éel anillo beeta'an yéetel oro, yéetel u búuquintmaj jun p'éel co'ocoj nook, bey xan cu yocol jun túul máac óotzil u búuquintmaj jun p'éel ja'aja'at nooke', 3yéetel ca táan óoltique'ex ma'alob le máax u búuquintmaj le co'ocoj nooko' yéetel ca wa'alique'ex ti': Culen waye' ti' le ma'alob cúuchila'; ba'ale' ti' le máac óotzilo' ca wa'alique'ex: Teche' wa'alen te'elo', wa culen te j lu'umo'; 4le beyo' táan a pactique'ex jela'anil jun túul máac tu tzéel u láak, táan a p'is óolale'ex yéetel kaakas tuucul. 5In yaabilaj sucu'une'ex, u'uye'ex lela': Kue' u yéeymaj le máaxo'ob óotzilo'ob wa yóokolcaabe', u ti'al ca ayikalchajco'ob ti' ocsaj óolal yéetel u ti'al ca u kamo'ob le ajawil u ya'almaj u dzáic ti' le máaxo'ob yaabilmailo'. 6Ba'ale' te'exe' ca pajique'ex u subtal le máaxo'ob óotzilo'obo'. ¿Ma' le máaxo'ob ayikalo'ob jaantic u yich a meyaje'exo' yéetel máaxo'ob jíiltique'ex tu táan le jalach wíinico'obo'? 7¿Ma' wa leti'ob máaxo'ob cu t'aano'ob kaas tu yo'olal le jadzutz kaaba' ch'a'achi'ita'ab ta wo'olale'exo'? 8Wa tu jaajil ca dzo'ocbesique'ex le nojoch a'almaj t'aan je'el bix cu ya'alic le Quili'ich Dzíibo': Yaabilt a láak je'el bix a yaabilticabáa teche', ma'alob ba'ax ca beetique'ex. 9Ba'ale' wa ca caxtique'ex u jela'anil jun túul máac tu yóokol u láake', táan a kebanchajle'ex yéetel táan a si'ipiltale'ex tu táan u ya'almaj t'aan Ku. 10Tumen wa jun túul máac cu dzo'ocbesic tuláacal le a'almaj t'aano', ba'ale' cu p'atic jun p'éel wa ba'ax ti' le a'almaj t'aan ma' táan u dzo'ocbesico', cu si'ipiltal ti' tuláacal le a'almaj t'aano'. 11Tumen le Ku máax tu ya'alaj: Ma' a nupkebantal, tu ya'alaj xan; Ma' a quiimsaj wíinic. Bey túuno', wa jun túul máac ma' tu kebantal ba'ale' cu quiimsaj wíinique', dzo'oc u beetic u ma' u'uyaj t'aanil tu táan le a'almaj t'aano'. 12Te'exe' unaj a t'aane'ex yéetel a cuxtale'ex je'el bix le máaxo'ob bíin p'is óolta'aco'obo' yéetel le a'almaj t'aan cu dzáic to'on jáalkabilo'. 13Tumen le máaxo'ob ma' teech u ch'a'ico'ob óotzililo', x ma' ch'a'a óotzilil bíin p'is óolta'aco'ob; ba'ale' le máaxo'ob cu ch'a'ico'ob óotzililo', bíin jóokoco'ob yéetel utz tu kiinil le p'is óolo'. 14In sucu'une'ex, ¿ba'ax u biilal ti' máac wa cu ya'alic yaan ocsaj óolal ti' ba'ale' ma' táan u beetic utzil meyajo'ob? ¿Je'el wa u páajtal u to'ocol tumen le ocsaj óolalo'? 15Co'ox tucultique' ti' jun túul sucu'un wa quiique' cu bineltic le nook yéetel le waaj kabéet ti' le kiino', 16yéetel jun túul ichile'exe' cu ya'alic ti'e': Ca xi'ic teech utzil; tep'abáa yéetel jaanen, ba'ale' ma' táan u dzáic ti' le ba'ax kabéet u ti'al le wíinclilo' ¿ba'ax u biilal lelo'? 17Bey u yúuchul yéetel le ocsaj óolalo'; wa ma' tu ye'esa'al yéetel utzil meyajo'obe', le ocsaj óolalo' quimen. 18Ba'ale' je'el u yúuchul u ya'alic wa máaxe': Teche' yaan teech ocsaj óolal, tene' quin beetic utzil meyajo'ob. E'es teen túun a wocsaj óolal x ma' utzil meyajo'obe' teen túune' quin we'esic teech in wocsaj óolal tu yo'olal le utzil meyajo'ob quin beetico'. 19Teche' ca wocsaj óoltic yaan chéen jun túulili' Ku, ma'alob ba'ax ca beetic; ba'ale' le kaakas pixano'obo' cu yocsaj óoltico'ob lela', yéetel cu quiquilanquilo'ob tu yo'olal u sajaquilo'ob. 20Ba'ale' ma' a káat a kaj óolt, j ma' na'at wíinic, le ocsaj óolalo' ma' tu ye'esa'al yéetel utzil meyajo'obo' jun p'éel ba'al quimen 21Kue' tu kamaj Abraham, c úuchben taata bey jun túul máax toje' tu yo'alal le ba'ax tu beetaj ca tu kubaj u paal Isaac bey jun túul quíimsbil siibale'. 22Ca wilique' ti' Abrahame' le ocsaj óolalo' tu ye'esajubáa yéetel le ba'ax tu beetajo'. 23Bey dzo'ocpajic le Quili'ich Dzíib cu ya'alic beya': Abrahame' tu yocsaj óoltaj Ku, yéetel tu yo'olal u yocsaj óolale' Kue' tu kamaj bey jun túul máac toje'. Abraham túune' kaaba'inta'ab u amigo Ku. 24Dzo'oc a wilique'ex, túun, Kue' cu kamic máac tac tu yo'olal le utzil meyajo'ob cu beetico', ma' chéen tu yo'olal u yocsaj óolali'. 25Bey xan úuchic yéetel Rahab, le co'olel kaas u cuxtalo'; Kue' tu kamaj bey jun co'olel toje' tu yo'olal le utzil meyaj tu beetajo' iquil tu kamic ma'alob le máaxo'ob túuxta'abo'obo', yéetel iquil tu yáantilaco'ob jóokol ti' u láak bej. 26Bey je'el bix le wíinclil x ma' pixanil quimeno', bey xan le ocsaj óolalo' wa ma' tu ye'esa'al yéetel utzil meyajo'obe' quimen u yanil.


Copyright
Learn More

will be added

X\