Santiago 1

1Teen, Santiago, Palitzil ti' Ku yéetel ti' Yuumtzil Jesucristoe', quin tziquil t'aantic u doce ch'i'ibalilo'ob Israel ti'it'paja'ano'ob tu yóokolcaab. 2In sucu'une'ex, te'exe' unaj u jach qui'imactal a wóole'ex le quéen máanaque'ex ti' jejeláas túuntaj óolo'obe'. 3Tumen a wojele'ex le quéen túunta'ac u yóol a wocsaj óolale'exe' te'exe' ca canique'ex u yantal te'ex u asabil chuca'an óolal. 4Ba'ale' il a wile'ex le chuca'an óolalo' ca ma'alobchajac u meyaj u ti'al ca yiijchajque'ex yéetel u ti'al ca utzil chuca'anchajque'ex ma' u bineltic te'ex mix ba'al. 5Wa jun túul ti' te'ex cu bineltic na'at ti'e', u káat ti' Ku, Kue' bíin u dzáa ti'; tumen leti'e' cu dzáic ti' tuláacal x ma' p'iisil yéetel ma' táan u ch'inic tu yich mix máac. 6Ba'ale' yaan u káatic yéetel ocsaj óolal, ma' u ca'a p'éelchajal u yóol ti' mix ba'al; tumen le máax cu ca'a p'éelchajal u yóole' bey je'el bix le u cuclil le ka'anab cu bisa'al tumen iik ti' jun tzéel tac ti' u láak jun tzéelo'. 7Le máax beyo' ma' unaj u tucultic wa yaan u kamic wa ba'ax ti' Yumtzili', 8tumen le máax ca'a p'éel u yóole' ma' tu páajtal u jedzic u tuucul ti' mix ba'al. 9Le sucu'un óotzil u cuxtalo' unaj u qui'imactal u yóol iquil u líiksa'al tumen Ku. 10Le máax ayikale' unaj u qui'imactal u yóol le quéen cabalcunta'aco'. Tumen le ayikalo' bey je'el bix u lool le xíiwo', ma' tu páajtal u xáantal. 11Le quéen jóokoc le kiin yéetel le quéen chocochajco', le xíiwo' cu tijile' yéetel cu lúubul u lool; u jadzutzile' cu xu'ulul. Bey xan le ayikalo' yaan u xu'ulul chúumuc u meyajo'ob. 12Qui'i u yóol le máac cu mukyajtic yéetel chuca'an óolal le túuntaj óolo'obo'; tumen le quéen jóokoc kambe'ene', bíin u kam le siibalo', bey jun p'éel péet jo'ole', le cuxtal u ya'almaj Ku u dzáic ti' le máaxo'ob yaabilmajilo'. 13Le quéen túunta'ac u yóol máac u ti'al u beetic wa ba'ax kaase', ma' unaj u tucultic wa Ku máax túuntic u yóoli'; tumen Kue' ma' tu túunta'al u yóol tumen le kaaso', mix leti' cu túuntic u yóol mix máaqui'. 14Ba'ax cu yúuchule', le quéen táabsa'ac wa máax tu yo'olal u kaakas dzíibolalo'obe' leti' túun le quéen túunta'ac u yóol. 15Ti' le kaakas dzíibolalo'oba' cu síijil le kebano'; ti' le kebano', le quéen chuca'anchajac u ch'íijile' cu síijil le quíimilo'. 16In yaabilaj sucu'une'ex, ma' a tusicaba'ex. 17Tuláacal ma'alob yéetel utzil chuca'an siibale' ca'anal u taal ti' le Taata máax j beet u sáasililo'ob le ca'ano'. Kue' mix bikin cu kexpajal, yéetel ti' leti'e' mina'an u yoochelo'ob jelpajalil. 18Dzo'oc u dzáic to'on cuxtal tu yo'olal u t'aanil le jaajo', u ti'al ca béeyaco'on je'el bix u yáax icho'ob le ba'alo'ob u beetmajo', tumen bey tu yóoltilac. 19Le o'olale', yaabilaj sucu'une'ex, jujun túul ti' te'exe' unaj u yu'ubaj séeba'an, ba'ale' ma' unaj u séeb t'aani' mix u séeb p'u'ujuli'. 20Tumen le máax p'u'ujulo' ma' táan u beetic ba'ax utz tu táan Ku. 21Bey túuno' p'ate'ex tuláacal kóokol cuxtal yéetel le kaakas tuuculo'ob jach táaj yano'. Ca a kame'ex yéetel cabal óolal le t'aan dzo'oc u pa'akal ta pucsi'ikale'exo'; tumen le t'aano' yaan u páajtalil u ti'al u toquic a pixane'ex. 22Ba'ale' beete'ex le ba'ax cu ca'ansic te'ex le t'aano' ma' chéen ca wu'uye'exi', tumen wa ma' táan a beetique'exe' táan a tusicaba'ex. 23Le máax chéen cu yu'ubic le t'aano' ba'ale' ma' táan u dzo'ocbesique', bey je'el bix jun túul máac cu pactic u yich ti' jun p'éel néene'. 24Cu néenticubáa ba'ale' le quéen xi'ique' tu séeblaquil cu tu'ubul ti' bix yanil u yich. 25Ba'ale' le máax ma' tu'ubul ti' ba'ax cu yu'ubique', yéetel cu yilic ma'alob le utzil chuca'an a'almaj t'aano', bíin qui'imacchajac u yóol ti' ba'ax cu beetic. 26Wa yaan máax táan u tucultic táan u meyajtic Kue', ba'ale' ma' tu canantic u yaake', leti'e' táan u tusic u pucsi'ikal, yéetel u yocsaj óolale' mix ba'al u ti'al. 27Le ocsaj óolal quili'ich yéetel mina'an u kasa'anil tu táan Ku le Taatao' leti' lela': U yáanta'al le ma' yuumo'ob, yéetel le x quimen íichamo'ob ti' u yaayaj óolalo'obo', yéetel ma' u kokolquinticubáa máac yéetel u kaakas ba'alo'obil le yóokolcaaba'.


Copyright
Learn More

will be added

X\