Hebreos 9

1Le yáax nup t'aano' yaan ca'ach u nu'uctajilo'ob u ti'al le kultajo', ba'ale' ti' jun p'éel kulnaj yaan way lu'ume'. 2Le kulnaja' j beeta'ab beya': tu yáax jun jaatze' le cu kaaba'inta'al Quili'ich Cúuchilo', ti' yaan le candelero' yéetel le mayacche' tu'ux yaan le quili'ich waajo'obo'. 3Paachil ti' le u ca'a p'éel cortinao' ti' yaan le u láak jun jaatzo', le cu kaaba'inta'al jach Quili'ich Cúuchilo'; 4ti' yaan ca'ach jun p'éel u cúuchil siibal beeta'an yéetel oro u ti'al u tóoca'al le incienso', yéetel u nu'uculil le nup t'aano' pixa'an yéetel oro ti' tuláacal u tzéelilo'ob. Ichil le nu'uculo' yaan jun p'éel vaso beeta'an yéetel oro tu'ux dza'an le manao', ti' yaan xan u xóolte' Aarón le j ku'uknajo' yéetel le tuunicho'ob tu'ux dzíibta'an u t'aanilo'ob le nup t'aano'. 5Tu yóokol le nu'uculo' ti' yaan le querubino'obo', lelo'oba' cu ye'esico'ob ti' yaan Kui', u jaymaj u xiiko'ob tu yóokol u cúuchil le ch'a'a óotzililo'. Ba'ale' ma' táan u páajtal c a'alic bele' u láak ba'alo'ob tu yo'olal lela'. 6Bey nu'ucta'anil le ba'alo'oba', le aj kiino'obo' cu yocolo'ob mantadz ti' u yáax jun jaatz le kulnajo' u ti'al u beetico'ob ba'ax kabéet u ti'al le kultajo'. 7Ba'ale' ti' le u ca jaatzo' chéen cu yocol le nojoch aj kiino', jun téen cada ja'ab; le quéen ocoque' yaan u bisic u ki'ikel ba'alche'ob u ti'al u kub tu yo'olal u kebano'ob leti' yéetel tu yo'olal u kebano'ob le caajo'. 8Yéetel lela' le Quili'ich Pixano' cu dzáic c na'ate' ca'aliquil le yáax jun jaatz le kulnaj táan u meyaj u ti'al le kultajo', u bejil u ti'al le jach Quili'ich Cúuchilo' ma' je'ekabi'. 9Tuláacal lela' bey jun p'éel queet t'aan u ti'al u kiinilo'ob bejela'e'; tumen le siibalo'ob yéetel le quiimsbil siibalo'ob cu ku'ubul ti' Ku te'elo', ma' táan u páajtal u ma'alobquintico'ob u tuucul le máaxo'ob cu kultajo'ob beyo'. 10Tumen chéen yaan ba'al u yilo'ob yéetel janalo'ob, ukulo'ob yéetel dze'edzec p'o'obáilo'ob, ba'axo'ob chéen yo'ocabil ba'alo'ob yéetel yaan u biilalo'ob chéen ca'aliquil u kexic Ku le ba'alo'obo'. 11Bele' dzo'oc u taal Cristo, beora' leti' u nojoch aj kiinil le ba'alo'ob ma'alobtac dzo'oc u taalo'. Le kulnaj tu'ux cu beetic u aj kiinilo' asab ma'alob yéetel mixba'al cu bineltic ti', yéetel ma' j beeta'ab tumen máaco'obi'; u káat u ya'ale', ma' lu'umcabili'. 12Cristoe' dzo'oc u yocol ti' le jach Quili'ich Cúuchilo', ma' u ti'al u kub u ki'ikel mejen tamano'ob yéetel mejen wacaxo'obi', ba'ale' u ki'ikel leti'; beyo' dzo'oc u yocol jun téenili' u ti'al tuláacal kiino'ob yéetel dzo'oc u taasic to'on le tocsajil mina'an u xuulo'. 13Tu jaajile' u ki'ikel le wacaxo'ob yéetel le mejen tamano'obo', yéetel u ta'anil le wacax cu tóoca'al tu yóokol le u cúuchil quiimsbil siibalo', ba'axo'ob cu widzilo'ob tu yóokol le máaxo'ob yaan u si'ipilo'obo', yaan páajtalil ti'ob u ti'al u jun páaycuntico'ob yéetel u ti'al u p'o'ico'ob le yo'ocabilo'. 14Ba'ale' wa bey anilo' ¡buca'aj asab páajtalil yaan ti' u ki'ikel Cristo! Tumen tu yo'olal le Quili'ich Pixan mina'an u xuulo', Cristoe' tu kubjubáa ti' Ku bey jun p'éel siibal mina'an mixba'al kasa'an ti'e' yéetel u ki'ikele' cu p'o'ic c tuucul ti' le meyajo'ob cu bisico'ob máac ti' quíimilo', u ti'al ca páatac c meyajtic le cuxa'an Kuo'. 15Le o'olale', Jesucristoe' leti' máax cu t'aan tu yo'olal jun p'éel túumben nup t'aan. Cristoe' j quíimi' u ti'al ca páatac u sa'atsa'al le kebano'ob j beeta'abo'ob yáanal le yáax nup t'aano', yéetel u ti'al ca páatac u ka'amal tumen le máaxo'ob t'ana'ano'ob tumen Ku le ayikalil mina'an u xuul a'ala'an u dza'abal ti'obo'. 16Tumen wa yaan jun p'éel testamentoe', u ti'al ca páatac u dzo'ocbesa'ale' yaan u ye'esa'al tu jaajil dzo'oc u quíimil le máax j beeto'. 17Tumen le testamento' mixba'al u biilal ca'aliquil cuxa'an le máax j beeto', ba'ale' chéen le quéen quíimique'. 18Le o'olale' le yáax nup t'aano' j beeta'ab xan yéetel wecbil ki'ik. 19Moisese' tu ya'alaj tuláacal le a'almaj t'aano' ti' tuláacal le caajo', cu dzo'ocole' tu ch'a'a le u chac tzo'otzel j tamano' yéetel hisopoe', ca tu ch'ulajo'ob ti' u ki'ikel mejen wacaxo'ob yéetel mejen j tamano'ob xa'akta'an yéetel ja'e', ca tu widzaj u libroil le a'almaj t'aano' bey xan tuláacal le máaco'obo'. 20Cu dzo'ocole' tu ya'alaj ti'ob lela' leti' le ki'ik cu jaajcuntic le nup t'aan u ya'almaj Ku a ti'al te'exo'. 21Moisese' tu widzaj xan yéetel ki'ike' le u cúuchil kultajo' bey xan tuláacal le ba'alo'ob cu meyaj u ti'al le kultajo'. 22Je'el bix cu ya'alic le a'almaj t'aano', p'o'o tuláacal kabéet u p'o'obol yéetel ki'ik; yéetel mina'an sa'atsaj si'ipil wa ma' tu we'equel ki'ik. 23Bey túuno', kaabéetchaj le quiimsbil siibalo'oba' u ti'al u p'o'obol le ba'alo'ob chéen u yoochel le ca'anil ba'alo'obo'; ba'ale' u ti'al le ca'anilbe'en ba'alo'obo' kabéet quiimsbil siibalo'ob asab ma'alobtac ti' lelo'oba'. 24Tumen Cristoe' ma' j ooc ti' le kulnaj beeta'an tumen máaco'obo', tumen chéen u yoochel le jaajil kulnajo', ba'ale' j ooc ti' le ca'ano', tu'ux u dzaamubáa bele' tu táan Ku t o'olal. 25Le nojoch aj kiino' cu yocol ti' le jach Quili'ich Cúuchilo' jun téen cada ja'ab u ti'al u kub ki'ik ma' u ti'ali'; ba'ale' Cristoe' ma' táan u kubicubáa bey jun p'éel quiimsbil siibal ya'ab u téenele'. 26Tumen wa beyo', unaj ca'ach u quíimil ya'ab u téenel cáajic le ca j beeta'ab yóokolcaabo'. Ba'ale' ba'ax ucha'an tu jaajil bele', tumen táan u dzo'ocpajal tuláacale', Cristoe' j chíicpaj chéen jun téenili' u ti'al u kubicubáa leti' bey jun p'éel quiimsbil siibale' u ti'al u lukesic le kebano'. 27Je'el bix tuláacal máac yaan u quíimil chéen jun téene', cu dzo'ocole' cu taal le p'is óolo', 28bey xan Cristo j ku'ub chéen jun téenili' je'el bix jun p'éel quiimsbil siibale' u ti'al u lukesic u keban ya'ab máaco'ob. Cu dzo'ocole' bíin chíicpajac tu ca'a téen, ma' u ti'al u lukesic le kebano', ba'ale' u ti'al u toc le máaxo'ob pa'atico'.


Copyrighted Material
Learn More

will be added

X\